過往專欄

　　話說上星期選舉事務處又爆出喺2016年立法會換屆選舉時，唔見咗一本載有8000幾名選民資料嘅選民登記冊，入面載有呢批選民嘅姓名、性別、地址及身分證號碼等個人資料，亦都有顯示選民有冇到場領取選票同埋可獲選票數目（即係有冇份選功能組別），仲要係事發咗兩年都冇公布過，去到有傳媒揭發，社會先知有件咁嘅事！

「黑洞嚟㗎？」

　　呢個情況係唔係好熟悉呢？Jenny記得之前仲有兩部存有超過370萬名選民嘅手提電腦失竊案都未有聲氣，今次又爆一單，難怪工聯會麥美娟（Alice）都質疑選舉事務處係「黑洞嚟㗎？」啦！政府同選舉事務處係就係道咗歉呀！不過Jenny想引用一句名言：「如果道歉有用的話，要警察幹嗎？」

聶局長講起都朦查查

　　不過留意返，選舉事務處喺公布事件嗰時，都只係話「未尋回」本選民登記冊而唔係「遺失」，今日政制及內地事務局局長聶德權同埋選舉事務處總選舉事務主任黃思文就見記者回應呢件事。

　　原來，政府搵咗幾日之後，終於喺今日朝早先去報警，至於幾時唔見、喺咩情況下唔見、有咩人要問責，聶局長都話具體細節就喺警方調查之後先知，仲話「我都好想知道係點樣發生」喎！咁即係冇具體嘢可以講啦……但Jenny可以肯定嘅就係，一定有人欺上暪下！

　　之不過點解唔遲唔早，會係揀正今日報？有人就陰謀論咁同Jenny估，可能係因為今日有另一單大型新聞，就係「佔中案」宣判，政府想要搵啲嘢分散注意力咁話喎！大家又點睇呢？

　　早幾日政府就公布咗臨時選民登記冊，一如所料，喺近年極度低迷嘅政治氣氛之下，直選選民人數持續下降，比去年再跌多8.8萬人，得返432萬人左右。過往一向熱衷政治嘅「新投族」繼續隱晒形，年輕組群係拖低選民人數嘅重災區。

　　據政府資料顯示，最年輕嘅18至20歲選民，今年減幅最顯著，2022年有5.4萬人，今年得返2.6萬人，唔見一半有多，拉闊少少睇18歲至30歲成群，亦都跌近一成，人數減少6.4萬。整體來講，各政黨早前總重員去谷選民登記，成績絕對係唔合格，潛在嘅未登記選民，唔係已經離開咗香港，就係對政治感到「絕望」，最後連望都唔望下。

　　年輕選民下跌以外，功能組別選民人數亦都有明顯嘅跌幅，唔單止係個人票功能組別選民，係連公司票亦都「跌票」。

　　先睇睇個人票嘅組別，教育界由去年8.3萬人減至約7.9萬人；醫療衛生界由5.4萬人跌到得返5.2萬人左右；法律界選民亦都由7200多人降至6800多人；會計界亦都唔見咗千六票，由2.77萬跌到得返2.61萬人。

　　有政圈中人表示，呢幾個界別一向都係泛民票倉，以往新登記選民都多數係支持泛民嘅，喺泛民連日後出唔出到閘嘅政治氣氛之下，無新入行嘅人去登記做選民，確實都係意料之中。不過該名政圈人士就話，最令人感到意外嘅，係連一啲公司票組別，都有唔少跌幅，好似商界（一）、商界（二）、商界（三）全線報跌，商界（一）選民更由986人跌至952人。呢三個界別投得票嘅都係有份量人士，全部都喺大商會入面有表決權，正常本身有票就唔會無啦啦話唔玩，最大可能就係有啲公司退出咗商會之後，新入嘅都唔想牽涉太多政治，免得過就免，亦有可能係部分公司敵不過經濟低潮選擇結業，某程度上都係經濟寒暑表。

　　正如Tina 前文講過，政黨都收到任務要谷起年底嘅區議會投票率，不過睇到今次選民數字，政黨中人就話已經打定輸數，保得住2021年立法會三成投票率已經算係「5星星」喇！