過往專欄

言歸政傳
11/04/2019

廣告事件花生食唔完 CY個「我的朋友」是誰?

#梁振英 #吳文遠 #五歲小孩 #我的朋友

  前特首梁振英(CY)自從星期一畀人「問候」完之後,似乎仍然氣難平!今日佢又出Post喇,繼「五歲小孩」之後又有「我的朋友」向佢進言噃,話怕畀吳文遠呃咗喎!(見圖)

 

 

撇開迷思 見「真朋友」

 

  網絡上每逢有人講「我朋友」定必有人回:「你朋友咪就你囉!」不過,Jenny在此請大家先撇開究竟「我的朋友」=「我」呢個迷思先!皆因連CY FB的「真朋友」似乎都有唔少疑惑……

 

派臥底畀錢文遠駛?

 

  嗱!睇開佢Page嘅都知道,係經佢審批過先可以留言,應該就真係Friend子喇,估唔到去到今日就有質疑嘅聲音出現了!(大膽!)有人竟然回覆咗句:「參加了行動的還會是你的朋友嗎?」唔通,真係有人咁純真,相信吳文遠會真心問候CY生活是否愉快?不過,Page咁多Fans 總有人幫手解話嘅,話嗰位「我的朋友」其實係臥底。Jenny真係睇完得啖笑!

 

  Anyway,唔知CY今次又告唔告得入吳文遠呢?Jenny拭目以待啊!

 

25/05/2021

林鄭單挑「政壇首席KOL」

#立法會 #林鄭月娥 #回港易 #KOL #梁振英

  上星期先寫完特區官員錯漏百出,剛剛過去嘅周末就再一次令市民充分體驗政府官員嘅「三低」,低智慧、低辦事能力同埋低政治敏感度。

 

  衛生防護中心周末(22日)曾經公布,廣東省被列為中風險地區並暫停廣東省「回港易」計劃。呢個講法一公布,建制圈子刮起一陣大風,個個都黑人問號無所適從,連前特首梁振英都要係facebook關注同跟進,最後政制及內地事務局喺上述消息公布6小時後就急劇「轉軚」,將廣東中風險地區收窄至荔灣區龍津街錦龍匯鑫閣,並公布回港易計劃暫時維持不變。

 

(資料圖片)

 

  事件發酵幾日之後,政府內部將個波推來推去,最終紙包唔住火,內情終於有眉目。有報道就話消息公布之前,食衛局就有知會政制及內地事務局,但係政制及內地事務局遲遲無回覆「ok」,食衛局就當咗「ok」向外公布,最終搞出呢個大頭佛。

 

  自從肥佬黎入咗監房之後,前特首梁振英將目標轉向林鄭,多次喺fb甚至透過梁營嘅忠誠猛將叫陣,唔係日日都個個星期批評特區政府嘅政策。難得今次千載難逢機會,CY繼續發揮佢「監察政府」嘅角色,就「回港易」事件向特區政府提出「三不解」,喺特區政府收回成命之後CY又補一句「從善如流」,當真係頂心大杉。

 

  林鄭今早(25日)出席行會前見記者被問到CY對特區政府嘅各種批評,包括要求成立文化局等,林鄭真係毫不客氣,指香港任何時間都有很多人發表意見,「特別係近年好多意見領袖、KOL,所以我就唔會逐個嚟評論。」兩人間火藥味之濃,真係夠放成晚煙花。

 

  CY近年的確轉成為「鍵盤戰士」,反修例事件之後批評特區施政都多數喺網上進行,但林鄭將CY歸類為KOL,的確係可圈可點。有建制中人指出,林鄭咁樣公開講,好明顯就係氣上心頭,但實情都係有計算,事關CY係前特首,雖然貴為國家領導人,但係喺特區施政上的確係毫無角色可言,佢對特區政府指指點點,同其他KOL角色係一模一樣。不過呢位建制中人同時強調,就算CY係KOL,都係香港「政壇首席KOL」,佢嘅O,即係opinion(意見)係可以直達天庭,林鄭單挑CY,除咗用實實在在嘅政績,得把口隨時會「死剩把口」。

 

#食譜 #素食 #數碼營銷 #電影 #移民 #減肥 #創科 #Netflix #外賣 #辦公室貼士 #疫情 #在家運動 #WFH #抗疫不悶 #限聚令 #辦公室求生術
more on etnet.com.hk