03/05/2019
第一期交通津貼好快手拎返 唔好蝕畀政府呀！
#交通補貼踏入5月，即係唔經唔覺2019年都差唔多過咗一半喇！大家年頭Set定嘅目標有冇邊啲係仲未郁手做嘅呢？Jenny今日就提提大家加多個目標落今個月嘅月曆，就係如果你到而家都未拎過政府嗰個交通補貼，就記得Mark埋去拎喇！事關個津貼15號之前都唔拎，就拎唔到㗎啦！
簡單過拎$4000
大家應該都仲記得，呢項交通津貼係今年1月開始計起，如果你每個月嘅車費超過$400，政府就會為餘額提供25%補貼，去到2月就會透過八達通出返1月嘅補貼畀市民，係咪簡單過拎$4000呢！
1月嗰份仲有35萬人未拎
之前兩大便利店仲為咗吸引更多市民去佢哋鋪頭拎補貼，而推出咗$10優惠券添！聽講呢排連超級市場都加入戰線添呀！不過，其中一間數字便利店就喺上個月唔聲唔聲取消咗Coupon，唔知另一間又仲有冇呢？大家打聽完不妨話聲畀Jenny知吖！
睇返政府嘅資料，原來1月嘅補貼都有成35萬人仲未拎㗎！政府噚日先提完大家要交稅，今日大家記得拎返啲錢先，唔好蝕畀政府呀！