過往專欄

　　網民近日力推「不合作運動」，日日都話塞港鐵，但雷聲大雨點小，塞得果一陣，阻得人十幾分鐘。結果就有人喺網上話：「班示威者連咁大個金鐘都塞到，一個金鐘站點解會塞唔到呀。」少年！你們真的太年輕了！要成功癱瘓香港交通，你問過港鐵呢位老手未先？

港鐵一出手便知有沒有！

　　本來網民仲發起今朝去九龍塘站搞「不合作運動」，點知網民都未出手，港鐵就自己先行一步。今日凌晨時份，大學站附近就有架工程車連轉向架出咗軌，架工程車成80噸咁重，要辛苦班工程叔叔逐吋逐吋移返個轉向架上路軌到，所以大埔墟至火炭列車服務自然就要暫停啦。咁大工程，緊係有排搞啦，整整下就到返工時間……成大班打工仔企係大埔墟站到望鐵長嘆，塞爆咗站附近個接駁巴士站，計Jenny話，今日準時返到工的話，應該可以買六合彩！

　　整整下又到Lunch Time，仲未搞掂，等呀等，等到兩點半都仲有一大班人等緊接駁巴士。你問點返工？Sorry呀，你已「被罷工」，港鐵今鋪可謂帶頭「響應」不合作運動喇。

轉主席都幫唔到港鐵轉運？

　　港鐵平日啲機件故障、系統故障、信號故障，多到大家已經麻木。所以得閒就整單「大嘢」，刺激下大家！上年10月就有曠世經典四線齊冧，今年3月就有震古爍今荃灣線金鐘站嘅深宵炒車。講到阻人返工，港鐵如果認第一，應該冇人敢認第二。

　　港鐵換咗個新主席可能會好少少？唔好意思呀，新主席歐陽伯權上任一個月都唔夠就出事，好似仲未幫到港鐵轉運噃！歐陽生，未來港鐵靠你喇！香港人真係好鍾意返工㗎！

　　傅嘉莉（Kelly）近日在社交平台分享自己的可怕經歷，竟然在港鐵站踩到人類的便便，大部分都會自認「倒霉」，不過Kelly的正面思維似乎認為是「大獎」，所以走去買六合彩試試自己的彩數，結果所謂的「狗屎運」原來是假的...

　　Kelly去年憑《香港人在北京》的「火雞姐」造型角色而深入民心，更一度以大熱姿態入圍《萬千星輝頒獎典禮》的「最佳女配角」，雖然最終未能得獎，不過Kelly繼續默默努力接劇，希望透過作品得到大家的認同。Kelly近日在IG分享神奇的經歷，她留言說：「你們有沒有想過有一天會在地鐵站內踩到人類嘅（便便Emoji），我昨天就經歷了，深深充滿每一條鞋縫底。」她更開放留言區問大家：「如果你是我，你的反應是...」

　　未知是否太多人留言鼓勵Kelly，她轉頭就用手機程式買六合彩，可惜的是她說：「我只有和（便便Emoji）的緣份，和六合彩...唉...」雖然又踩屎又唔中六合彩，不過Kelly就「中寶」另一樣嘢。原來早前鍾澍佳宣布準備開拍的劇集《刑偵12》將會易角，跟早前網上流傳的預告版本不同，除了仍然是林保怡擔任男主角之外，原來的馬國明和陳煒則換上張振朗和傅嘉莉，見到Kelly都有轉發消息，似乎開拍的陣容已經屬實，亦代表Kelly將會是今次劇集的女主角，認真可喜可賀。