吃喝玩樂

　　「八珍甜醋份外香」這句廣告聲效大家是不是都耳熟能詳呢？歷史猶久的八珍醬園紮根香港85年，堅持用傳統配方釀製，不添加防腐劑、味精及人造色素，一直深受港人喜愛以及支持！

　　八珍更加入美食車團隊，正式進駐尖沙咀營運，Crossover星級分子料理名廚Mark Sin推出一系列傳統、新派Fusion菜式，包括：多款配以自家經典醬料的港式小食及飲品，更推出創意甜品「甜醋Tiramisu」，就等小編帶大家現場直擊八珍美食車啦！

必試！『八珍』櫻花蝦豆豉醬炒飯 $48

　　由日本入口的櫻花蝦，配上天然生曬的八珍原粒豆豉等天然材料制成的醬料，再加上嫩滑的太陽蛋，啖啖炒飯都充滿櫻花蝦的香味，米飯粒粒乾身，足料惹味，絕對是水準之上，若果怕份量不夠，更可以多付$12加飯！

『八珍』蘿蔔糕 $28

　　以往在新年排長龍才買到的八珍蘿蔔糕，現在美食車都可以食到啦！蘿蔔糕以八珍自家磨製的粘米漿來蒸糕，質感份外幼滑，配上其XO醬，味道一流！

『八珍』甜醋浸鹹蛋薑 $20

　　八珍甜醋份外香街知巷聞，用八珍甜醋煲的豬腳蛋薑醋中的甜醋蛋，大家就食得多，現在八珍大廚特別用鹹蛋煮的八珍甜醋鹹蛋薑，別有一番風味！但食完甜醋蛋，總覺得還差一隻豬腳，有點可惜！

『八珍』天然無添加醬料拌腸粉 $18

　　師傅每天早上都會親自拉腸粉，腸粉並不算滑溜，口感比較實，但可以一嚐三款八珍醬料，包括：豉油、甜麵醬、芝麻醬和特辣辣椒醬，值得一試！

『八珍』陳醋蘇打 $18

　　現在坊間流行飲醋為健康飲品，用八珍甜醋和陳醋調製的陳醋蘇打，健康有助消化，但奈何梳打水的「氣」不夠，味道讓我不期然想起大閘蟹的醋。

『八珍』黑糖薑汁 $18

　　用八珍黑糖薑汁調製的熱飲，暖胃又驅寒，惟薑味不太濃郁，味道比較淡。

『八珍』甜醋Tiramisu（快將登場）

　　甜醋都可以製成Tiramisu？小編跟大家一樣，都是懷著充滿好奇又勇於挑戰的精神去一試這款新派Fusion甜品。

　　由米芝蓮星級餐廳前主廚Mark Sin設計，『八珍』甜醋Tiramisu運用了八款材料，包括：以八珍甜醋製作而成的啫喱、甜醋煮成的甜醋醬、八珍薑糖，以及Tiramisu的靈魂──馬斯卡邦尼芝士、手指餅及朱古力等。

　　入口時先嚐到Tiramisu本身淡淡的芝士香以及帶苦的朱古力粉，一再細味隨即湧出「豬腳薑」的酸甜醋味，感覺就似是品嚐「豬腳薑」味道的慕絲，而且Tiramisu中帶粒粒薑糖，甜中帶辣，同一時間讓人吃盡四味「甜酸苦辣」，味道層次分明，配搭的確充滿驚喜，絕對要一試！

八珍醬園美食車

日期：2017年3月6日至19日

地點：尖沙咀藝術廣場

日期：2017年3月20日至4月2日

地點：黃大仙廣場

日期：2017年4月17日至30日

地點：金紫荊廣場

　　香港地，一講起做飲食業，無論經營者或食客，皆多唉聲嘆氣。前者呻人工材料舖租樣樣貴，根本冇得做；後者呢，同樣呻樣樣加價服務差劣點解唔北上？

　　究竟這個是否真像？我肥碌觀察，中咗八成左右啦。剩返兩成，並非如此，反見有食肆日日排長龍兼訂位要三個月至半年！

　　隨便舉例，灣仔浙江軒，樂富海鱻城，以及，近日家中「排骨仔」介紹為父的生煎包點心專門店，全部旺到爆。

　　香港人口高速老化， 六十歲以上長者邁向三百萬 ，佢哋喜歡乜？十之七八喜歡「懷緬過去常陶醉」。就似小弟，搞親飯局，個個老友都話最好歎懷舊菜，愈舊愈好，若搵到已經消失的菜式更佳。

　　前排在九龍家全七福，正正試到瀕臨絕種的雞子戈渣，難做到飛起，長者為食鬼一入口，便話真係神仙企唔穩。

　　好嘞，更多兩蚊雞族鍾情的，當然是飲廣東茶，歎其一盅兩件。不過咁，隨著樣樣成本高漲，不少「飽肚」點心，漸趨消失。經營飲食業老友呻：「碌Sir，你估我哋想咩，若個個嚟整個雞球大包、臘腸卷又或懷舊糯米雞，一塞就飽，拍拍屁股走人，咁我哋賺乜呀？」

　　唔係冇人想食，係形勢所逼，唔賣！

　　講返間生煎包專門店，有乜咁吸引，要排隊？第一，客人如潮，故點心流轉快，全部新鮮出爐；第二，價錢平民化；第三，最重要，不少流失了的點心，呢處有。例如：懷舊雞球大包、鮮蝦腐皮卷、豬膶腸粉、乾蒸牛肉燒賣、梅菜扣肉包⋯⋯

久違了的豬膶拉腸粉、雞球大包及乾蒸牛肉。

　　而此店招牌，正正是生煎包，非常誇張，每份三大個，只賣三十蚊，幾乎枱枱食。分量好勁，你吞一個，必飽咗大半！

招牌生煎包$30 ，三大隻，吞一隻已經半飽。

　　是日，我只與老婆大人兩位殺去，盡量叫，食唔晒打包，也只能點六款點心，已經「肚滿腸肥」。去時為上午十一點，仍然人潮如湧，有的是一家大細，有的是師奶買完餸，也有的是提早午餐勞動工友，迫爆，從冇一張空櫈。

整個上午座無虛席。門外則有條小人龍。

　　嚟呢類食肆，絕不可要求食得寧靜、坐得舒服、事事衛生、招呼週到。

　　總之，未來前清楚自己要乜，有位就即坐低即劃點心紙。點心上枱快歎（因人人都趕），你點好意思細嚼？套用廣東術語——唔該o趙完鬆，俾位下個客。

　　總結，點心新鮮熱辣好味，Value For Money，旺得有理。

蝦餃、潮州粉果及雞紥等例牌點心也「靚仔」。

　　但最大弊端，店內冇洗手間，要出街市公廁，真真大鑊，因呢個公廁，也百份百「懷舊」，五六十年代裝修及味道有齊，好惡頂也。

食一半，打包一半，埋單拜拜。

生煎包點心專門店

地址：何文田忠孝街六十號愛民邨熟食店一號

電話：2363 1968