吃喝玩樂

　　雲集各類美食的荃灣，一向是大家覓食的好去處。在這裏除卻可以體驗「左一串魚蛋、右一串牛雜」的掃街之樂外，還有不少新派食店紛紛進駐，給該區增添飲食新樂趣。

　　其中就有一間集合了日式Shabu Shabu、特色炸物機為一身的放題餐廳稻八落戶荃灣，不僅以$88至抵價帶來全港首創芝士龍蝦火鍋湯底,還有多款清酒、梅酒、啤酒讓你不醉無歸！到底有乜抵食好玩的內容，即跟隨編輯們一探究竟！

　　店鋪以自然木色裝飾，墻壁上畫有肥嘟嘟又可愛的貓咪手繪，「大口吃肉、大口喝酒」十分應景！還有幾盞日式紙燈籠垂掛下來，頗具日式風情。

　　這裏的配料區也相當豐富，單是蔬菜就有20多款，平日食放題較難見到的皇帝菜、茼蒿、冰菜等都有供應，讃！

　　丸類也有十數款，好豐盛呀！

　　湯底可任選鮮番茄湯、味增芝麻豆乳湯、九州豬骨濃湯、鰹魚昆布清湯、北海道3.7牛乳牛骨湯、壽喜燒甜醬油湯、地獄火岩湯以及沙嗲湯，當中都有唔少創新口味。

　　放題限時120分鐘，從$158的美國自然豚肉/雞件放題至$368的日本國產A4黑毛和牛放題都有，豐儉由人。

　　當中日本國產A4黑毛和牛放題可食到 A4黑毛和牛三角腩、A4黑毛和牛牛肩肉、A4黑毛和牛肉眼上蓋、M6澳洲和牛牛舌、M6澳洲和牛下腹腩肉、M6澳洲和牛牛小排、M6澳洲和牛牛肩胛肉以及海鮮拼盤，非常抵食！

【試食推薦】必試 $88原隻芝士龍蝦火鍋湯底 

　　提到日式火鍋，平日裏吃來吃去就是壽喜鍋、昆布鍋、豆乳鍋，想食點新意思，推薦大家要試試這裏的原隻芝士龍蝦火鍋湯底。清甜爽口的波士頓龍蝦，配上濃郁芝士湯，為傳統日式火鍋帶來全新味覺衝擊。

　　這裏的波士頓龍蝦湯，每一鍋都獨立烹調，食材更是不吝嗇，每鍋都有一條大大隻龍蝦，重量不少於700克，比平日在酒樓裏吃的芝士焗龍蝦還要大。湯底還加有南瓜、番茄、粟米、冬菇等。為慶祝新店開張，凡惠顧任何套餐，均可以至抵價$88升級到原隻芝士龍蝦湯底！

　　大廚進一步解畫濃郁龍蝦湯底好味的秘訣。原來先將芝士龍蝦焗香再放入南瓜忌廉濃湯內續煮，進一步逼出龍蝦的鮮甜滋味。品嘗時，可先食啖啖龍蝦肉，留著蝦頭和蝦尾於鍋內。更可隨個人喜好加入南瓜和番茄等食材，令湯底更濃郁。芝士龍蝦鍋用來煮豆腐、蔬菜已經很美味，配牛肉、海鮮等食材，更是味覺享受。

自助炸物機！零失手炸天婦羅

　　食完火鍋，仲可以任玩炸物機！炸物機由日本引進，天婦羅的款式豐富，有蝦、日本蕃薯、芝士年糕、魚餅等共16款材料，每次最可以同時炸5串，做法亦相當簡單，先把食物沾上炸漿，再平均把米糠蘸在串物表面，之後放進已經預熱160度油溫的炸爐，牆上有計時器倒數兩分鐘，就完成了零失手炸天婦羅啦！

　　小編試炸過幾次，兩分鐘的確剛剛好，天婦羅炸到香口無燶，簡直零難度！個人推介：日本蕃薯、午餐肉以及芝士丸。其實炸爐的使用都好簡單，而且非常安全，不用擔心會出現彈油的問題，但當然如果同行有小朋友就要多加照顧啦！

以酒會友！抵飲推介「夜夜不醉無歸」

　　打邊爐點可以無酒？小編見到$25杯1664經已心心眼，這個價錢與外面的酒吧相比，簡直是破底價！

　　除了1664、Asahi等的啤酒選擇外，老闊亦特意揀選了多款日本時令的清酒以及梅酒，只需每位加$50即可以「不醉無歸」任叫任飲，當中以CHOYA蝶矢黑糖梅酒、中田蜂蜜梅酒最為吸引！大家亦可以$38的優惠價品嚐日本頂級真野鶴，一大班朋友把酒談心，這裏的選擇必定有一款滿足你！

Inahachi稻八日式火鍋炸物放題

荃灣店：荃灣德海街18號富利達中心1樓

大埔店：大埔舊墟直街4-20號美新大廈A2舖

營業時間：星期一至日下午5時至凌晨2時

　　香港地，一講起做飲食業，無論經營者或食客，皆多唉聲嘆氣。前者呻人工材料舖租樣樣貴，根本冇得做；後者呢，同樣呻樣樣加價服務差劣點解唔北上？

　　究竟這個是否真像？我肥碌觀察，中咗八成左右啦。剩返兩成，並非如此，反見有食肆日日排長龍兼訂位要三個月至半年！

　　隨便舉例，灣仔浙江軒，樂富海鱻城，以及，近日家中「排骨仔」介紹為父的生煎包點心專門店，全部旺到爆。

　　香港人口高速老化， 六十歲以上長者邁向三百萬 ，佢哋喜歡乜？十之七八喜歡「懷緬過去常陶醉」。就似小弟，搞親飯局，個個老友都話最好歎懷舊菜，愈舊愈好，若搵到已經消失的菜式更佳。

　　前排在九龍家全七福，正正試到瀕臨絕種的雞子戈渣，難做到飛起，長者為食鬼一入口，便話真係神仙企唔穩。

　　好嘞，更多兩蚊雞族鍾情的，當然是飲廣東茶，歎其一盅兩件。不過咁，隨著樣樣成本高漲，不少「飽肚」點心，漸趨消失。經營飲食業老友呻：「碌Sir，你估我哋想咩，若個個嚟整個雞球大包、臘腸卷又或懷舊糯米雞，一塞就飽，拍拍屁股走人，咁我哋賺乜呀？」

　　唔係冇人想食，係形勢所逼，唔賣！

　　講返間生煎包專門店，有乜咁吸引，要排隊？第一，客人如潮，故點心流轉快，全部新鮮出爐；第二，價錢平民化；第三，最重要，不少流失了的點心，呢處有。例如：懷舊雞球大包、鮮蝦腐皮卷、豬膶腸粉、乾蒸牛肉燒賣、梅菜扣肉包⋯⋯

久違了的豬膶拉腸粉、雞球大包及乾蒸牛肉。

　　而此店招牌，正正是生煎包，非常誇張，每份三大個，只賣三十蚊，幾乎枱枱食。分量好勁，你吞一個，必飽咗大半！

招牌生煎包$30 ，三大隻，吞一隻已經半飽。

　　是日，我只與老婆大人兩位殺去，盡量叫，食唔晒打包，也只能點六款點心，已經「肚滿腸肥」。去時為上午十一點，仍然人潮如湧，有的是一家大細，有的是師奶買完餸，也有的是提早午餐勞動工友，迫爆，從冇一張空櫈。

整個上午座無虛席。門外則有條小人龍。

　　嚟呢類食肆，絕不可要求食得寧靜、坐得舒服、事事衛生、招呼週到。

　　總之，未來前清楚自己要乜，有位就即坐低即劃點心紙。點心上枱快歎（因人人都趕），你點好意思細嚼？套用廣東術語——唔該o趙完鬆，俾位下個客。

　　總結，點心新鮮熱辣好味，Value For Money，旺得有理。

蝦餃、潮州粉果及雞紥等例牌點心也「靚仔」。

　　但最大弊端，店內冇洗手間，要出街市公廁，真真大鑊，因呢個公廁，也百份百「懷舊」，五六十年代裝修及味道有齊，好惡頂也。

食一半，打包一半，埋單拜拜。

生煎包點心專門店

地址：何文田忠孝街六十號愛民邨熟食店一號

電話：2363 1968