吃喝玩樂

　　踏入7月，好多人周末都會入西貢，出海遊船河或玩戶外運動，感受夏日的熱情與活力！揮灑過汗水之後，又能少得食呢？入得西貢，當然要食餐好，貴為美食集中地，這裏又點止得海鮮食呢？

　　New Taste Kitchen位於西貢匡湖居，是一間結合新派西餐及酒吧的餐廳。店內舒適闊落，氣派寫意，除有多款「潮飲營食」的Fusion菜，更設有Happy Hour時段，是在西貢歡聚的好地點！ 

德國火焰豬手 ($198)

　　招牌菜Number One！廚師將新鮮豬手腌製，再烤到恰到好處，油而不膩，皮脆肉嫩，食落脆卜卜！ 上菜時店員更會喺你面前倒上冧酒再點火，讓豬手燃燒10秒左右，賣相同味道同樣吸引，食落仲帶有陣陣酒香添！配埋開胃酸椰菜同芥末醬，食落就無得彈喇！

摩天輪海鮮拼盤 ($168)

　　用摩天輪盛裝賣相玩盡創意！海鮮拼盤雲集炸蠔、炸蝦、炸帶子、魷魚圈、魚手指，炸至金黃香脆，新鮮美味，配啤酒就一流，份量仲啱晒一班人Share添！ 

豪華全日早餐 ($128)

　　All Day Breakfast多達8款食材，包括法蘭克福腸、煙肉、大啡菇、黑松露炒蛋、烤蕃茄、薯餅、茄汁豆及法國麵包配黑松露牛油，全部即叫即製！精華在於黑松露牛油，採用上等意大利黑松露混合高級牛油手工自家製作而成，放在烘至香脆的法包上，每一啖都充滿松露香味！

芝士脆底薄餅 ($88-$98)

　　要食好味嘅Pizza，除咗醬料同材料要好味之外，餅底都十分講究架！廚師將餅底加入適量芝士，食落充滿啖啖芝士香味。薄餅有煙三文魚、Parma Ham、西班牙辣肉腸、黑松露野菌同香辣海鮮五款口味。

大啡菇芝士漢堡 ($88)

　　愈嚟愈多人鍾意素食，呢度有款素Burger推薦你試下！大啡菇加入芝士烤焗，為漢堡添上香濃嘅「芝」味，配上蕃茄、蔬菜及秘製醬汁，食落Juicy，健康又好味！ 

地址：西貢匡湖居購物中心B6號舖

電話：2598 8806

營業時間：星期一至星期日，下午3時至凌晨1時

　　香港地，一講起做飲食業，無論經營者或食客，皆多唉聲嘆氣。前者呻人工材料舖租樣樣貴，根本冇得做；後者呢，同樣呻樣樣加價服務差劣點解唔北上？

　　究竟這個是否真像？我肥碌觀察，中咗八成左右啦。剩返兩成，並非如此，反見有食肆日日排長龍兼訂位要三個月至半年！

　　隨便舉例，灣仔浙江軒，樂富海鱻城，以及，近日家中「排骨仔」介紹為父的生煎包點心專門店，全部旺到爆。

　　香港人口高速老化， 六十歲以上長者邁向三百萬 ，佢哋喜歡乜？十之七八喜歡「懷緬過去常陶醉」。就似小弟，搞親飯局，個個老友都話最好歎懷舊菜，愈舊愈好，若搵到已經消失的菜式更佳。

　　前排在九龍家全七福，正正試到瀕臨絕種的雞子戈渣，難做到飛起，長者為食鬼一入口，便話真係神仙企唔穩。

　　好嘞，更多兩蚊雞族鍾情的，當然是飲廣東茶，歎其一盅兩件。不過咁，隨著樣樣成本高漲，不少「飽肚」點心，漸趨消失。經營飲食業老友呻：「碌Sir，你估我哋想咩，若個個嚟整個雞球大包、臘腸卷又或懷舊糯米雞，一塞就飽，拍拍屁股走人，咁我哋賺乜呀？」

　　唔係冇人想食，係形勢所逼，唔賣！

　　講返間生煎包專門店，有乜咁吸引，要排隊？第一，客人如潮，故點心流轉快，全部新鮮出爐；第二，價錢平民化；第三，最重要，不少流失了的點心，呢處有。例如：懷舊雞球大包、鮮蝦腐皮卷、豬膶腸粉、乾蒸牛肉燒賣、梅菜扣肉包⋯⋯

久違了的豬膶拉腸粉、雞球大包及乾蒸牛肉。

　　而此店招牌，正正是生煎包，非常誇張，每份三大個，只賣三十蚊，幾乎枱枱食。分量好勁，你吞一個，必飽咗大半！

招牌生煎包$30 ，三大隻，吞一隻已經半飽。

　　是日，我只與老婆大人兩位殺去，盡量叫，食唔晒打包，也只能點六款點心，已經「肚滿腸肥」。去時為上午十一點，仍然人潮如湧，有的是一家大細，有的是師奶買完餸，也有的是提早午餐勞動工友，迫爆，從冇一張空櫈。

整個上午座無虛席。門外則有條小人龍。

　　嚟呢類食肆，絕不可要求食得寧靜、坐得舒服、事事衛生、招呼週到。

　　總之，未來前清楚自己要乜，有位就即坐低即劃點心紙。點心上枱快歎（因人人都趕），你點好意思細嚼？套用廣東術語——唔該o趙完鬆，俾位下個客。

　　總結，點心新鮮熱辣好味，Value For Money，旺得有理。

蝦餃、潮州粉果及雞紥等例牌點心也「靚仔」。

　　但最大弊端，店內冇洗手間，要出街市公廁，真真大鑊，因呢個公廁，也百份百「懷舊」，五六十年代裝修及味道有齊，好惡頂也。

食一半，打包一半，埋單拜拜。

生煎包點心專門店

地址：何文田忠孝街六十號愛民邨熟食店一號

電話：2363 1968