吃喝玩樂

　　泰國菜味濃可口，酸辣開胃，向來深受港人喜愛。光是一碗粉麵，只要添上砂糖、辣椒乾、勁辣魚露或酸辣汁等調味料，就能交織出多層次的口感滋味，叫人垂涎三尺。但隨著都市人愈來愈推崇健康飲食，主打低鹽、低糖的泰式料理又啱唔啱你口味呢？

　　最近，小編留意到泰國餐廳Café Siam與著名食物營養師Kim Murphy合作，推出了12道健康泰式料理，由餐湯、前菜、主菜到飲品，均奉行低鈉、低鹽及低糖的飲食原則，既健康又美味。餐單更有大量素食選擇，讓茹素的朋友亦能大飽口福。

蒜香炒雜菌 $88

泰式香草豆腐雜菜米紙卷 $80

香芒大蝦米紙卷 $98

　　「香芒大蝦米紙卷」是其中一道不得不試的菜色，尤其蘸上了經調配的芒果汁同吃，味道更是清爽香甜。做法也超級簡單，先把米紙浸軟，再把芒果肉、大蝦及新鮮蔬菜放在米紙中間，然後把兩端對折，捲成米紙卷便大功告成。有興趣的話不妨動手試試。

燒大頭蝦配泰式芒果沙律 $138

燒豬頸肉配青芒果沙律 $128

　　「燒豬頸肉配青芒果沙律」也是必試之選。以低溫慢煮的豬頸肉，咬下去肉質嫩滑，伴以酸辣醬料，讓人忍不住一口接一口。

泰式清蒸鱸魚片 $228

泰式腰果牛柳粒 $168

香草青芒果大蝦包配酸子醬 $98

南瓜紅咖哩配大蝦 $128

紅咖哩配田園蔬菜$98

　　至於喜歡素食的朋友，萬不能錯過「紅咖哩配田園蔬菜」！廚師把甘筍、西蘭花、粟米筍、泰國檸檬葉、金不換、辣椒膏及椰漿等材料混入，煮成味帶清新的惹味咖哩。這時，若叫上一碗軟糯的紅米飯，就是最佳配搭。

香茅斑蘭葉特飲 $58

椰青克弗爾特飲 $58

　　餐廳還提供一系列健康排毒特飲，更在所有飲品中加入土耳其活菌發酵飲料Kefir。小編聽講，Kefir內含大量活性益生菌，不但有助保持腸道暢通，更對胃腸道疾病、代謝系統疾病、高血壓、動脈硬化、局部貧血、心臟病、糖尿病和過敏症等有一定的治療作用。

薑黃椰香拿鐵 $48

　　不過「薑黃椰香拿鐵」才是小編的最愛。拿起杯來聞聞，是濃濃的椰奶香；再喝上一口，便吃到微辣的黑胡椒粒，口感十足呢！

Editor’s Pick

　　前菜：香芒大蝦米紙卷／燒豬頸肉配青芒果沙律

　　主菜：泰式腰果牛柳粒／南瓜紅咖哩配大蝦

　　飲品：薑黃椰香拿鐵

Café Siam

西環堅尼地城科士街38號地舖

　　香港地，一講起做飲食業，無論經營者或食客，皆多唉聲嘆氣。前者呻人工材料舖租樣樣貴，根本冇得做；後者呢，同樣呻樣樣加價服務差劣點解唔北上？

　　究竟這個是否真像？我肥碌觀察，中咗八成左右啦。剩返兩成，並非如此，反見有食肆日日排長龍兼訂位要三個月至半年！

　　隨便舉例，灣仔浙江軒，樂富海鱻城，以及，近日家中「排骨仔」介紹為父的生煎包點心專門店，全部旺到爆。

　　香港人口高速老化， 六十歲以上長者邁向三百萬 ，佢哋喜歡乜？十之七八喜歡「懷緬過去常陶醉」。就似小弟，搞親飯局，個個老友都話最好歎懷舊菜，愈舊愈好，若搵到已經消失的菜式更佳。

　　前排在九龍家全七福，正正試到瀕臨絕種的雞子戈渣，難做到飛起，長者為食鬼一入口，便話真係神仙企唔穩。

　　好嘞，更多兩蚊雞族鍾情的，當然是飲廣東茶，歎其一盅兩件。不過咁，隨著樣樣成本高漲，不少「飽肚」點心，漸趨消失。經營飲食業老友呻：「碌Sir，你估我哋想咩，若個個嚟整個雞球大包、臘腸卷又或懷舊糯米雞，一塞就飽，拍拍屁股走人，咁我哋賺乜呀？」

　　唔係冇人想食，係形勢所逼，唔賣！

　　講返間生煎包專門店，有乜咁吸引，要排隊？第一，客人如潮，故點心流轉快，全部新鮮出爐；第二，價錢平民化；第三，最重要，不少流失了的點心，呢處有。例如：懷舊雞球大包、鮮蝦腐皮卷、豬膶腸粉、乾蒸牛肉燒賣、梅菜扣肉包⋯⋯

久違了的豬膶拉腸粉、雞球大包及乾蒸牛肉。

　　而此店招牌，正正是生煎包，非常誇張，每份三大個，只賣三十蚊，幾乎枱枱食。分量好勁，你吞一個，必飽咗大半！

招牌生煎包$30 ，三大隻，吞一隻已經半飽。

　　是日，我只與老婆大人兩位殺去，盡量叫，食唔晒打包，也只能點六款點心，已經「肚滿腸肥」。去時為上午十一點，仍然人潮如湧，有的是一家大細，有的是師奶買完餸，也有的是提早午餐勞動工友，迫爆，從冇一張空櫈。

整個上午座無虛席。門外則有條小人龍。

　　嚟呢類食肆，絕不可要求食得寧靜、坐得舒服、事事衛生、招呼週到。

　　總之，未來前清楚自己要乜，有位就即坐低即劃點心紙。點心上枱快歎（因人人都趕），你點好意思細嚼？套用廣東術語——唔該o趙完鬆，俾位下個客。

　　總結，點心新鮮熱辣好味，Value For Money，旺得有理。

蝦餃、潮州粉果及雞紥等例牌點心也「靚仔」。

　　但最大弊端，店內冇洗手間，要出街市公廁，真真大鑊，因呢個公廁，也百份百「懷舊」，五六十年代裝修及味道有齊，好惡頂也。

食一半，打包一半，埋單拜拜。

生煎包點心專門店

地址：何文田忠孝街六十號愛民邨熟食店一號

電話：2363 1968