吃喝玩樂

　　中國人過年要講好意頭，從賀年菜名可見一斑。比如生意人要食發財好市（髮菜蠔豉），以及象徵風生水起的「撈起」。 過去，富貴人家還要講究排場，比如會以「九大簋」宴客，豐盛的宴席既有盆滿缽滿的寓意，也是代表了對賓客熱情隆重的款待。

　　「簋」是古代放置食物的器皿，或方或圓，材質則有木、竹、陶和銅之分，它本是古代貴族的食器或祭器，後來逐漸流傳到民間，如今，粵地仍保存此古風，但不常見，大多隱身於客家圍村之中。

　　適逢新年，有酒店推出富貴版「九大簋」宴，掌廚超過30年的賴師傅更特意向資深客家廚師取經，重現「九大簋」的經典菜式， 讓大家能一嘗傳統民間風味。

吉祥水鴨花膠湯

　　以原隻水鴨連同10年陳皮燉製四小時，打開湯砵隨即散發出陳皮甘香。老火湯更加入花膠，令湯品更滋補養身。

鴻圖龍蝦饌

　　客家傳統食譜上以河蝦作食材，但大家過年都會食豪啲，師傅特別改以龍蝦入饌。龍蝦切件以自家製的陳皮豆豉醬爆香，龍蝦肉本已鮮甜，再加上陳皮豆豉的點綴提味，更是香味四溢。

新春迎銀鴨

　　此道菜式源自「狗仔鴨」，但今次大廚以愛爾蘭Silver Hill鴨炮製，更顯矜貴。柱侯醬、豉油、酒、陳皮、老薑等連同芋頭炆煮的Silver Hill頂級鴨肉，長時間炆煮後肉質依然細嫩，推介！

富貴蠔豉卷 

　　網油卷是一道傳統粵菜，以豬網油包裹著上佳蠔豉炸成酥香金卷，口感香脆、蠔香豐郁，因講求手工、心機和時間，缺一不可，坊間少見。

鳳凰醉鍋

　　「黃酒雞」是傳統客家宴中的經典菜式，客家黃酒味道偏甜且酒精濃度低，再配以紅棗及杞子慢火熬製雞肉，令肉質口感嫩滑，並伴隨著芬郁酒香。

年年有餘龍躉球

　　選用肉厚爽嫩的龍躉球，配上自家醃漬的鹹菜，保留民間風味而不失貴氣。

五福臨門炆豐肉

　　肥瘦適中的五花腩配上鮮冬筍及大蒜炆煮，並加入粵菜中常用的南乳提味。

豐盈濃汁燴花菇

　　燴花菇是普遍家庭的節慶菜式，足二両的厚花菇，簡單配上雞汁烹調已能帶出無限鮮甜味美。

翡翠上湯炆魚鰾

　　魚鰾於客家菜中象徵體面，是宴客常備的菜式。魚鰾炆煮勝瓜，再加入肉碎及生曬蝦乾，十分惹味。

「春盈福滿九大簋」

推出日期：2018年2月16日起

價格：每席$3,800，8位用

地址：北角城市花園酒店「粵」中菜廳

　　香港地，一講起做飲食業，無論經營者或食客，皆多唉聲嘆氣。前者呻人工材料舖租樣樣貴，根本冇得做；後者呢，同樣呻樣樣加價服務差劣點解唔北上？

　　究竟這個是否真像？我肥碌觀察，中咗八成左右啦。剩返兩成，並非如此，反見有食肆日日排長龍兼訂位要三個月至半年！

　　隨便舉例，灣仔浙江軒，樂富海鱻城，以及，近日家中「排骨仔」介紹為父的生煎包點心專門店，全部旺到爆。

　　香港人口高速老化， 六十歲以上長者邁向三百萬 ，佢哋喜歡乜？十之七八喜歡「懷緬過去常陶醉」。就似小弟，搞親飯局，個個老友都話最好歎懷舊菜，愈舊愈好，若搵到已經消失的菜式更佳。

　　前排在九龍家全七福，正正試到瀕臨絕種的雞子戈渣，難做到飛起，長者為食鬼一入口，便話真係神仙企唔穩。

　　好嘞，更多兩蚊雞族鍾情的，當然是飲廣東茶，歎其一盅兩件。不過咁，隨著樣樣成本高漲，不少「飽肚」點心，漸趨消失。經營飲食業老友呻：「碌Sir，你估我哋想咩，若個個嚟整個雞球大包、臘腸卷又或懷舊糯米雞，一塞就飽，拍拍屁股走人，咁我哋賺乜呀？」

　　唔係冇人想食，係形勢所逼，唔賣！

　　講返間生煎包專門店，有乜咁吸引，要排隊？第一，客人如潮，故點心流轉快，全部新鮮出爐；第二，價錢平民化；第三，最重要，不少流失了的點心，呢處有。例如：懷舊雞球大包、鮮蝦腐皮卷、豬膶腸粉、乾蒸牛肉燒賣、梅菜扣肉包⋯⋯

久違了的豬膶拉腸粉、雞球大包及乾蒸牛肉。

　　而此店招牌，正正是生煎包，非常誇張，每份三大個，只賣三十蚊，幾乎枱枱食。分量好勁，你吞一個，必飽咗大半！

招牌生煎包$30 ，三大隻，吞一隻已經半飽。

　　是日，我只與老婆大人兩位殺去，盡量叫，食唔晒打包，也只能點六款點心，已經「肚滿腸肥」。去時為上午十一點，仍然人潮如湧，有的是一家大細，有的是師奶買完餸，也有的是提早午餐勞動工友，迫爆，從冇一張空櫈。

整個上午座無虛席。門外則有條小人龍。

　　嚟呢類食肆，絕不可要求食得寧靜、坐得舒服、事事衛生、招呼週到。

　　總之，未來前清楚自己要乜，有位就即坐低即劃點心紙。點心上枱快歎（因人人都趕），你點好意思細嚼？套用廣東術語——唔該o趙完鬆，俾位下個客。

　　總結，點心新鮮熱辣好味，Value For Money，旺得有理。

蝦餃、潮州粉果及雞紥等例牌點心也「靚仔」。

　　但最大弊端，店內冇洗手間，要出街市公廁，真真大鑊，因呢個公廁，也百份百「懷舊」，五六十年代裝修及味道有齊，好惡頂也。

食一半，打包一半，埋單拜拜。

生煎包點心專門店

地址：何文田忠孝街六十號愛民邨熟食店一號

電話：2363 1968