吃喝玩樂

　　好久不見的掃街攻略又返嚟啦！今次帶大家去到時代廣場地庫，參加手工芝士及特色冷盤市集，現場除了有一系列的試食攤位，更有不少美食攤檔，的確令一眾芝士迷為之瘋狂啊！事不宜遲，小編即刻帶大家睇盡場內六大精選美食，以及購物攻略啦！

　　場內最吸引的當然是多款現製芝士小食及黑毛豬火腿拼盤，小編首推的是彩色芝士多士，其拉絲效果儼如一道「吃得到的彩虹」，視覺效果滿分！

編輯親試報告！場內6款必試小食

彩色芝士多士 $42

　　色彩繽紛的彩色芝士多士，以來自荷蘭的Landana芝士，包括：紅色羅勒醬芝士、綠色羅勒醬芝士、有機淡味荷蘭芝士、香辣參巴醬芝士等製成，味道相當豐富，芝味濃郁，每一口都有不同的味覺驚喜！品嚐之前記得先把多士緩緩拉開，拉絲效果猶如彩虹一樣，極盡視覺享受，記得影相啊！

五式芝士帆立貝 $68/2隻

　　帆立貝配以五種芝士，包括：巴馬森芝士、車打芝士、傑克芝士以及墨西哥式芝士（Queso Quesadilla, Asadero Natural Cheese），既能品嘗芝士的鹹香，又不會蓋過帶子的鮮味，配搭恰到好處！另外亦可選擇五式芝士虎蝦，或青口配藍芝士汁！

西班牙黑毛豬火腿體驗拼盤 $78

　　選用了純伊比利亞黑毛豬肉，每份拼盤都提供3個不同部位的火腿，大家可以細味每個部位之間的分別，油香味十足，而且不會太鹹！

Bellota-Bellota薯蓉配黑毛豬火腿片 $58

　　48個月的伊比利亞黑毛豬火腿片，配以薯蓉及特級橄欖油，品嘗時可以吃到淡淡的橄欖果香，火腿片味道比上一款更濃郁，夾著綿滑的薯蓉，的確是齒頰留香！

西班牙辣肉腸藍徽芝士法式薄餅 $70

　　來自Fleur de Sel La的法式薄餅，Gregory Alexandre及其團隊即席炮製三款芝士及火腿法式鹹薄餅，熱騰騰的薄餅配以溶芝士香味大大提升！

烤法國豬肋骨 $98

　　選用在法國飼養及屠宰的豬隻，只需數分鐘加熱即可食用，方便快捷，配上燒烤醬更添滋味，份量十足！

編輯購物車！芝士與酒缺一不可

Salt Spring Island手工芝士 $88-118/件

　　位於加拿大卑詩省鹽泉島的Salt Spring Island，芝士採用新鮮山羊奶芝士以人手製成，並加入天然材料成為巧妙配搭，口味包括：羅勒山羊奶芝士（最啱配蓄茄）、花瓣山羊奶芝士、白松露山羊奶芝士（最啱配意粉/炒蛋）以及檸檬山羊奶芝士（最啱配煙三文魚），送禮自用一樣賞心悅目！

Landana荷蘭牛奶芝士 $38/100克

　　以傳統方法人手製作的Landana芝士，以100%天然純荷蘭牛奶製成，製作過程中加入不同的食材，以食材的原色為芝士抹上色彩，包括：紅色羅勒醬芝士、香辣參巴醬芝士、松露芝士以及青芥末芝士，當中小編最欣賞紅色羅勒醬芝士，蕃茄加上羅勒的味道，猶如品嚐薄餅一樣！

LUIS THE MARINERO西班牙紅雞尾酒 $120

　　Luis the Marinero專門生產樽裝西班牙果酒，共有紅雞尾酒、白雞尾酒和玫瑰紅雞尾酒供選擇，與芝士及風乾肉類更是上佳的美食配搭。紅雞尾酒色澤如紅寶石般，散發紅梅和柑橘的香味，更有淡淡玉桂甜味。白雞尾酒以果味豐富的白酒製成，帶有柑橘和熱帶水果的香味。玫瑰紅雞尾酒擁有令人心動的玫瑰紅色，更有士多啤梨和紅桑梅的甜蜜餘韻。

City’super手工芝士及特色冷盤巡禮

日期：即日起至2018年3月4日

地點：時代廣場、海港城及新城市店

　　香港地，一講起做飲食業，無論經營者或食客，皆多唉聲嘆氣。前者呻人工材料舖租樣樣貴，根本冇得做；後者呢，同樣呻樣樣加價服務差劣點解唔北上？

　　究竟這個是否真像？我肥碌觀察，中咗八成左右啦。剩返兩成，並非如此，反見有食肆日日排長龍兼訂位要三個月至半年！

　　隨便舉例，灣仔浙江軒，樂富海鱻城，以及，近日家中「排骨仔」介紹為父的生煎包點心專門店，全部旺到爆。

　　香港人口高速老化， 六十歲以上長者邁向三百萬 ，佢哋喜歡乜？十之七八喜歡「懷緬過去常陶醉」。就似小弟，搞親飯局，個個老友都話最好歎懷舊菜，愈舊愈好，若搵到已經消失的菜式更佳。

　　前排在九龍家全七福，正正試到瀕臨絕種的雞子戈渣，難做到飛起，長者為食鬼一入口，便話真係神仙企唔穩。

　　好嘞，更多兩蚊雞族鍾情的，當然是飲廣東茶，歎其一盅兩件。不過咁，隨著樣樣成本高漲，不少「飽肚」點心，漸趨消失。經營飲食業老友呻：「碌Sir，你估我哋想咩，若個個嚟整個雞球大包、臘腸卷又或懷舊糯米雞，一塞就飽，拍拍屁股走人，咁我哋賺乜呀？」

　　唔係冇人想食，係形勢所逼，唔賣！

　　講返間生煎包專門店，有乜咁吸引，要排隊？第一，客人如潮，故點心流轉快，全部新鮮出爐；第二，價錢平民化；第三，最重要，不少流失了的點心，呢處有。例如：懷舊雞球大包、鮮蝦腐皮卷、豬膶腸粉、乾蒸牛肉燒賣、梅菜扣肉包⋯⋯

久違了的豬膶拉腸粉、雞球大包及乾蒸牛肉。

　　而此店招牌，正正是生煎包，非常誇張，每份三大個，只賣三十蚊，幾乎枱枱食。分量好勁，你吞一個，必飽咗大半！

招牌生煎包$30 ，三大隻，吞一隻已經半飽。

　　是日，我只與老婆大人兩位殺去，盡量叫，食唔晒打包，也只能點六款點心，已經「肚滿腸肥」。去時為上午十一點，仍然人潮如湧，有的是一家大細，有的是師奶買完餸，也有的是提早午餐勞動工友，迫爆，從冇一張空櫈。

整個上午座無虛席。門外則有條小人龍。

　　嚟呢類食肆，絕不可要求食得寧靜、坐得舒服、事事衛生、招呼週到。

　　總之，未來前清楚自己要乜，有位就即坐低即劃點心紙。點心上枱快歎（因人人都趕），你點好意思細嚼？套用廣東術語——唔該o趙完鬆，俾位下個客。

　　總結，點心新鮮熱辣好味，Value For Money，旺得有理。

蝦餃、潮州粉果及雞紥等例牌點心也「靚仔」。

　　但最大弊端，店內冇洗手間，要出街市公廁，真真大鑊，因呢個公廁，也百份百「懷舊」，五六十年代裝修及味道有齊，好惡頂也。

食一半，打包一半，埋單拜拜。

生煎包點心專門店

地址：何文田忠孝街六十號愛民邨熟食店一號

電話：2363 1968