吃喝玩樂

　　近年愈來愈多港人愛到越南旅行，回來後大讚當地美食多蘿蘿，其中越南河粉、炸春捲、咖哩更是必食之選！不過「個個都想去旅行，唔通個個都去到旅行咩」，去唔到越南又想食正宗越南菜？咁就要跟小編去有越南海防師傅坐鎮的「越滿」唰！

　　來到越滿，首選必試招牌越滿和牛湯河！這碗越式牛河用料上乘，有日本和牛、澳洲和牛、和牛牛舌、美國牛小排和牛丸，啱晒所有鍾意食牛的朋友呀！而且分量十足，小編和攝影師兩個人都夠食！

越滿和牛湯河　$118

　　和牛河粉上枱後，店員便會即席注入牛骨清湯，靠湯溫把和牛煮熟。看著粉色的牛肉逐漸變熟，小編莫名地有種「被治愈」的感覺！

順化蔗蝦　$38

　　蝦膠非常彈牙，加上竹蔗本身的甜味，味道不錯！

雞（半隻）　$68

　　燒雞不但外皮香脆、肉質嫩滑，還帶有越南香葉的香味，蘸上特製醬汁，滋味馬上提升！是小編私心推介！

海防蕃茄蟹肉鮮蝦湯檬　$60

　　材料同樣豐富，有大頭蝦、扎肉、洋蔥、木耳、蕃茄、蝦、蟹肉等，加上蕃茄湯底香濃鮮甜，令人忍不住一口接一口。聽師傅話，他們選用的檬粉是由越南直接入口，質感滑溜彈牙，兼帶米香，和大家在一般越南餐廳吃到的很不一樣。

咖哩軟殼蟹 $78

　　軟殼蟹外脆內軟，而且咖哩味香濃，吃下去只有少許辣味，怕辣的朋友也可以一試！

青檸梳打 $32

鹹梅梳打 $32

　　飲品方面，大家必試青檸梳打和鹹梅梳打，杯杯真材實料！而且邊食邊飲一邊飲清爽的梳打水，真是爽到震啊！

　　餐廳內窗明几淨，讓人感覺舒服悠閒。

越滿

地址：旺角洗衣街111號地下

　　香港地，一講起做飲食業，無論經營者或食客，皆多唉聲嘆氣。前者呻人工材料舖租樣樣貴，根本冇得做；後者呢，同樣呻樣樣加價服務差劣點解唔北上？

　　究竟這個是否真像？我肥碌觀察，中咗八成左右啦。剩返兩成，並非如此，反見有食肆日日排長龍兼訂位要三個月至半年！

　　隨便舉例，灣仔浙江軒，樂富海鱻城，以及，近日家中「排骨仔」介紹為父的生煎包點心專門店，全部旺到爆。

　　香港人口高速老化， 六十歲以上長者邁向三百萬 ，佢哋喜歡乜？十之七八喜歡「懷緬過去常陶醉」。就似小弟，搞親飯局，個個老友都話最好歎懷舊菜，愈舊愈好，若搵到已經消失的菜式更佳。

　　前排在九龍家全七福，正正試到瀕臨絕種的雞子戈渣，難做到飛起，長者為食鬼一入口，便話真係神仙企唔穩。

　　好嘞，更多兩蚊雞族鍾情的，當然是飲廣東茶，歎其一盅兩件。不過咁，隨著樣樣成本高漲，不少「飽肚」點心，漸趨消失。經營飲食業老友呻：「碌Sir，你估我哋想咩，若個個嚟整個雞球大包、臘腸卷又或懷舊糯米雞，一塞就飽，拍拍屁股走人，咁我哋賺乜呀？」

　　唔係冇人想食，係形勢所逼，唔賣！

　　講返間生煎包專門店，有乜咁吸引，要排隊？第一，客人如潮，故點心流轉快，全部新鮮出爐；第二，價錢平民化；第三，最重要，不少流失了的點心，呢處有。例如：懷舊雞球大包、鮮蝦腐皮卷、豬膶腸粉、乾蒸牛肉燒賣、梅菜扣肉包⋯⋯

久違了的豬膶拉腸粉、雞球大包及乾蒸牛肉。

　　而此店招牌，正正是生煎包，非常誇張，每份三大個，只賣三十蚊，幾乎枱枱食。分量好勁，你吞一個，必飽咗大半！

招牌生煎包$30 ，三大隻，吞一隻已經半飽。

　　是日，我只與老婆大人兩位殺去，盡量叫，食唔晒打包，也只能點六款點心，已經「肚滿腸肥」。去時為上午十一點，仍然人潮如湧，有的是一家大細，有的是師奶買完餸，也有的是提早午餐勞動工友，迫爆，從冇一張空櫈。

整個上午座無虛席。門外則有條小人龍。

　　嚟呢類食肆，絕不可要求食得寧靜、坐得舒服、事事衛生、招呼週到。

　　總之，未來前清楚自己要乜，有位就即坐低即劃點心紙。點心上枱快歎（因人人都趕），你點好意思細嚼？套用廣東術語——唔該o趙完鬆，俾位下個客。

　　總結，點心新鮮熱辣好味，Value For Money，旺得有理。

蝦餃、潮州粉果及雞紥等例牌點心也「靚仔」。

　　但最大弊端，店內冇洗手間，要出街市公廁，真真大鑊，因呢個公廁，也百份百「懷舊」，五六十年代裝修及味道有齊，好惡頂也。

食一半，打包一半，埋單拜拜。

生煎包點心專門店

地址：何文田忠孝街六十號愛民邨熟食店一號

電話：2363 1968