吃喝玩樂

　　　　「平民美食」車仔麵從來都是百吃不厭，一碗麵由湯底、配料至麵條種類任你揀，可以一次過可以食勻多種心水配料，而且價錢便宜，多年來深得港人歡心亦不無道理。今次編輯部 best pick 5 大心水車仔麵推介，由車仔麵名牌平食五個餸、紅磡長龍店鮮甜花甲麵，至熟食中心最正的鮮牛雜加煎魚餅麵，帶大家食勻港九新界最好吃的車仔麵。

車仔麵推介 01｜蒙麵︰紅磡人氣店！心機製作車仔麵

　　位於紅磡的蒙麵是區內人氣車仔麵店，未開門已經開始大排長龍屬常事，最誇張更要等上約一小時才能吃到這碗麵。如此受歡迎，全因小店標榜真材實料，像招牌番茄薯仔湯底用足十幾斤的番茄、薯仔熬成湯頭，清甜超足料，飲起來更有住家湯的味道，令人一滴都不想浪費。小店供應超過 40 款配菜，由豬紅、蘿蔔、牛筋、雞翼尖至坊間少見的蠔仔煎蛋、脆香多春魚、豉汁鳳爪都有，當中必點新鮮花甲，由店主逐隻揀選，包保厚肉、分量多，而且味道鮮甜兼無沙，最能俘虜一眾食客！值得一試的還有自家製的蜜汁叉燒串，用上肥瘦均勻的梅肉即叫即燒，再配上香甜蜜汁，入口超惹味。

蒙麵

地址︰紅磡差館里 9-15 號協輝大廈地下1號舖

電話︰2363 8166

營業時間︰1pm-9:30pm

網址︰www.facebook.com/people/%E8%92%99%E9%BA%B5/100054196974472/

下一頁︰車仔麵界名牌！$42歎到五個餸

車仔麵推介 02｜麵尊︰車仔麵界名牌！$42歎到五個餸

　　開業超過 10 年的麵尊可說是車仔麵界名牌，當初憑住車仔麵配辣醬打響名堂，但不少人卻偏愛加入腩汁的豬骨湯，味道更濃甜些。店中的配料選擇多，除了基本的豬紅、豬大腸、蘿蔔、冬菇，也推薦他們的咖喱魷魚和蘿蔔，前者香辣惹味，後者則清甜無渣。若果選擇困難，不妨直接點個「大尊」，有齊豬紅、蘿蔔、咖喱魚蛋、紅腸、豬皮等亦不過 $42，相當抵食。

麵尊

地址︰上環蘇杭街 22-24 號 1 號舖

電話︰28510626

營業時間︰11am-5:30pm（星期日及公眾假期休息）

網址︰www.facebook.com/noodlesupremes/

下一頁︰車仔檔起家！必試鮮牛雜+自家製煎魚餅

車仔麵推介 03｜九記牛什粉麵︰車仔檔起家！必試鮮牛雜+自家製煎魚餅

　　鵝頸街市熟食中心向來是美食集中地，除了清真惠記的咖哩牛腩飯，由車仔檔起家的九記牛什粉麵同樣在區內薄有名氣。必試他們的新鮮牛雜，牛肚軟腍入味，牛肺夠爽滑，加上牛腸、牛膀最滿足。另外，煎魚餅也是熱賣配料，鯪魚肉全是自家製作，難怪零舍鮮香彈牙。

九記牛什粉麵

地址︰灣仔寶靈頓道21號鵝頸街市1樓鵝頸熟食中心8號舖

電話︰2988 8960

營業時間︰7am-4pm‧（星期日休息）

下一頁︰銅鑼灣老字號！主打招牌濃郁腩汁湯

車仔麵推介 04｜榮記粉麵︰銅鑼灣老字號！主打招牌濃郁腩汁湯

　　屹立銅鑼灣多年的榮記粉麵，主打招牌腩汁湯底車仔麵，最正是入口香甜濃郁，而且配搭的粉麵都有掛湯效果，令人吃得滋味。配餸則有逾 20 款選擇，必點店內名物雞翼尖，吃起來嫩滑超入味。只是榮記對下單設不少限制，例如每碗麵只可選 5 款餸，淨餸最多又限點 6 款，之後不能加單等等，大家下單前要留意。

榮記粉麵

地址︰銅鑼灣糖街 27 號 A 地下

電話︰2808 2877

營業時間︰11:30am-10pm

下一頁︰配料款式多！湯底用老雞、藥材熬足3小時

車仔麵推介 05｜永年士多︰配料款式多！湯底用老雞、藥材熬足3小時

　　有超過 50 年歷史的永年士多出名配料款式多，而且全部以不同方法調製，想試勻不同配料的，推薦「大碗麵」包含蘿蔔、豬紅、豬皮、雞翼、魷魚等 10 款配料，光想已覺得超豐富！有別於其他車仔麵店，永年的湯底特別用了豬筒骨、老雞、果皮及多種藥材，每日熬煮 3 小時而成，絕對是清香味濃。

永年士多

地址︰元朗教育路 88 號寶城洋樓地舖 2-4 號

電話︰2477 3816

營業時間︰11:30am-10pm

網址︰www.facebook.com/wingninyl

　　香港地，一講起做飲食業，無論經營者或食客，皆多唉聲嘆氣。前者呻人工材料舖租樣樣貴，根本冇得做；後者呢，同樣呻樣樣加價服務差劣點解唔北上？

　　究竟這個是否真像？我肥碌觀察，中咗八成左右啦。剩返兩成，並非如此，反見有食肆日日排長龍兼訂位要三個月至半年！

　　隨便舉例，灣仔浙江軒，樂富海鱻城，以及，近日家中「排骨仔」介紹為父的生煎包點心專門店，全部旺到爆。

　　香港人口高速老化， 六十歲以上長者邁向三百萬 ，佢哋喜歡乜？十之七八喜歡「懷緬過去常陶醉」。就似小弟，搞親飯局，個個老友都話最好歎懷舊菜，愈舊愈好，若搵到已經消失的菜式更佳。

　　前排在九龍家全七福，正正試到瀕臨絕種的雞子戈渣，難做到飛起，長者為食鬼一入口，便話真係神仙企唔穩。

　　好嘞，更多兩蚊雞族鍾情的，當然是飲廣東茶，歎其一盅兩件。不過咁，隨著樣樣成本高漲，不少「飽肚」點心，漸趨消失。經營飲食業老友呻：「碌Sir，你估我哋想咩，若個個嚟整個雞球大包、臘腸卷又或懷舊糯米雞，一塞就飽，拍拍屁股走人，咁我哋賺乜呀？」

　　唔係冇人想食，係形勢所逼，唔賣！

　　講返間生煎包專門店，有乜咁吸引，要排隊？第一，客人如潮，故點心流轉快，全部新鮮出爐；第二，價錢平民化；第三，最重要，不少流失了的點心，呢處有。例如：懷舊雞球大包、鮮蝦腐皮卷、豬膶腸粉、乾蒸牛肉燒賣、梅菜扣肉包⋯⋯

久違了的豬膶拉腸粉、雞球大包及乾蒸牛肉。

　　而此店招牌，正正是生煎包，非常誇張，每份三大個，只賣三十蚊，幾乎枱枱食。分量好勁，你吞一個，必飽咗大半！

招牌生煎包$30 ，三大隻，吞一隻已經半飽。

　　是日，我只與老婆大人兩位殺去，盡量叫，食唔晒打包，也只能點六款點心，已經「肚滿腸肥」。去時為上午十一點，仍然人潮如湧，有的是一家大細，有的是師奶買完餸，也有的是提早午餐勞動工友，迫爆，從冇一張空櫈。

整個上午座無虛席。門外則有條小人龍。

　　嚟呢類食肆，絕不可要求食得寧靜、坐得舒服、事事衛生、招呼週到。

　　總之，未來前清楚自己要乜，有位就即坐低即劃點心紙。點心上枱快歎（因人人都趕），你點好意思細嚼？套用廣東術語——唔該o趙完鬆，俾位下個客。

　　總結，點心新鮮熱辣好味，Value For Money，旺得有理。

蝦餃、潮州粉果及雞紥等例牌點心也「靚仔」。

　　但最大弊端，店內冇洗手間，要出街市公廁，真真大鑊，因呢個公廁，也百份百「懷舊」，五六十年代裝修及味道有齊，好惡頂也。

食一半，打包一半，埋單拜拜。

生煎包點心專門店

地址：何文田忠孝街六十號愛民邨熟食店一號

電話：2363 1968