夥Anson Lo欣宜拍廣告 杜琪峯自認「新仔」放笑彈
【晴報專訊】名導杜琪峯（杜Sir）、鄭欣宜及MIRROR成員盧瀚霆（Anson Lo）昨日出席信用卡廣告活動，平日在片場呼風喚雨的杜Sir，執導逾40年以來首次拍廣告，他即搞笑自稱廣告新丁；當杜Sir得知Anson忙綵排個唱而病倒，竟教唆Anson︰「叫其他兄弟幫你頂嘛！」
首度與杜琪峯（中）合作拍廣告，Anson Lo和欣宜表現戰戰兢兢。
杜琪峯在廣告中與鄭欣宜有較多對手戲，杜Sir表現生動搞鬼，與平時嚴肅的他判若兩人。問杜Sir如何評價自己演出？他笑說：「我係新仔咋，Anson同欣宜比我仲醒目。」他大讚做演員較做導演舒服：「入行40幾年未試過喺片場咁開心、咁無負擔同咁享受，如果將來有人邀請，我都會繼續拍。」欣宜笑言有幸奪得杜Sir「處男作」非常緊張又開心；而Anson Lo表示杜Sir氣場太勁，對方一到片場，全場立即肅靜。
杜琪峯在廣告中難得演戲，跟平時cool爆形象不同。
提到MIRROR明晚開演唱會，杜Sir表示「可能去裝下」，Anson聞言開心說：「杜Sir嚟裝下，我哋已經好開心喇！」Anson昨日一臉倦容，原來他忙於綵排而有點「作病」不適，杜Sir即「提議」︰「你哋十幾個人，唱得唔好無人知㗎，驚咩呀？唔得咪叫啲兄弟頂一頂囉。」
欣宜跳爆盲腸炎傷口
至於早前入院做切除盲腸手術的欣宜，被Anson踢爆拍廣告時跳舞整爆傷口，欣宜說：「我見Anson跳得咁落力，我點可以輸呀，依家好番啦！」杜Sir插嘴表示︰「你咁年輕，爆完再爆都仲得！」另外，提到港大感染及傳染病中心總監何栢良建議政府，邀請姜濤呼籲市民打新冠疫苗，姜濤經理人花姐（黃慧君）表示未收到相關人士接洽，她透露曾與姜濤討論注射疫苗問題，因姜濤父母年紀大，而姜濤工作上又要接觸不同人士，但仍未決定會否接種。