世事政情

　　【晴報專訊】無綫劇集《智能愛人》前晚播出的第22集中，葉凱茵飾演的虎媽因逼死愛兒，獲老公找來AI機械小孩當「愛的替身」，劇情竟與19年ViuTV劇集《理想國》幾乎一樣，而兩劇的監製及編審同樣是資深電視人陳翹英。陳翹英昨日回應《晴報》稱︰「《智能》30集只得一段相同，其他大部分都係原創！」

　　有網民發現《智能愛人》前晚的情節，與19年《理想國》其中一個單元《苟延殘喘》九成九相似，都是講述一位母親逼兒子讀書，令兒子不堪壓力自殺，而父親則訂了與兒子一模一樣的AI小孩，撫平太太痛失愛兒的傷痛。《理想國》由吳綺莉飾演虎媽，《智能愛人》則由葉凱茵演繹母親一角，但兩部劇竟同樣由小演員徐嘉謙飾演兒子；加上兩部劇集的監製兼編審同樣是陳翹英，不少網民質疑他將劇情「循環再用」，有自己抄自己之嫌。對於被指「明抄」舊作，陳翹英解釋只是向美國著名導演史提芬史匹堡致敬︰「因為佢嘅舊戲《A.I.人工智能》係第一代拍AI智能機械人！（劇情係自己向自己致敬？）梗係無，主要係向史匹堡致敬，只係《智能愛人》30集入面得呢段有同一個劇情，其他大部分都係原創。」

去年拍攝《智能愛人》的徐嘉謙，對比《理想國》時已長大不少。(網上截圖)

讚童星好戲角色重要

陳翹英（右）認為《智能愛人》收視可更進一步。

　　不過，陳翹英坦承相隔兩年後再找徐嘉謙演兒子有原因︰「呢個童星啲戲好好，所以再搵佢，雖然佢係小朋友，但佢係最先進機械人，角色重要，嚟緊會領導智能人叛變！」另外，問及《智能愛人》上周平均收視僅得19點，他直認未如人意︰「平時起碼有22點以上，奧運後觀眾要適應，呢個係大環境問題，無辦法，好彩外界評價都好好。呢個星期泰臣同麥美恩嗰段戲有驚喜，Ali（李佳芯）演得好亦有目共睹。」他更預告下周的結局篇︰「主要會交代陸永同Ali嘅感情，編劇花咗好多心機。（Ali黑化殺人？）唔會，佢會控制邪念。結局將會好感人亦意想不到，希望下周六大結局收視衝上20幾點！」

李佳芯飾演的AI「阿寶」黑化後眼神恐怖。(網上截圖)

　　【晴報專訊】入行逾20年的陸永，由音樂組合農夫轉戰無綫擔任主持及拍劇，早前同時有《智能愛人》與《七公主》在熱播，在《智》劇中更首次孭飛做男一，角色充滿喜感，然而陸永卻謙稱其搞笑演技有待進步，就連對獎項亦無慾無求，39歲的他竟自嘲，「我中年㗎喇，仲恨咩啫！」

　　當年陸永與鄭詩君（C君）以音樂組合農夫入行，二人同樣富創意又鬼馬，加入無綫後獲得不少演出機會，C君日前更獲欽點擔任無綫J2台創意總監一職，如今兩人在圈中都能獨當一面；而陸永在《智》劇中亦發揮出超水準，與視后李佳芯飾演的機械人譜出浪漫愛情，但又不失搞笑，「都算係開正我嗰範，好切合我喺大家心目中嘅形象，總之縮骨、古惑、貪少便宜、衰格嗰啲實係搵我演，都係我演開嗰啲，唔係就唔會搵我。」

盼有周星馳副身家

　　大部分演員都希望挑戰不同角色，若果被角色定型，將來在演藝路上就很難有突破，但陸永卻恰巧相反，希望朝住笑匠之路進發。「如果監製想發掘我另一面演技，我覺得未需要住，因為我搞笑呢方面都未做得好，就算係好笑，都未去到好好笑，唔係想突破，而係想進步同鞏固個演技，即係你有幾搞笑啫？你唔使突破住，人哋都未真係覺得你好搞笑。」

陸永十分欣賞棟篤笑始祖黃子華，更以對方為目標。

　　不覺得自己搞笑？「唔係太搞笑囉，可以接受，可以再做好啲！我心目中最搞笑嘅藝人係周星馳、黃子華，我絕對想做到有佢哋嘅『身家』，但唔係想去到嗰個地位，每個人嘅地位係屬於嗰個人嘅，無嘢係一樣嘅，就算同佢身家一模一樣，你都唔係佢個地位，佢有好多樣嘢去組成佢個地位，但身家易諗，一個數字咋嘛。」

觀眾喜歡便是肯定

陸永和李佳芯在剛播畢的劇集《智能愛人》中大團圓結局。（電視截圖）

　　做男主角壓力好大？「完全無，我唔會因為做咗個咩角色就有壓力，但如果自己演得唔好，就算做男配角都有壓力，唔使做主角㗎，衰就衰㗎啦！亦都唔會話做男主角先特登努力，唔會㗎嘛！」幸運地在劇中飾演男一，而且觀眾口碑不俗，陸永對獎項可有憧憬？他想也不想便說，「完全無啦，獎項唔係目標，原本已經唔係為咗男一所以拍劇，拍劇亦都唔係攞視帝，畀我都奇怪啦！」不少演員都恨攞獎獲肯定，但陸永卻不在乎，「如果想畀人肯定，觀眾睇完話鍾意咪肯定囉，唔使一定要獎項，我過咗需要呢種肯定嘅年齡，我中年㗎喇，仲恨咩啫，唔需要呢啲。」

農夫和鄭裕玲合作無間，三人主持的節目曾在台慶頒獎禮獲「最佳節目主持」。

　　平時做節目經常牙擦擦，但陸永講到工作時就變得戰戰競競，「我唔係對自己無信心，而係唔好太自滿啫，有無人讚過我？有，Do姐鄭裕玲成日都讚我同C君㗎啦，佢淨係喺鏡頭前踩我哋，背後就讚我哋，呢啲先係最好嘅前輩。」

暖男爸爸陸永視兩位寶貝女為掌上明珠。