世事政情

　　【晴報專訊】Netflix劇集《魷魚遊戲》全球熱播，有網民熱議港版演員名單，其中譚俊彥（Shaun）被指與男主角李政宰撞樣。Shaun昨日錄影節目時表示，最近經常被叫「456」（李政宰劇中名字），讓他大感尷尬，自己亦不想再抽對方水，但他直言希望《魷魚》熱潮能為新劇起正面的宣傳作用。

Shaun自言要跟煒哥學習烹調中菜技巧。

　　李家鼎、蕭秀香（三姐）、陳煒（煒哥）和譚俊彥昨日錄影節目《教煮爭霸》，對於被指與《魷魚遊戲》男主角、韓國影帝李政宰撞樣，Shaun表示︰「其實好耐之前我都有睇過對方拍嘅劇集，一直覺得對方演任何角色都好有功力，係我嘅學習對象。依家公司好多同事都叫我『456』，其實有時都覺得尷尬，又唔可以唔睬佢哋，但套劇始終唔係自己拍，我都要尊重番呢位演員，免得一直被人話我抽水。」不過Shaun直言，他主演的台慶劇《換命真相》即將播出，希望能受惠於《魷魚遊戲》的撞樣效應，提高收視。

Shaun早前與被指似「123木頭公仔」的炎明熹，重現《魷魚遊戲》場景。

李政宰

想跟陳煒學廚

　　另外，Shaun和煒哥將在《教煮》中一較廚藝，Shaun表示每天都會下廚︰「老婆都話好食，但我覺得自己仲要跟煒哥學習。今次會煮大頭蝦柚子沙律，對減肥有幫助；我多數會親自煮營養餐，因為食雞胸食到頂唔順，惟有用自己嘅方法，去煮一啲好食又可以減肥嘅菜式。」

　　至於廚藝精湛的煒哥，同樣謙稱少煮西餐，所以今次是來學習。煒哥透露男友喜歡食海鮮，因此自己會多煮海鮮的菜式；她又認為烹飪千變萬化，下廚的人一定要花心思，吃的人才會開心。

　　改編自韓國超人氣同名浪漫愛情喜劇的ViuTV劇集《社內相親》現正播出，劇中歐陽偉豪（Ben Sir）及盧覓雪飾演孫賀利Hollie（陳漢娜 飾）的父母，經營茶餐廳。兩人第一次合作已經演夫妻，直言「一拍即合」，相處好舒服。

　　雪雪笑言：「我哋劇入面係老夫老妻，可以有咩火花？有漢娜咁大個女，感覺好啱我哋呢個年紀，好似相處咗廿幾年，好有默契，相處好舒服。」Ben Sir指相處舒服是建基於兩人背景相近，「係同一個層次，唔使去就，一拍即合，唔使特登去夾。」

　　Ben Sir拍劇經驗不算多，今次他演爸爸，角色好內歛，由老婆做主導：「我同阿女相處唔多，無乜單獨戲份，劇中我係虧欠咗佢，叫佢去借錢支持舖頭生意。到後尾Timo（盧瀚霆 飾）嚟提親，我嗰時嗰刻先爆出嚟，講晒我點虧欠佢，唔畀佢學琴，唔畀佢玩藝術，要佢出嚟做嘢。」Ben Sir更指要用三、四段對白交代自己對囡囡的感情，相當考演技，「導演係咁叫我講慢啲，唔係做主持。」

　　雪雪就指自己雖然未結婚，又冇仔女，但都有子侄，所以都好容易投入角色：「對住子侄都會投入愛、關懷同耐性，仲係兩隻貓嘅媽咪，將呢個關係投射喺劇入面，有晒實踐經驗。」

　　問到有沒有睇番原著參考，兩人異口同聲表示「無睇晒」，雪雪就爆睇韓劇經常中伏：「無睇晒，最緊要感受點解呢套劇咁成功，唔打算模仿同抄襲。本身頂唔順韓劇，為咗拍套劇睇咗一集半，拎到個感覺就停手。本身頂唔順韓劇，以前睇到劇集嘅節奏同橋段直情暈低，近年會好啲，好多人叫我睇一啲韓劇一定要睇，不過我都經常中伏，無咁中伏已經係《魷魚遊戲》。我鍾意睇歐美劇多啲。」

　　Ben Sir與雪雪都沒有子女，不過兩人都認為做父母好艱難。雪雪表示：「呢十幾年社會變化好大，年輕人同長輩的關係好複離。如果我而家有個十幾歲嘅仔，我都未必識教。幸好現實生活唔使經歷，喺套劇經歷完做父母嘅煩惱已經夠。」Ben Sir就指：「呢套劇寫到個家庭好溫馨好幸福，不過都有反映一啲家庭問題，父母對子女虧欠、孩子頂撞父母…每個世代都有家庭矛盾。從呢套劇都感受到孩子同父母嘅代溝，問題係要點順滑佢。」