世事政情

　　《萬千星輝頒獎典禮2023》日前於澳門舉行，首先頒發「最佳男、女配角」，今個月37歲生日嘅高海寧當旺，成功憑《新聞女王》Cathy許詩晴一角，撼贏另一大熱傅嘉莉（Kelly）奪得「最佳女配角」。另一個獎項「飛躍進步女藝人」傅嘉莉同樣輸畀另一對手劉穎鏇，傅嘉莉食白果之後沉默咗一日，前日終於開post，不過佢表示自己唔開心嘅係另一樣嘢。

　　傅嘉莉發長文，多謝大家對佢嘅幫助同肯定，留言：「沉澱，修正，再重新出發。在演員道路上並不容易，但路途每一個經歷，每一個感受，也是一個財富。衷心感謝所有，所有支持我投票给我的你們，無論高山低谷，有你們的愛，令到我在路途上並不孤單。我會繼續努力把每頁黑白的文字，每個大小人物的角色，演活出來，感動你心。再次恭喜所有各得獎者，真切明白每個獎項背後所付出的努力和堅持，期待與每一位優秀演員的合作。」

其實都好睇！

　　佢又特別多謝鍾澍佳總監制：「雖然昨晚未能在台上多謝你，但我由心真的感謝您對我嘅信任，支持和鼓勵，感謝給我參演《香港人在北京》給我Funny這麼好的角色，令觀眾可以看到完全不一樣的傅嘉莉。」

　　傅嘉莉全晚齋坐食白果，但佢就話自己唔開心嘅唔係冇獎，係另一件事：「的確有點不開心的是，昨天的整體造型，我不太滿意，力求完美的我，為了今次的頒獎典禮，真的花了很多時間和心思在造型的細節上。」不過佢又好矛盾地多謝佢嘅婚紗贊助：「悉心為我挑選這條裙我一向也不太喜歡閃石的款式，但這條Joli Poli beaded mermaid gown，真的顛覆咗我對閃石款式的認知，不論材質，手工，剪裁可以說是極致。完美地修飾和展現女性嘅身形，再配襯Joli Poli Ruffle train 裙尾，真的好夢幻，好像在夢境裏呈現的裙子，非常感謝，令我昨晚可以那麼美出席活動。2024萬千星輝頒獎禮，i’ll be back!」

　　一邊大讚又一邊話唔滿意，傅嘉莉除咗有tag到婚紗贊助之外，亦有tag當晚嘅兩位髮型師；不過佢就冇tag到當晚化妝師，未知佢係咪不滿當晚妝容，抑或當晚係自己化妝；亦唔知佢係咪只係單單不滿整體唔合襯。雖然失獎，但傅嘉莉都有大量fans安慰，網民都表示佢已經係大家心目中最佳女配角，都大讚佢造型似仙女：「如果頭髮放下來，更有女人味，但你已經很漂亮了！。」

　　傅嘉莉（Kelly）近日在社交平台分享自己的可怕經歷，竟然在港鐵站踩到人類的便便，大部分都會自認「倒霉」，不過Kelly的正面思維似乎認為是「大獎」，所以走去買六合彩試試自己的彩數，結果所謂的「狗屎運」原來是假的...

　　Kelly去年憑《香港人在北京》的「火雞姐」造型角色而深入民心，更一度以大熱姿態入圍《萬千星輝頒獎典禮》的「最佳女配角」，雖然最終未能得獎，不過Kelly繼續默默努力接劇，希望透過作品得到大家的認同。Kelly近日在IG分享神奇的經歷，她留言說：「你們有沒有想過有一天會在地鐵站內踩到人類嘅（便便Emoji），我昨天就經歷了，深深充滿每一條鞋縫底。」她更開放留言區問大家：「如果你是我，你的反應是...」

　　未知是否太多人留言鼓勵Kelly，她轉頭就用手機程式買六合彩，可惜的是她說：「我只有和（便便Emoji）的緣份，和六合彩...唉...」雖然又踩屎又唔中六合彩，不過Kelly就「中寶」另一樣嘢。原來早前鍾澍佳宣布準備開拍的劇集《刑偵12》將會易角，跟早前網上流傳的預告版本不同，除了仍然是林保怡擔任男主角之外，原來的馬國明和陳煒則換上張振朗和傅嘉莉，見到Kelly都有轉發消息，似乎開拍的陣容已經屬實，亦代表Kelly將會是今次劇集的女主角，認真可喜可賀。