世事政情

　　立法會依家就好似開咗幾個爐大家喺度BBQ。第一個爐就當然係一地兩檢。上星期三（18日）就因為政府要確保呢個星期期嘅一地兩檢無約束力議案能夠順利開展討論同一個會能夠埋尾，結果就夾硬抽起涉及民生、講咗一半嘅辣招議案（休會待續）。呢個做法雖然係合法，但真係不合情、不合理。休會待續議案畀泛民全體反對之外，其實唔少建制派口同手都係贊成政府抽起，但私底下都有唔少人話政府今次咁唔跟規矩做嘢，的確令到佢地好難做。最終政府今次咁做，引發泛民喺第一次「正式會議」就已經瘋狂拉布，一唔夠人喺會議廳就點人數，估計呢個做法會一直延續落去。

　　第二個爐頭當然就係修改議事規則。建制派喺第二批泛民被DQ之後，第一時間就已經部署要修改議事規則對抗拉布；第一波就喺財務委員會，第二批亦計劃做埋立法會大會。雖然Tina都認為議事規則入面的確有好多規則係埋下拉布嘅伏線，亦的確有議員會利用呢啲漏洞去拉布，浪費成個社會嘅資源同時間；但霸王硬上弓引發嘅後果係難以想像，據聞泛民經過連日商議之下，計劃作出全面抗爭，日後所有大會，只要議事庭唔夠人數，就會瘋狂點人，以過往要建制派全日坐定定喺會議廳開會都難過登天嘅情況下，日後流會好可能會成為新常態。至於財委會，今日開會泛民已經輪流開炮，以後泛民亦可能會喺財委會盡可能用餘下嘅方式去施延會議時間，包括做足功課喺會議提問，單單係咁都足夠令政府頭痕。

　　林鄭上場拋出大和解論，和風的確係吹過一浸，但其實經過上星期公布完施政報告之後，和風可以話一去無回頭。時夕金秋，但換嚟嘅唔係秋風送爽，而係強風凜凜，包括一地兩檢以至修改議事規則；而政壇早陣子的和風，亦已被吹倒了！

　　有媒體日前刊登咗一篇政壇花絮，話今屆立法會同政府關係非常良好，甚至有議席出缺，對立法會運作都完全無影響，議員「多一個都唔多」；更加借住呢個議題，指明年年底立法會選舉可能會大換血，估計有三分一現任議員離任，包括「自然流失」，如資深議員因年齡、黨內交棒退下火線，亦有議員涉及表現等不同因素。文章仲點名三位議員：謝偉俊、蘇長榮同林素蔚。

　　文章一出，立即喺政壇瘋傳。被指「太有個性」、喺現屆議會之中「格格不入」嘅謝偉俊，議會經驗豐富，亦都算得上係稱職嘅議員，對於文章所講，佢四兩撥千斤咁回應一句：「係咪格格都入就好呢？」絕對睇得出佢爐火純青嘅程度。至於蘇同林就被指表現欠佳，兩人都已經親自向其他媒體解釋，Tina都不再詳述。

　　不過呢篇文章亦帶出一個問題，就係來年會有幾多人冧莊繼續做落去呢？Tina亦借機會向多位議員打聽，佢哋有一個睇法係幾一致嘅，就係文章所講嘅「三分一無得連任」應該都係太保守，估計數字遠超三分一。其中一位資深議員分析，香港面臨新形勢、新局面，係極需要新思維，一批舊議員（佢自己都話可能包括佢自己）其實都好可能功成身退，讓路畀新人，將朝氣帶入議會。

有政圈中人認為，香港面臨新形勢、新局面，議會極需要新思維。(iStock)

　　嗰個資深議員仲認為，的確有部分議員喺議會工作上嘅表現同各方期望有落差，特別係部分選委界別議員，「不過又好難怪佢哋，依家每個議題，每個黨都會有固定發言人，涉及一啲行業嘅嘢又有功能組別議員去睇住，選委會界別議員要出位唔容易，太過進取敢言又好易講錯說話，所以唯一敢言嘅江玉歡可以跑得出，市民對佢嘅認知度相信亦係最高，但其他議員要出位真係好困難，做唔到成績，某程度上亦都係『制度』問題。」

　　另一位議員就指出，有部分議員都係當日「臨危受命」上陣參選，本身佢哋工作或者業務就已經繁重，本來對政治地位都無乜特別要求，但要佢哋兼顧咁多議會工作，確實令到佢哋左右做人難，「有唔少議員都私下抱怨，如果要做到『高層』所要求嘅KPI，喺議會要花上唔少時間，呢個係佢哋事先無估計到，所以最少十個八個現任議員都會係因為呢個原因而喺下屆拜拜，如果連同新丁加入競爭，三分一離任實在係太保守！」