世事政情

　　特首林鄭月娥昨日（10日）公布佢任內第二份施政報告，焦點亦如公布前一樣，大都落在土地供應身上，特別係林鄭將「東大嶼填海」正式擺上枱傾，填海規模更加由《2030+》報告一路以來提出嘅1000公頃升到上1700公頃，同「華華」（董建華、劉德華）支持嘅2200公頃非常接近。

　　更更更重要嘅數字係，政府預計成單工程埋單5000億銀，以政府工程「優良」往績計算，1萬億就可能誇張啲，但8000億應該都無走雞，單單係呢個數字，已經令到唔少港人產生一個錯覺，就係填海，即係等於倒錢落海，而剛剛我地又係有1萬億咁上下儲備存咗喺政府個戶口到，花光花淨就成為泛民嘅最好攻擊目標。

　　但實際嘅情況又係唔係咁？Tina只係一名小女子，唔識得咩土地供應咁大嘅題目，但只要平時喺香港細心觀察就發覺，當將軍澳發展得七七八八之後，香港真係好缺乏一個可以大規模發展嘅地方去滿足未來嘅人口增長。當然，會有人話新界大把棕地可以用唔使填海，無錯棕地的確係其中一個選項，但現時發展緊嘅兩個較大型棕地項目-洪水橋同元朗南，講緊嘅亦不過係700公頃地唔夠，提供8萬幾個單位咁大把，實在係難以應付未來嘅土地需求。

　　可以做大規模發展嘅地皮真係買少見少，政府要喺未來提供足夠土地，填海造地可以話係唯一選項，而揀喺邊度填亦唔算多選擇，單單係之前提過喺馬料水填多些少，當區嘅建制區議員就群起反對，你話放喺林鄭枱面嘅菜單又真係有幾多款餸可以揀？

　　5000億好、8000億也好，數字都係驚人，但攤開10幾20年發展，再加上發展期間帶動嘅經濟活動、發展完成後賣地收入等等，其實可以填返唔少數目，倒錢落海之說實在係言過其實，呢個批評亦對林鄭唔公平。雖然Tina係支持填海造地，但有一樣嘢真係希望政府唔好一錯再錯，就係估算工程開支唔該你班高官估準少少，下下超支成倍畀港人嘅感覺先係倒錢落海，仲要係倒極都填唔晒！

　　香港基建發展大幅落後於新加坡，其中一個主要原因就是環保團體揪香港後腳，在興建港珠澳大橋時，環評報告話會影響生態，尤其是中華白海豚回流，搞咗一大輪，又經司法覆核，用多7、80億才通過，香港土地唔夠，要計劃興建明日大嶼，還未開始環保團體已經跑出來話此事決不可行，但我真係唔明白，新加坡有20％土地是填海得來，點解新加坡可以，香港不能。

　　在香港，要反對興建基建甚至一些事，只要搬出環保團體就有很大機會可以阻撓，不過，這些事都俱往矣，環保團體已經失去公信力，所以，將會有一段長時間偃旗息鼓，不會發表環評報告，最低限度要等日本停止排放核污水入太平洋。

　　在8月24日，日本不理會中國反對，將福島核污水排放入太平洋，為期30年，中國亦不理會日本反對，立刻禁止日本海產進口，要知道中國是日本海產出口第一大國，佔總出口22.5％，香港排第二，有19.5％，沒有中國以及香港的份額，日本的出口量就會大降，做成直接損失遠大於有效地處理核污水費用，如果沒有政治考量，日本在第一階段排放完畢之後，就會以觀察為理由而暫停排放，老實說，如果中國不是全禁日本海產，第二階段很快開始。

　　最奇怪的就是全世界環保團體沒有對日本排放核污水表達意見，沒有一份環評報告來支持或者反對日本排放核污水，其實，以排放核污水咁大件事，無論環保團體支持，反對或者不表達意見，都應該出一份環評報告，現在唔敢出，代表所有環保團體都失去公信力，綠色和平去了那裏。