世事政情

　　當大家仲喺度計緊自己可以喺新一年度財政預算案可以袋到幾多油水，又或者心裏暗罵交咗個波畀陳茂波、點知佢對住空門唔射仲要交返個波畀你之際，政府正醞釀緊一條幾有爭議性嘅法案修訂上台，就係逃犯條例。

　　有留意開新聞嘅讀者應該都注意到呢條法案修訂早已經喺立法會嘅保安事務委員會傾左，依家只係排緊上大會首二讀，再經法案委員會審議，就可以三讀通過成為法例。修訂逃犯條例之所以咁受爭議，就係本身香港回歸已經22年，但我地同祖國竟然仲未有任何移交逃犯嘅協議，連帶同屬「黃土」嘅澳門同台灣，一樣係「逍遙法外」；而成功修例之後，所有案件唔理你係咩地方，香港都可以case by case咁去處理，變相掃除咗一個22年都解決唔到嘅障礙。

　　一條咁嘅法案一掟出來，唔使睇都知正反兩派議員嘅反應係點，意見極為分明。反對派高舉人權嘅旗幟，擔心條例通過之後，祖國會用各種方式將一啲同佢政見不合嘅人捉返去內地受審；支持者就認為，香港同祖國血濃於水，但竟然連移交個逃犯都無法律依據，造成一個咁大嘅法律漏洞，唔堵塞又點講得過去呢？

　　其他地方呢？阿爺無出過聲，因為一單謀殺案而想引渡香港犯人返去嘅台灣，唔少當地政圈已經對香港修例表示反感，甚至有人提議就算條例通過咗，都唔應該提出移交逃犯，變相令到今次修例「白做」。而早幾日之前，連唔相干嘅美國政府都開聲，美國駐港總領事就話擔心修例會影響到香港同美國之間簽訂嘅一啲雙邊協議。

　　成件事依家嘅發展就由香港政府口中不涉政治、只係單純堵塞法律漏洞，發展到今時今日政治化到辣手過國歌法。由始至終，Tina都唔相信政府喺今次事件有咩特別政治任務，應該係單純去處理刑事漏洞，Tina亦唔相信，阿爺會依靠呢條法例去捉佢想捉嘅人，而香港仲起碼有法庭去把關，反對派口中嘅憂慮絕對係杞人憂天。

　　但隨住台灣同美國方面相繼咁樣表態，政府真係提交法案又唔係，唔提交又唔係，不過照情況發展，政府為咗「飛士」，點都一定會霸王硬上弓，儘早修訂法例，學陳茂波咁將個波拋畀台灣。係個波都好，最多一腳踢開，至怕今次呢個係計時炸彈，搞到美國重新審視《香港關係法》，咁全港700萬人攬住一齊爆。

　　有媒體日前刊登咗一篇政壇花絮，話今屆立法會同政府關係非常良好，甚至有議席出缺，對立法會運作都完全無影響，議員「多一個都唔多」；更加借住呢個議題，指明年年底立法會選舉可能會大換血，估計有三分一現任議員離任，包括「自然流失」，如資深議員因年齡、黨內交棒退下火線，亦有議員涉及表現等不同因素。文章仲點名三位議員：謝偉俊、蘇長榮同林素蔚。

　　文章一出，立即喺政壇瘋傳。被指「太有個性」、喺現屆議會之中「格格不入」嘅謝偉俊，議會經驗豐富，亦都算得上係稱職嘅議員，對於文章所講，佢四兩撥千斤咁回應一句：「係咪格格都入就好呢？」絕對睇得出佢爐火純青嘅程度。至於蘇同林就被指表現欠佳，兩人都已經親自向其他媒體解釋，Tina都不再詳述。

　　不過呢篇文章亦帶出一個問題，就係來年會有幾多人冧莊繼續做落去呢？Tina亦借機會向多位議員打聽，佢哋有一個睇法係幾一致嘅，就係文章所講嘅「三分一無得連任」應該都係太保守，估計數字遠超三分一。其中一位資深議員分析，香港面臨新形勢、新局面，係極需要新思維，一批舊議員（佢自己都話可能包括佢自己）其實都好可能功成身退，讓路畀新人，將朝氣帶入議會。

有政圈中人認為，香港面臨新形勢、新局面，議會極需要新思維。(iStock)

　　嗰個資深議員仲認為，的確有部分議員喺議會工作上嘅表現同各方期望有落差，特別係部分選委界別議員，「不過又好難怪佢哋，依家每個議題，每個黨都會有固定發言人，涉及一啲行業嘅嘢又有功能組別議員去睇住，選委會界別議員要出位唔容易，太過進取敢言又好易講錯說話，所以唯一敢言嘅江玉歡可以跑得出，市民對佢嘅認知度相信亦係最高，但其他議員要出位真係好困難，做唔到成績，某程度上亦都係『制度』問題。」

　　另一位議員就指出，有部分議員都係當日「臨危受命」上陣參選，本身佢哋工作或者業務就已經繁重，本來對政治地位都無乜特別要求，但要佢哋兼顧咁多議會工作，確實令到佢哋左右做人難，「有唔少議員都私下抱怨，如果要做到『高層』所要求嘅KPI，喺議會要花上唔少時間，呢個係佢哋事先無估計到，所以最少十個八個現任議員都會係因為呢個原因而喺下屆拜拜，如果連同新丁加入競爭，三分一離任實在係太保守！」