世事政情

　　萬眾期待又勞民傷財嘅150人「對話會」，噚日終於喺灣仔伊館搞得成。所謂150人對話，抽到發言嘅只係得30人，搞一場咁大龍鳳，一區之首只係聽到30個民意，Anyway，溝通對話，喺文明社會入面，始終都係有做好過無做。

　　相信好多人同Tina一樣，覺得成個對話會都係來來去去三幅被。先唔好提林鄭嘅立場如何，發言嘅市民之中，大部分批評警方使用過分暴力去對待示威者，亦有唔少明言要求成立獨立調查委員會。呢啲講法林鄭會唔知？林鄭能夠做得到嘅已經做咗，而林鄭嘅回應亦都同喺記者會上面回應記者提問如出一轍，了無新意。

　　咁今次對話又係唔係一啲得著都無？首先，我相信大部分讀者，無論係藍嘅係黃嘅應該都認同，有溝通好過無，今次對話會，肯定係作出一次理性溝通「第一步」嘅良好示範。之所以話係「第一步」，係因為要有「第二、第三步」，先收到最最最好嘅效果。

　　Tina認為，林鄭噚晚聽完市民嘅反對意見之後要急急做好嘅第二步，就係邀請所有出席者再一次出席一次深度對談，一來三分鐘發言的確係太少，難以概括講到咁多位出席市民表達嘅感受；二來，呢班唔多支持政府嘅市民好明顯都係和理非，政府要爭取支持嘅最大族群，而部分發言質素都幾高，亦幾能代表一批市民，無大台之下政府擺出誠意認真聽取呢班人嘅意見，和理非應該會受落。

　　第三步，林鄭要儘快就噚晚嘅對話，確實回應一啲訴求，作出輕微嘅讓步，咁畀到前線激進示威者睇到，溝通先係通往羅馬嘅大道，和理非先會再次考慮，係唔係應該畀社會平靜落嚟，係唔係再企硬支持激進示威；但如果林鄭仍然係意見接受態度依舊，咁激進示威者又會再諗，對話溝通嚟仲乜？結果又係跌入一個惡性循環，香港將萬劫不復。對話會呢個契機，林鄭真係要好好把握。

　　最後都想講埋，對話會入面，無一個市民嘅訴求係包括港獨，最近似嘅都係講「自治」。坦白講，林鄭嘅回應係令示威者失望嘅，連一句「喺中央政府承諾之下我們一向有高度自治」咁萬無一失嘅說話都唔肯講，只係畀反對者感到偏埋去中央一面，對解決困局毫無幫助。不過對話之中無乜港獨色彩，對政府而言係舒一口氣，起碼可以喺阿爺面前加返少少分，話唔定都係可以令阿爺肯讓少少步嘅契機！

　　有媒體日前刊登咗一篇政壇花絮，話今屆立法會同政府關係非常良好，甚至有議席出缺，對立法會運作都完全無影響，議員「多一個都唔多」；更加借住呢個議題，指明年年底立法會選舉可能會大換血，估計有三分一現任議員離任，包括「自然流失」，如資深議員因年齡、黨內交棒退下火線，亦有議員涉及表現等不同因素。文章仲點名三位議員：謝偉俊、蘇長榮同林素蔚。

　　文章一出，立即喺政壇瘋傳。被指「太有個性」、喺現屆議會之中「格格不入」嘅謝偉俊，議會經驗豐富，亦都算得上係稱職嘅議員，對於文章所講，佢四兩撥千斤咁回應一句：「係咪格格都入就好呢？」絕對睇得出佢爐火純青嘅程度。至於蘇同林就被指表現欠佳，兩人都已經親自向其他媒體解釋，Tina都不再詳述。

　　不過呢篇文章亦帶出一個問題，就係來年會有幾多人冧莊繼續做落去呢？Tina亦借機會向多位議員打聽，佢哋有一個睇法係幾一致嘅，就係文章所講嘅「三分一無得連任」應該都係太保守，估計數字遠超三分一。其中一位資深議員分析，香港面臨新形勢、新局面，係極需要新思維，一批舊議員（佢自己都話可能包括佢自己）其實都好可能功成身退，讓路畀新人，將朝氣帶入議會。

有政圈中人認為，香港面臨新形勢、新局面，議會極需要新思維。(iStock)

　　嗰個資深議員仲認為，的確有部分議員喺議會工作上嘅表現同各方期望有落差，特別係部分選委界別議員，「不過又好難怪佢哋，依家每個議題，每個黨都會有固定發言人，涉及一啲行業嘅嘢又有功能組別議員去睇住，選委會界別議員要出位唔容易，太過進取敢言又好易講錯說話，所以唯一敢言嘅江玉歡可以跑得出，市民對佢嘅認知度相信亦係最高，但其他議員要出位真係好困難，做唔到成績，某程度上亦都係『制度』問題。」

　　另一位議員就指出，有部分議員都係當日「臨危受命」上陣參選，本身佢哋工作或者業務就已經繁重，本來對政治地位都無乜特別要求，但要佢哋兼顧咁多議會工作，確實令到佢哋左右做人難，「有唔少議員都私下抱怨，如果要做到『高層』所要求嘅KPI，喺議會要花上唔少時間，呢個係佢哋事先無估計到，所以最少十個八個現任議員都會係因為呢個原因而喺下屆拜拜，如果連同新丁加入競爭，三分一離任實在係太保守！」