世事政情

       明日就係立法會復會，亦係特首林鄭月娥公布新一份施政報告嘅「大日子」。呢份喺催淚煙下完成嘅施政報告，可能係回歸咁多年以來，最少市民關心嘅一份施政報告。的而且確，而家嘅關注點嘅可能係林鄭可唔可以順利入到立法會宣布施政報告，多過施政報告內容本身。

      點解有呢個現象？經過近呢四個月嘅遊行、示威、抗議、動亂，市民對於林鄭政府能夠妥善「收局」已經無晒信心，更可況每年「行禮如儀」嘅施政報告，市民真係唔多關心派幾多糖、幫到幾多無殼蝸牛上到樓，我相信好多港人同Tina一樣，只係關心呢個政府究竟有無人有足夠智慧同能力去收拾呢個亂局。

      另外一個原因，香港經歷咁大傷害之後，市民亦唔相信現任政府係有足夠政治能量去治理好香港。更何況，政府好大程度係要靠立法會去支持佢地運作，而立法會內泛民嘅不合作運動，將會令到現屆政府半身癱瘓，估計林鄭嘅施政報告，都只係有形無實。

      立法會戰幔已經由財委會同內委會拉起，泛民透過鑽會議規則空子，喺兩個會嘅正副主席選舉打拉布，幾經辛苦，財委會最終都選咗陳健波「冧莊」做主席，但內委會仍然膠著狀態。Tina聽聞，其他事務委員會泛民已經無意同建制有任何合作討論，更唔會派人去選，大部分事務委員會正副主席預計都係建制派坐晒，只有福利事務委員會可能會由泛民坐到上台。泛民連傾都唔願意傾，擺明就係一副同建制派有你無我嘅格局，估計呢屆立法會最後一個立法年度，議會抗爭將會無日無之。

      喺咁嘅政治氣氛之下，政府唔似政府、議會唔似議會，點解特首仲可以當無事發生咁繼續宣讀佢嘅施政報告、繼續要求立法會開會？香港萬事嘅根源都係政治問題，一日唔解決呢個政治炸彈，市民一日都唔會有安寧平和嘅生活環境。

　　有媒體日前刊登咗一篇政壇花絮，話今屆立法會同政府關係非常良好，甚至有議席出缺，對立法會運作都完全無影響，議員「多一個都唔多」；更加借住呢個議題，指明年年底立法會選舉可能會大換血，估計有三分一現任議員離任，包括「自然流失」，如資深議員因年齡、黨內交棒退下火線，亦有議員涉及表現等不同因素。文章仲點名三位議員：謝偉俊、蘇長榮同林素蔚。

　　文章一出，立即喺政壇瘋傳。被指「太有個性」、喺現屆議會之中「格格不入」嘅謝偉俊，議會經驗豐富，亦都算得上係稱職嘅議員，對於文章所講，佢四兩撥千斤咁回應一句：「係咪格格都入就好呢？」絕對睇得出佢爐火純青嘅程度。至於蘇同林就被指表現欠佳，兩人都已經親自向其他媒體解釋，Tina都不再詳述。

　　不過呢篇文章亦帶出一個問題，就係來年會有幾多人冧莊繼續做落去呢？Tina亦借機會向多位議員打聽，佢哋有一個睇法係幾一致嘅，就係文章所講嘅「三分一無得連任」應該都係太保守，估計數字遠超三分一。其中一位資深議員分析，香港面臨新形勢、新局面，係極需要新思維，一批舊議員（佢自己都話可能包括佢自己）其實都好可能功成身退，讓路畀新人，將朝氣帶入議會。

有政圈中人認為，香港面臨新形勢、新局面，議會極需要新思維。(iStock)

　　嗰個資深議員仲認為，的確有部分議員喺議會工作上嘅表現同各方期望有落差，特別係部分選委界別議員，「不過又好難怪佢哋，依家每個議題，每個黨都會有固定發言人，涉及一啲行業嘅嘢又有功能組別議員去睇住，選委會界別議員要出位唔容易，太過進取敢言又好易講錯說話，所以唯一敢言嘅江玉歡可以跑得出，市民對佢嘅認知度相信亦係最高，但其他議員要出位真係好困難，做唔到成績，某程度上亦都係『制度』問題。」

　　另一位議員就指出，有部分議員都係當日「臨危受命」上陣參選，本身佢哋工作或者業務就已經繁重，本來對政治地位都無乜特別要求，但要佢哋兼顧咁多議會工作，確實令到佢哋左右做人難，「有唔少議員都私下抱怨，如果要做到『高層』所要求嘅KPI，喺議會要花上唔少時間，呢個係佢哋事先無估計到，所以最少十個八個現任議員都會係因為呢個原因而喺下屆拜拜，如果連同新丁加入競爭，三分一離任實在係太保守！」