世事政情

        政圈成個星期嘅話題，離不開《國安法》。人大上周四（28日）毫無懸念之下以大比數通過，正式獲授權進行香港《國安法》立法工作，預計最快6月底正式成為法例。

        人大呢個決定，亦正式將香港放入前所未有嘅國際高度。美國總統特朗普喺自己國家都搞到立立亂之際，話要「Stand with HK」；英國作為殖民地時期宗主國更加即時宣布延長BNO持有人逗留期限，今日英國多位前外相更加聯署要求英國要採取主導權，顯然《國安法》嘅威力，震懾西方國家。

　　《國安法》其實真係唔可怕，起碼Tina作為一個正當市民，真係無諗過自己會誤墮國家安全嘅法網。好多國家都有自己嘅國家安全法例，呢個無可置疑；有啲國家好似美國咁，每個州都有唔同法例，部分法例一聽到你更加會質疑，點解堂堂民主大國會有咁嘅法例呢？港版《國安法》未立，唔少香港人北上公幹又好、消遣又好，甚至係後生仔女，周末都中意返深圳嘆下烤魚、飲下網紅茶放上IG打卡，咁何解佢地當時又願意以身犯險返內地，唔通又唔怕喺中國境內畀公安拉？

　　《國安法》可怕之處，在於我地政府嘅態度。一條連條文都未有嘅法例，建制派蜂群而出講支持呢個國家級任務，Tina都萬分理解，但係林鄭率全體官員一字排開全力支持，Tina嘅冷汗真係由背脊流返上額頭。喺香港，立法嘅程序大家應該都略知一二，政府前期嘅資料搜集工作唔講，出咗完整條文上咗立法會首讀之後，一般都要開法案委員會經議員討論睇下有無嘢要改，可能要開公聽會等人發表意見，最後先經立法會三讀先成為正式法例。你試下政府官員無啦啦叫議員公開支持一條連條文都未有嘅法例，睇下班議員夠唔夠膽？林鄭喺阿爺一聲「不可有雜音」令下，拋開我地一貫以來嘅慣例，連一句門面工夫「特區政府基本上是支持立法，但我們都要看最後條文」都唔夠膽講一聲，最可怕莫過於此。

【etnet一App通天下】獨家「銀行匯率比較」功能：匯市靚價一眼通，一按直達交易商，買入賣出好輕鬆！

立即下載>>

etnet財經﹒生活App 

iOS : https://apple.co/2PCaN4b 

Android: http://bit.ly/38h135T

etnet MQ強化版App 

iOS : https://apple.co/2VEjoHl 

Android: http://bit.ly/32RGk7G 

　　負責為全港超過19萬公務員制定薪酬調整幅度指標嘅「薪酬趨勢調查委員會」，剛剛喺噚日（16日）公布最新嘅2024年薪酬趨勢調查報告，各級公務員加薪淨指標，分別係高級公務員4.01%、中級公務員4.32%同埋低級公務員5.47%，遠遠超過之前市場預期嘅3%至4%。

　　消息一公布，市面「嘩嘩聲」四起，事關成4%至5%人工加幅，對私營市場九成打工仔近幾年嚟講，都係遙不可及。有熟知政府運作嘅政界中人就話，每年嘅薪酬趨勢調查委員會報告，都令到政府高層頭都大埋，佢形容：「私營機構加幾多人工，梗係睇吓公司去年盤數同埋預測未來2、3年經營狀況去決定，簡單好多；但政府加幾多人工畀公務員，要考慮嘅因素唔單止係自己個荷包，仲要睇埋對私營市場嘅影響，絕對係政治學上一門高深學問。」

　　今年公布呢個遠超市場預期嘅加幅，絕對係令到政府處於幾尷尬嘅局面。如果跟足建議去加人工，好處當然係公務員士氣獲得提振，有助現屆政府繼續積極推行各項政策，等下面嘅公務員「攰死」之餘，起碼荷包得以充實。不過現時市場經營環境並唔係一面向好，以往一直係「天之驕子」嘅金融機構更加出現裁員情況，中小企更加喺北上消費熱潮之下「得個做字」，街上、商場吉舖處處，如果政府帶頭加足5%薪酬，對私營市場絕對係沉重打擊。

薪酬趨勢調查委員會建議嘅公僕加薪幅度，遠超市場預期。(Shutterstock)

　　喺面對千億財赤、儲備跌到得番7000億元、政府甚至要加大發債去支持基建項目嘅時候，加薪5%，講緊每年開支要增加超過60億元，政界中人就話：「呢頭你話政府唔夠錢要研究加呢樣收費、減嗰樣使費，到頭來加人工就要每年使多60億至70億元，試問又點樣同市民交代？」

　　而加唔足嘅話，對政府運作亦有唔少影響。有公務員朋友形容，呢幾年行政主導勢頭之下，個個局都要交足功課，上面有任何諗頭，做細嘅就要出頭，唔少部門嘅中高層都做得辛苦過出名工時長嘅四大核數師行，夜晚10點後收工都係等閒事，「人工加得唔夠好，可能就會令到人手流失加劇，特別係30幾歲中層嗰班，佢哋有政府工作經驗，行出去好多私營機構都爭住要，政府人工加唔夠，呢班中堅走咗就好難再填補」。

　　有立法會議員就私底下透露，早排都已經有評論認為公務員要減人工去同政府庫房共度時艱，不過佢自己就覺得，呢種講法無非都係社會嘅一種怨氣，「要解呢口怨氣好簡單，只要最高嗰班官員唔加人工之餘仲自願凍薪，甚至減人工，輿論就自然會覺得高層有承擔，呢啖氣就自然吞得落，下面加得足又點話呢！」