世事政情

　　港澳辦和中聯辦繼之前高調抨擊立法會議員郭榮鏗引發中聯辦角色爭議之後，兩辦今日再次「發功」，發稿批評罷課公投。其中港澳辦聯名斥責香港眾志黃之鋒等「是在為自己的罪行錄上再添下重重的一筆」，要求教育部門「把規矩用起來，斬斷伸向教育、伸向孩子的黑手……必須讓一切煽動港獨、暴力的言論在學校絕跡。」今次兩辦直接點名「教育部門」（即教育局），肯定再惹來直接向政府部門施壓及發號施令的質疑。

　　阿爺公布港版《國安法》在即，23個民主派工會聯同「中學生行動籌備平台」，計劃今個星期日（14日）舉行「三罷公投」，進一步觸動阿爺嘅神經。其實早於兩辦發出聲明之前，教育局局長楊潤雄都已早早行動，向全港中小學校長發信，指明若教師參與罷課，是「疏忽職守」、有違專業，「學校應採取紀律行動」。不過，由於罷課公投嘅日子喺今個星期日，老師學生基本上係放假行事，教育局封信其實係有姿勢無實際。

　　而港澳辦同中聯辦再次故技重施，發聲明譴責楊岳橋、黃之鋒等，建制中人就話，喺阿爺第一日公布立《國安法》之後已經係意料中事。建制中人指出，阿爺明知由國家為香港立法咁大爭議嘅都要去做，好明顯就係唔再相信香港可以處理到呢件阿爺頭號關心嘅議題，索性自己強硬處理；而自己處理嘅過程之中，不容許建制派有任何雜音之外，更不能容忍政府之內有任何人牽頭出嚟反對，以免好似《逃犯條例》當日咁，令到呢點點嘅雜音成為反對派嘅一根稻草。

　　睇返近期新聞嘅「脈絡」，亦睇到嚟緊政府會同兩辦聲明所指一樣，會全面加強控制公務員以至教育界嘅意識形態，目標就係得一個，就係全面加強港人對國家嘅歸屬感，糾正過往嘅「無為而治」。

　　有媒體日前刊登咗一篇政壇花絮，話今屆立法會同政府關係非常良好，甚至有議席出缺，對立法會運作都完全無影響，議員「多一個都唔多」；更加借住呢個議題，指明年年底立法會選舉可能會大換血，估計有三分一現任議員離任，包括「自然流失」，如資深議員因年齡、黨內交棒退下火線，亦有議員涉及表現等不同因素。文章仲點名三位議員：謝偉俊、蘇長榮同林素蔚。

　　文章一出，立即喺政壇瘋傳。被指「太有個性」、喺現屆議會之中「格格不入」嘅謝偉俊，議會經驗豐富，亦都算得上係稱職嘅議員，對於文章所講，佢四兩撥千斤咁回應一句：「係咪格格都入就好呢？」絕對睇得出佢爐火純青嘅程度。至於蘇同林就被指表現欠佳，兩人都已經親自向其他媒體解釋，Tina都不再詳述。

　　不過呢篇文章亦帶出一個問題，就係來年會有幾多人冧莊繼續做落去呢？Tina亦借機會向多位議員打聽，佢哋有一個睇法係幾一致嘅，就係文章所講嘅「三分一無得連任」應該都係太保守，估計數字遠超三分一。其中一位資深議員分析，香港面臨新形勢、新局面，係極需要新思維，一批舊議員（佢自己都話可能包括佢自己）其實都好可能功成身退，讓路畀新人，將朝氣帶入議會。

有政圈中人認為，香港面臨新形勢、新局面，議會極需要新思維。(iStock)

　　嗰個資深議員仲認為，的確有部分議員喺議會工作上嘅表現同各方期望有落差，特別係部分選委界別議員，「不過又好難怪佢哋，依家每個議題，每個黨都會有固定發言人，涉及一啲行業嘅嘢又有功能組別議員去睇住，選委會界別議員要出位唔容易，太過進取敢言又好易講錯說話，所以唯一敢言嘅江玉歡可以跑得出，市民對佢嘅認知度相信亦係最高，但其他議員要出位真係好困難，做唔到成績，某程度上亦都係『制度』問題。」

　　另一位議員就指出，有部分議員都係當日「臨危受命」上陣參選，本身佢哋工作或者業務就已經繁重，本來對政治地位都無乜特別要求，但要佢哋兼顧咁多議會工作，確實令到佢哋左右做人難，「有唔少議員都私下抱怨，如果要做到『高層』所要求嘅KPI，喺議會要花上唔少時間，呢個係佢哋事先無估計到，所以最少十個八個現任議員都會係因為呢個原因而喺下屆拜拜，如果連同新丁加入競爭，三分一離任實在係太保守！」