世事政情

　　自從2016年立法會選舉之後，選舉主任呢個毫不起眼、四年先做一次行禮如儀嘅工作，已經變成係身負國家重責嘅「國家級任務」。再經歷完2019年區議會選舉之後，選舉主任一職，喺AO界之中更加成為厭惡之列。

　　政府今日刊憲委任嚟緊9月立法會選舉嘅選舉主任，同以往一樣嘅係，五個地方選區嘅選舉主任都係民政專員，但最唔同嘅係，今年各區嘅選舉主任，並唔係來自嗰區嘅民政專員，全部都係跨區出任，真係前所未見。好似就任唔夠一星期嘅沙田民政事務專員黃展翹，就跨到去新界西做選舉主任，而本身屬於新界西離島區嘅民政專員，就調轉去做新界東選舉主任。

　　呢個做法，政府內部講法就係，民政專員擔心DQ某些參選人資格，特別係DQ當區區議員的話，日後喺地區嘅工作將會舉步維艱(坦白講Tina唔覺得依家工作有幾咁順暢)。但AO界消息就話，各區民政專員，絕大部分都對「選舉主任」呢份工作避之則吉。Tina聽聞，一班民政專員私下都對政府今次大兜亂做法唔投信心一票，最主要係DQ無分區域，只要係選舉主任DQ一個候選人嘅資格，以今時今日嘅氣氛就會被網絡起底，隨時禍及家人；所以呢份苦差，好多人都唔敢擔當。

　　而今年立法會選舉更加係苦中之苦，事關阿爺正就香港定立港版《國安法》，連政制及內地事務局局長曾國衛都話，「若參選人完全否定或反對國安法立法，令人質疑佢係唔係維護《基本法》及效忠香港特區」。DQ到打開口牌咁款，選舉主任作出DQ決定時又要多一重政治考慮，絕對係橋上倒涼茶，何苦呢！

　　另有AO更指出，今時今日邊個可以入閘邊個被攔喺閘外，肯定輪唔到選舉主任話事，最終都係局長、司長級，甚至係「更高層」落指令，「指令就高層落，硬食就選舉主任自己，又點會有人真心想做？！」

　　有媒體日前刊登咗一篇政壇花絮，話今屆立法會同政府關係非常良好，甚至有議席出缺，對立法會運作都完全無影響，議員「多一個都唔多」；更加借住呢個議題，指明年年底立法會選舉可能會大換血，估計有三分一現任議員離任，包括「自然流失」，如資深議員因年齡、黨內交棒退下火線，亦有議員涉及表現等不同因素。文章仲點名三位議員：謝偉俊、蘇長榮同林素蔚。

　　文章一出，立即喺政壇瘋傳。被指「太有個性」、喺現屆議會之中「格格不入」嘅謝偉俊，議會經驗豐富，亦都算得上係稱職嘅議員，對於文章所講，佢四兩撥千斤咁回應一句：「係咪格格都入就好呢？」絕對睇得出佢爐火純青嘅程度。至於蘇同林就被指表現欠佳，兩人都已經親自向其他媒體解釋，Tina都不再詳述。

　　不過呢篇文章亦帶出一個問題，就係來年會有幾多人冧莊繼續做落去呢？Tina亦借機會向多位議員打聽，佢哋有一個睇法係幾一致嘅，就係文章所講嘅「三分一無得連任」應該都係太保守，估計數字遠超三分一。其中一位資深議員分析，香港面臨新形勢、新局面，係極需要新思維，一批舊議員（佢自己都話可能包括佢自己）其實都好可能功成身退，讓路畀新人，將朝氣帶入議會。

有政圈中人認為，香港面臨新形勢、新局面，議會極需要新思維。(iStock)

　　嗰個資深議員仲認為，的確有部分議員喺議會工作上嘅表現同各方期望有落差，特別係部分選委界別議員，「不過又好難怪佢哋，依家每個議題，每個黨都會有固定發言人，涉及一啲行業嘅嘢又有功能組別議員去睇住，選委會界別議員要出位唔容易，太過進取敢言又好易講錯說話，所以唯一敢言嘅江玉歡可以跑得出，市民對佢嘅認知度相信亦係最高，但其他議員要出位真係好困難，做唔到成績，某程度上亦都係『制度』問題。」

　　另一位議員就指出，有部分議員都係當日「臨危受命」上陣參選，本身佢哋工作或者業務就已經繁重，本來對政治地位都無乜特別要求，但要佢哋兼顧咁多議會工作，確實令到佢哋左右做人難，「有唔少議員都私下抱怨，如果要做到『高層』所要求嘅KPI，喺議會要花上唔少時間，呢個係佢哋事先無估計到，所以最少十個八個現任議員都會係因為呢個原因而喺下屆拜拜，如果連同新丁加入競爭，三分一離任實在係太保守！」