世事政情

　　本身屬民主黨嘅立法會前議員許智峯，周初突然現身丹麥，被人懷疑佢有「出走」意圖；但當時佢極力否認，仲話出席完當地環保會議後就會回港。點知轉個頭，佢嘅屋企人都被傳已經離港，最終噚晚許就喺自己Facebook宣布「流亡」，並同時退出民主黨。

　　許智峯依家孭緊9項控罪喺身，但其實9條罪，無一條係同《國安法》有關。要知道泛民一方打緊嘅「國際線」，主力都係要令外國政府或者國會，將《國安法》視為摧毀一國兩制嘅武器，如果任何抗爭者被不當引用《國安法》而被起訴，最終被判囚，喺泛民立場，咁就係最有力嘅證據。但係許嘅9項控罪，其實都無乜邊一條話係好嚴重，因為呢9項控罪而宣告「流亡」，許未免有啲高估咗自已嘅影響力。

　　有建制派元老同Tina剖釋，民主黨中人從來都未令阿爺太頭痛。羅冠聰當初走，因為學民思潮先係重點被招呼對象，而黃之鋒同羅兩人既然係學民大腦，羅出走海外，稱得上係「真流亡」。呢位元老仲話：「許智峯影響力點可以同羅黃兩人相比？用《國安法》真係有排都未輪到佢，或者佢自知號召力無其他泛民陣營嘅中堅咁強，出年如果無得再選立法會，之後佢9條罪有部分被入罪的話，連區議員都無得做，咁又邊度搵資源？走，似『僭逃』多過『流亡』，似係為自己同家人生活，多過佢口中所講嘅擴大國際線。」

　　不過佢一人出走，都唔係無後果，最大嘅影響，係往後牽涉泛民陣營嘅案件，被告可以獲得保釋嘅機會可能會大大降低。依家被拘留嘅壹仔老闆黎智英、社民連嘅快必等等，都被法院否決保釋申請。許出走之後，法院會唔會再為被告人訂下更嚴苛嘅保釋門檻，真係未知之數。

　　另一後果可能係會令阿爺重新審視民主黨嘅存在價值。建制派元老指出，阿爺一直容許民主黨為首嘅民主派喺立法會同政府打對台，一方面係阿爺真心覺得民主黨創辦人司徒華係真心愛國（當年華叔過身新華社都有出稿）；第二方面，有民主黨嘅立法會，帶出另一種聲音，的確係向外實現一國兩制嘅最佳舞台。依家許出走之後，雖然佢已脫黨，但往後如果繼續打「國際線」，將可能令民主黨僅餘嘅價值都無埋，「真係可能掛住民主黨牌頭嘅都無得選，所以今次許所謂嘅『流亡』，真係可能會累到民主黨「黨散人亡」！」

　　有媒體日前刊登咗一篇政壇花絮，話今屆立法會同政府關係非常良好，甚至有議席出缺，對立法會運作都完全無影響，議員「多一個都唔多」；更加借住呢個議題，指明年年底立法會選舉可能會大換血，估計有三分一現任議員離任，包括「自然流失」，如資深議員因年齡、黨內交棒退下火線，亦有議員涉及表現等不同因素。文章仲點名三位議員：謝偉俊、蘇長榮同林素蔚。

　　文章一出，立即喺政壇瘋傳。被指「太有個性」、喺現屆議會之中「格格不入」嘅謝偉俊，議會經驗豐富，亦都算得上係稱職嘅議員，對於文章所講，佢四兩撥千斤咁回應一句：「係咪格格都入就好呢？」絕對睇得出佢爐火純青嘅程度。至於蘇同林就被指表現欠佳，兩人都已經親自向其他媒體解釋，Tina都不再詳述。

　　不過呢篇文章亦帶出一個問題，就係來年會有幾多人冧莊繼續做落去呢？Tina亦借機會向多位議員打聽，佢哋有一個睇法係幾一致嘅，就係文章所講嘅「三分一無得連任」應該都係太保守，估計數字遠超三分一。其中一位資深議員分析，香港面臨新形勢、新局面，係極需要新思維，一批舊議員（佢自己都話可能包括佢自己）其實都好可能功成身退，讓路畀新人，將朝氣帶入議會。

有政圈中人認為，香港面臨新形勢、新局面，議會極需要新思維。(iStock)

　　嗰個資深議員仲認為，的確有部分議員喺議會工作上嘅表現同各方期望有落差，特別係部分選委界別議員，「不過又好難怪佢哋，依家每個議題，每個黨都會有固定發言人，涉及一啲行業嘅嘢又有功能組別議員去睇住，選委會界別議員要出位唔容易，太過進取敢言又好易講錯說話，所以唯一敢言嘅江玉歡可以跑得出，市民對佢嘅認知度相信亦係最高，但其他議員要出位真係好困難，做唔到成績，某程度上亦都係『制度』問題。」

　　另一位議員就指出，有部分議員都係當日「臨危受命」上陣參選，本身佢哋工作或者業務就已經繁重，本來對政治地位都無乜特別要求，但要佢哋兼顧咁多議會工作，確實令到佢哋左右做人難，「有唔少議員都私下抱怨，如果要做到『高層』所要求嘅KPI，喺議會要花上唔少時間，呢個係佢哋事先無估計到，所以最少十個八個現任議員都會係因為呢個原因而喺下屆拜拜，如果連同新丁加入競爭，三分一離任實在係太保守！」