世事政情

　　上星期先寫完特區官員錯漏百出，剛剛過去嘅周末就再一次令市民充分體驗政府官員嘅「三低」，低智慧、低辦事能力同埋低政治敏感度。

　　衛生防護中心周末（22日）曾經公布，廣東省被列為中風險地區並暫停廣東省「回港易」計劃。呢個講法一公布，建制圈子刮起一陣大風，個個都黑人問號無所適從，連前特首梁振英都要係facebook關注同跟進，最後政制及內地事務局喺上述消息公布6小時後就急劇「轉軚」，將廣東中風險地區收窄至荔灣區龍津街錦龍匯鑫閣，並公布回港易計劃暫時維持不變。

（資料圖片）

　　事件發酵幾日之後，政府內部將個波推來推去，最終紙包唔住火，內情終於有眉目。有報道就話消息公布之前，食衛局就有知會政制及內地事務局，但係政制及內地事務局遲遲無回覆「ok」，食衛局就當咗「ok」向外公布，最終搞出呢個大頭佛。

　　自從肥佬黎入咗監房之後，前特首梁振英將目標轉向林鄭，多次喺fb甚至透過梁營嘅忠誠猛將叫陣，唔係日日都個個星期批評特區政府嘅政策。難得今次千載難逢機會，CY繼續發揮佢「監察政府」嘅角色，就「回港易」事件向特區政府提出「三不解」，喺特區政府收回成命之後CY又補一句「從善如流」，當真係頂心大杉。

　　林鄭今早（25日）出席行會前見記者被問到CY對特區政府嘅各種批評，包括要求成立文化局等，林鄭真係毫不客氣，指香港任何時間都有很多人發表意見，「特別係近年好多意見領袖、KOL，所以我就唔會逐個嚟評論。」兩人間火藥味之濃，真係夠放成晚煙花。

　　CY近年的確轉成為「鍵盤戰士」，反修例事件之後批評特區施政都多數喺網上進行，但林鄭將CY歸類為KOL，的確係可圈可點。有建制中人指出，林鄭咁樣公開講，好明顯就係氣上心頭，但實情都係有計算，事關CY係前特首，雖然貴為國家領導人，但係喺特區施政上的確係毫無角色可言，佢對特區政府指指點點，同其他KOL角色係一模一樣。不過呢位建制中人同時強調，就算CY係KOL，都係香港「政壇首席KOL」，佢嘅O，即係opinion(意見)係可以直達天庭，林鄭單挑CY，除咗用實實在在嘅政績，得把口隨時會「死剩把口」。

　　有媒體日前刊登咗一篇政壇花絮，話今屆立法會同政府關係非常良好，甚至有議席出缺，對立法會運作都完全無影響，議員「多一個都唔多」；更加借住呢個議題，指明年年底立法會選舉可能會大換血，估計有三分一現任議員離任，包括「自然流失」，如資深議員因年齡、黨內交棒退下火線，亦有議員涉及表現等不同因素。文章仲點名三位議員：謝偉俊、蘇長榮同林素蔚。

　　文章一出，立即喺政壇瘋傳。被指「太有個性」、喺現屆議會之中「格格不入」嘅謝偉俊，議會經驗豐富，亦都算得上係稱職嘅議員，對於文章所講，佢四兩撥千斤咁回應一句：「係咪格格都入就好呢？」絕對睇得出佢爐火純青嘅程度。至於蘇同林就被指表現欠佳，兩人都已經親自向其他媒體解釋，Tina都不再詳述。

　　不過呢篇文章亦帶出一個問題，就係來年會有幾多人冧莊繼續做落去呢？Tina亦借機會向多位議員打聽，佢哋有一個睇法係幾一致嘅，就係文章所講嘅「三分一無得連任」應該都係太保守，估計數字遠超三分一。其中一位資深議員分析，香港面臨新形勢、新局面，係極需要新思維，一批舊議員（佢自己都話可能包括佢自己）其實都好可能功成身退，讓路畀新人，將朝氣帶入議會。

有政圈中人認為，香港面臨新形勢、新局面，議會極需要新思維。(iStock)

　　嗰個資深議員仲認為，的確有部分議員喺議會工作上嘅表現同各方期望有落差，特別係部分選委界別議員，「不過又好難怪佢哋，依家每個議題，每個黨都會有固定發言人，涉及一啲行業嘅嘢又有功能組別議員去睇住，選委會界別議員要出位唔容易，太過進取敢言又好易講錯說話，所以唯一敢言嘅江玉歡可以跑得出，市民對佢嘅認知度相信亦係最高，但其他議員要出位真係好困難，做唔到成績，某程度上亦都係『制度』問題。」

　　另一位議員就指出，有部分議員都係當日「臨危受命」上陣參選，本身佢哋工作或者業務就已經繁重，本來對政治地位都無乜特別要求，但要佢哋兼顧咁多議會工作，確實令到佢哋左右做人難，「有唔少議員都私下抱怨，如果要做到『高層』所要求嘅KPI，喺議會要花上唔少時間，呢個係佢哋事先無估計到，所以最少十個八個現任議員都會係因為呢個原因而喺下屆拜拜，如果連同新丁加入競爭，三分一離任實在係太保守！」