世事政情

　　議員們呢兩個星期可以話忙到不可開交，立法會入面日日都有財務委員會特別會議去討論財政預算案之外，港澳辦主任夏寶龍旋風式訪港，據聞議員們亦已經被告知要預留多個時段，準備同夏主任會面同出席多個有關《國家安全日》嘅活動；而下星期五，議員們就會喺特首李家超嘅帶領之下，齊齊跟團北上到大灣區考察。

（資料圖片）

　　港澳辦主任嚟香港，本身都唔係乜嘢咁緊張嘅事，過往都時有發生，不過中共中央及國務院早前公布《黨和國家機構改革方案》，設立屬黨中央辦事機構嘅「中央港澳工作辦公室」，稱得上係正式升格同埋顯示中央更為看重港澳事務，所以夏主任今次喺兩會會議之後訪港，政府上上下下都非常緊張。

　　有議員就同Tina透露，本身政府已經安排好一啲《國家安全日》活動，但無啦啦臨時又增加一啲新嘅活動「邀請」議員參加，名義上係「邀請」，但實際上又無「未能出席」選項，仲要由通知到回覆截止都只係得幾個鐘時間，「我估計都係同夏主任可能會出席有關，不過都顯示今次夏主任來訪真係無事先安排好，好多嘢都係突如奇來」。

　　而據聞夏主任將會聯同訪問團喺星期日到訪立法會同議員會面同午宴，至於到時擦出咩火花，下星期Tina再同大家八卦下。

　　呢幾日迎接完夏主任，下個周末議員們又跟住特首去大灣區考察。過往立法會議員返內地考察，都好少會「齊腳」，事關當年非建制派好多都難以入境內地，更大部分係因為佢地連應邀都唔會去。時移勢易，依家「完善選舉」之後，89位議員(黃元山入咗政府未補選)都係得到阿爺嘅認受，雖然聽聞唔係個個都得閒去，但照計第一日點都會齊腳，喺內地接受當地官員宴請。

　
　　由於人數眾多，為免「失焦」同難以安排，聽講一眾議員就會兵分兩路，考察唔同嘅大灣區城市，分別係東莞同佛山，訪問不同嘅創科企業。不過議員私底下就話，現時「大部分」議員同內地都係關係良好，部分到訪企業都係非常出名，所以過往亦都有唔少機會去參觀考察，再一次去考察某程度上係配合政府行程，「實際效用就肯定無乜架喇，都係等香港同內地市民見到我地係一整Team，為香港融入大灣區發展而努力」。　

　　每年《財政預算案》，每位立法會議員都會入大約40條問題，詢問各個政策局各項政策嘅開支使費等等，周不時都會有啲精警嘅提問。近日無啦啦翻起嘅一條，就係由近來多次被人「點名」嘅資深議員謝偉俊提出，佢質疑政府管治架構中嘅政治助理職位「過剩」，問政府可唔可以縮減人數節省開支。喺依家財政緊絀嘅環境下，謝偉俊嘅問題可以話係切中要害，事關的確無幾多市民知道，呢班閒閒哋10萬月薪嘅政助邊個打邊個，更加唔知佢哋究竟有咩工作要做。

　　政助一職喺2007年10月，即係曾蔭權年代提出，連同副局長呢個新職位，協助局長處理政治事務。政助最核心嘅工作就係收集立法會同持份者嘅立場取態，然後提出推銷政策嘅辦法。咁當年立法會泛民同建制好多問題嘅立場固之然南轅北轍，政治游說工作的確係需要，政助嘅設立的確可以幫輕吓局長沉重嘅工作。

　　但係到咗今時今日，喺完善咗嘅政治制度下，政助嘅角色就真係跌得低過幾個月前嘅恒指。有一位資深議員同Tina講，可能佢自己係比較資深嘅關係，有任何問題，佢都係直接搵副局長或者局長，所以呢屆立法會以來，真係甚少同政助溝通，最多都係覆幾個簡短嘅WhatsApp，「我唔知佢仲有無其他嘢做，如果單單係同我嘅溝通方式，唔會值10萬蚊一個月囉！」

在現今政治環境下，月薪逾10萬元的政治助理重要性存疑。(Shutterstock)

　　另一位新科議員就話， 佢自己同政助嘅聯繫都算係緊密，有咩相關議題都會交流。佢話可能自己本身就係政治素人，撞啱佢坐嘅委員會，對口嘅政助亦都係素人，大家咁上下料子，自然就啱傾啲。不過佢亦都認同，政助今時今日嘅角色真係可有可無，「雖然我無經歷過以前嘅光景，但依家真係行政主導得好緊要，有啲大政策，政府最多都係解釋畀你聽，好多時都仲要係秘書長等等公務員去做解說，而政府根本從來都無關心過我哋議員嘅睇法，事關89位議員，有幾多人夠膽反對政府嘅議案？咁嘅環境之下，基本上係無乜政治工作可言！」

　　設立政助本來有另一個目的，就係幫政府培育政治人才，但係縱觀咁多年，又有幾多個人才走咗出嚟？有無人由政助上到去做局長？政助係「過剩」定係「多餘」，相信讀者有自己嘅睇法。