世事政情

　　JPEX風波，短短一個星期已經愈演愈烈，所涉範圍橫跨娛樂圈、投資圈以及政圈。前兩個圈Tina 唔多在行，不過可以講，喺政圈產生嘅風波，一啲都唔細。

(證監會官網截圖)

　　成件事第一個矛頭當然係直接證監會，特別係證監會第一次同警方出嚟開記招，態度畀市民嘅感覺就係想開脫自己監管不力嘅責任。無錯，證監會發現JPEX疑似有問題嗰陣，佢地的確係無任何監管權力，但有金融圈子嘅政圈中人就批評，證監會呢個講法同佢地一直以來對待持牌人士有好明顯嘅落差。政圈中人就話：「每次召你去見佢，往往都係高高在上，用望住賊仔嘅眼光望住你，用審犯嘅語氣去質疑你，驚死你去呃投資者咁；如果證監會好似對持牌人士咁對待JPEX，雖然當時無任何監管權力，但最起碼見到有詐騙成分，係咪都應該盡早通知警方去開File呢？成件事證監係責無旁貸！」
 
　　監管者係證監，政府嘅角色當然就係睇實證監去做好佢地嘅本份。不過政圈中人都話，證監會過去咁多年可以話係「山寨王」，自視極高，話就話政府喺佢地之上，但其實證監會面對政府嘅一啲意見或者提醒嘅時候，更可能係會當「聽唔到」，或者係用自己嘅方式去處理。政圈中人指出，政府其實養咗唔少「獨立王國」，最主要係佢地大多係財政獨立，唔使年年問政府拎撥款，財大自然氣粗。亦令到喺關鍵時刻，政府都無能為力；而政府往往無做好監管「監管者」嘅角色。
 
　　至於立法會，講實在，立法會喺審議虛擬資產平台法例上有無做好議員嘅本分，亦的確成疑，最起碼一年嘅過渡期之中存在住灰色地帶，令到不法之徒有機可乘，當日審議過程肯定就無把好關。另外睇返資料，原來本來條例草案係只容許專業投資者參與，但因為多位議員提出質疑，話會影響虛擬資產喺香港嘅發展而要求政府修訂，最終就令到法例有所寬鬆；雖然呢方面無論有無鬆到，Tina覺得騙徒都一定係會大小通吃，結果都係一樣，但依家睇返，議員當初審議法案係咪又真係無認真睇清楚法例呢？有無幫市民同投資者把好關呢？
 
　　政圈中人相信，今次事件仲會有排燒，重頭戲就要睇10月9日立法會財經事務委員會上加插討論，睇下證監、政府同議員會唔會擦出新火花。

　　有媒體日前刊登咗一篇政壇花絮，話今屆立法會同政府關係非常良好，甚至有議席出缺，對立法會運作都完全無影響，議員「多一個都唔多」；更加借住呢個議題，指明年年底立法會選舉可能會大換血，估計有三分一現任議員離任，包括「自然流失」，如資深議員因年齡、黨內交棒退下火線，亦有議員涉及表現等不同因素。文章仲點名三位議員：謝偉俊、蘇長榮同林素蔚。

　　文章一出，立即喺政壇瘋傳。被指「太有個性」、喺現屆議會之中「格格不入」嘅謝偉俊，議會經驗豐富，亦都算得上係稱職嘅議員，對於文章所講，佢四兩撥千斤咁回應一句：「係咪格格都入就好呢？」絕對睇得出佢爐火純青嘅程度。至於蘇同林就被指表現欠佳，兩人都已經親自向其他媒體解釋，Tina都不再詳述。

　　不過呢篇文章亦帶出一個問題，就係來年會有幾多人冧莊繼續做落去呢？Tina亦借機會向多位議員打聽，佢哋有一個睇法係幾一致嘅，就係文章所講嘅「三分一無得連任」應該都係太保守，估計數字遠超三分一。其中一位資深議員分析，香港面臨新形勢、新局面，係極需要新思維，一批舊議員（佢自己都話可能包括佢自己）其實都好可能功成身退，讓路畀新人，將朝氣帶入議會。

有政圈中人認為，香港面臨新形勢、新局面，議會極需要新思維。(iStock)

　　嗰個資深議員仲認為，的確有部分議員喺議會工作上嘅表現同各方期望有落差，特別係部分選委界別議員，「不過又好難怪佢哋，依家每個議題，每個黨都會有固定發言人，涉及一啲行業嘅嘢又有功能組別議員去睇住，選委會界別議員要出位唔容易，太過進取敢言又好易講錯說話，所以唯一敢言嘅江玉歡可以跑得出，市民對佢嘅認知度相信亦係最高，但其他議員要出位真係好困難，做唔到成績，某程度上亦都係『制度』問題。」

　　另一位議員就指出，有部分議員都係當日「臨危受命」上陣參選，本身佢哋工作或者業務就已經繁重，本來對政治地位都無乜特別要求，但要佢哋兼顧咁多議會工作，確實令到佢哋左右做人難，「有唔少議員都私下抱怨，如果要做到『高層』所要求嘅KPI，喺議會要花上唔少時間，呢個係佢哋事先無估計到，所以最少十個八個現任議員都會係因為呢個原因而喺下屆拜拜，如果連同新丁加入競爭，三分一離任實在係太保守！」