世事政情

　　再有震撼彈喺中環投放，今次唔係政治震撼彈，而係來自經濟方面。噚日截標嘅港鐵(00066)東涌東站一期項目，最終一份標書都收唔到，「零標書」之下自動流標，係該區不足半個月之內第二幅流標土地。

　　近一年賣地流標司空見慣，不過今次「零標書」，就係過去十年來第一次，對上一次數到2013年嘅天水圍地皮。政壇中人形容，今次流標絕對係全港地主賞畀特首李家超嘅一個耳光，「呢個項目噚日截標，《施政報告》就喺10月底公布晒，李家超已經釋出善意，輕度減辣，但從呢塊地個結果嚟睇，係一眾地主對李家超『拼經濟、謀發展』嘅施政方針投下不信任一票」。

　　雖然喺流標之後，都有地主出來講番，話項目種種對地產商唔吸引嘅地方，計唔掂數就自然唔肯入標，不過據接近地主嘅消息所講，今次項目最大嘅問題係要去做呢個新區嘅開荒牛，令到不確定因素大大提高。地主嗰邊認為，過去政府施政一直係大市場、小政府，自從前特首梁振英上場之後就一路慢慢轉變，去到近年，政府嘅「大」的確係令到信奉市場力量嘅地主有啲嚇怕。

有政圈中人形容，一眾地主透過「零標書」事件，對李家超嘅施政方針投下不信任一票。(iStock)

　　睇番啟德新發展區，一開始聽到政府以啟德「CBD2」概念號召，喺呢個九龍東新區打造出繼中環CBD後第二個商業核心區，地主都好踴躍入飛投地。但事過境遷，政府為解決公屋問題，最終決定喺呢塊咁靚嘅地興建簡約公屋，仲連一早建議興建嘅單軌列車都泡湯，試問一眾地主聽到「新區」又點會唔驚「草繩」？

　　Tina聽聞噚日新聞公布之後，極速驚動到添馬中人商討應對，最終就有發展局好官腔嘅回應，將發展商取態趨審慎，推到落去地緣政治局勢緊張、利率維持高企等等原因，不過對於前景看法就隻字不提。據悉財金方面官員非常緊張，事關一石可以激起千重浪，一直咁落去的話，政府好難唔接受現實，大幅度調低地價目標以維持政府嘅財政收入，但最驚就係漣漪效應進一步影響埋樓價下跌、負資產數目上升，對市場嘅影響係難以估算。

　　「零標書」顯然就係地主對《施政報告》撤辣等措施唔買單，所以市場氣氛再進一步差落去的話，估計財爺下年2月份嘅《財政預算案》都可能要再加碼，先有可能令到地主們有番啲胃口。

　　每年《財政預算案》，每位立法會議員都會入大約40條問題，詢問各個政策局各項政策嘅開支使費等等，周不時都會有啲精警嘅提問。近日無啦啦翻起嘅一條，就係由近來多次被人「點名」嘅資深議員謝偉俊提出，佢質疑政府管治架構中嘅政治助理職位「過剩」，問政府可唔可以縮減人數節省開支。喺依家財政緊絀嘅環境下，謝偉俊嘅問題可以話係切中要害，事關的確無幾多市民知道，呢班閒閒哋10萬月薪嘅政助邊個打邊個，更加唔知佢哋究竟有咩工作要做。

　　政助一職喺2007年10月，即係曾蔭權年代提出，連同副局長呢個新職位，協助局長處理政治事務。政助最核心嘅工作就係收集立法會同持份者嘅立場取態，然後提出推銷政策嘅辦法。咁當年立法會泛民同建制好多問題嘅立場固之然南轅北轍，政治游說工作的確係需要，政助嘅設立的確可以幫輕吓局長沉重嘅工作。

　　但係到咗今時今日，喺完善咗嘅政治制度下，政助嘅角色就真係跌得低過幾個月前嘅恒指。有一位資深議員同Tina講，可能佢自己係比較資深嘅關係，有任何問題，佢都係直接搵副局長或者局長，所以呢屆立法會以來，真係甚少同政助溝通，最多都係覆幾個簡短嘅WhatsApp，「我唔知佢仲有無其他嘢做，如果單單係同我嘅溝通方式，唔會值10萬蚊一個月囉！」

在現今政治環境下，月薪逾10萬元的政治助理重要性存疑。(Shutterstock)

　　另一位新科議員就話， 佢自己同政助嘅聯繫都算係緊密，有咩相關議題都會交流。佢話可能自己本身就係政治素人，撞啱佢坐嘅委員會，對口嘅政助亦都係素人，大家咁上下料子，自然就啱傾啲。不過佢亦都認同，政助今時今日嘅角色真係可有可無，「雖然我無經歷過以前嘅光景，但依家真係行政主導得好緊要，有啲大政策，政府最多都係解釋畀你聽，好多時都仲要係秘書長等等公務員去做解說，而政府根本從來都無關心過我哋議員嘅睇法，事關89位議員，有幾多人夠膽反對政府嘅議案？咁嘅環境之下，基本上係無乜政治工作可言！」

　　設立政助本來有另一個目的，就係幫政府培育政治人才，但係縱觀咁多年，又有幾多個人才走咗出嚟？有無人由政助上到去做局長？政助係「過剩」定係「多餘」，相信讀者有自己嘅睇法。