世事政情

　　呢個星期，一單「立會戀情」席捲整個政圈，不過「立會戀情」都係影響當時人，要數到對民生、對政府管治有更大影響嘅，不得不數4月1日實施垃圾徵費。

　　由於好快就到新例實施嘅日子，所以各單位都開始憂慮，究竟將來落實之後，大家要點樣做先可以避免誤墮法網？不過唔睇由自可，一睇就個個都發晒火，問題真係一籮籮，唔同嘅單位都有唔同嘅問題，最慘就係，官方嘅說法亦都似乎係有好多種，令到民間怨聲載道，各路人馬全方位向主事部門——環保署發炮。

　　見到民間怨聲四起，聽聞添馬艦都異常緊張，特首李家超喺星期二都同記者講，要將垃圾徵費執行細節清楚列明畀公眾，點名環境及生態局尤其係局長謝展寰，要不斷通過講座、記者會、宣傳工具等推廣，做到「入到民心、入到屋企」。

垃圾徵費細節不清，令民間怨聲四起。（環境及生態局網站圖片）

　　特首咁樣講完，話音都未落，隔多一日，環保署署長徐浩光接受傳媒專訪嘅報道就刊登，其中佢有一個句被廣為瘋傳，意有所指咁話市民不清楚新例係市民嘅問題，「清不清楚，好多時候看你自己想不想弄清楚，如果你想不清楚，幾時都是不清楚！」

　　政圈中人一睇到呢篇報道，個個都嘖嘖稱奇，事關報道係出自親中媒體手筆，好難存在「無咁講過」嘅說法，而媒體咁樣寫得，仲要係直出唔係意譯，好明顯就係媒體都覺得呢一句係「金句」，應該畀讀者睇到，「官員嘅責任就係好好咁解釋新政策，市民唔明就要講到明，就算你明知市民係唔想去清楚，你都唔會咁樣講出口，企圖將個責任拋畀市民同業界，換轉以前，已經激起更大嘅民怨，咁對管治班子有極大影響⋯⋯」

　　特首講到「入到民心、入到屋企」，點解轉個頭，下面嘅官員將就真係將責任入到市民屋企？聽聞事件已經震動成個管治班子。最終點收科真係難以預測，但係按照目前形勢，硬推新政似乎對社會穩定會帶來負面影響，政府都真係唔好「唔清唔楚」！

　　每年《財政預算案》，每位立法會議員都會入大約40條問題，詢問各個政策局各項政策嘅開支使費等等，周不時都會有啲精警嘅提問。近日無啦啦翻起嘅一條，就係由近來多次被人「點名」嘅資深議員謝偉俊提出，佢質疑政府管治架構中嘅政治助理職位「過剩」，問政府可唔可以縮減人數節省開支。喺依家財政緊絀嘅環境下，謝偉俊嘅問題可以話係切中要害，事關的確無幾多市民知道，呢班閒閒哋10萬月薪嘅政助邊個打邊個，更加唔知佢哋究竟有咩工作要做。

　　政助一職喺2007年10月，即係曾蔭權年代提出，連同副局長呢個新職位，協助局長處理政治事務。政助最核心嘅工作就係收集立法會同持份者嘅立場取態，然後提出推銷政策嘅辦法。咁當年立法會泛民同建制好多問題嘅立場固之然南轅北轍，政治游說工作的確係需要，政助嘅設立的確可以幫輕吓局長沉重嘅工作。

　　但係到咗今時今日，喺完善咗嘅政治制度下，政助嘅角色就真係跌得低過幾個月前嘅恒指。有一位資深議員同Tina講，可能佢自己係比較資深嘅關係，有任何問題，佢都係直接搵副局長或者局長，所以呢屆立法會以來，真係甚少同政助溝通，最多都係覆幾個簡短嘅WhatsApp，「我唔知佢仲有無其他嘢做，如果單單係同我嘅溝通方式，唔會值10萬蚊一個月囉！」

在現今政治環境下，月薪逾10萬元的政治助理重要性存疑。(Shutterstock)

　　另一位新科議員就話， 佢自己同政助嘅聯繫都算係緊密，有咩相關議題都會交流。佢話可能自己本身就係政治素人，撞啱佢坐嘅委員會，對口嘅政助亦都係素人，大家咁上下料子，自然就啱傾啲。不過佢亦都認同，政助今時今日嘅角色真係可有可無，「雖然我無經歷過以前嘅光景，但依家真係行政主導得好緊要，有啲大政策，政府最多都係解釋畀你聽，好多時都仲要係秘書長等等公務員去做解說，而政府根本從來都無關心過我哋議員嘅睇法，事關89位議員，有幾多人夠膽反對政府嘅議案？咁嘅環境之下，基本上係無乜政治工作可言！」

　　設立政助本來有另一個目的，就係幫政府培育政治人才，但係縱觀咁多年，又有幾多個人才走咗出嚟？有無人由政助上到去做局長？政助係「過剩」定係「多餘」，相信讀者有自己嘅睇法。