世事政情

　　最新一份《財政預算案》周三公布，相信最令人意外嘅就係，財政司司長陳茂波宣布樓市全面撤辣，同之前吹晒風話會逐步減辣有明顯分別。有政圈中人就話，去到《預算案》公布嗰一朝早，政圈好多都已經知道部分內容，包括酒店房租稅同高薪族加稅等等，但就一直收唔到有關撤辣嘅風，充分顯示波叔係去到差唔多最後一刻，先決定落實全面撤辣呢個方案，而當中最關鍵嘅，應該就係夏寶龍主任訪港。

　　中國僑聯副主席盧文端今日亦喺報章撰文，指國務院港澳辦主任夏寶龍，選擇喺特區政府將公布《預算案》同《基本法》23條立法公眾諮詢快將結束前來港，係特別針對性。好多評論都話，夏主任訪港以處理經濟問題為頭等大事，而盧更加指出，《預算案》提出樓市撤辣，係獲得中央支持。佢話中央關注香港國際金融中心地位，香港金融市場正面臨投資萎縮、資金外流、股市不斷跌破心理關口嘅困境，引起中央高度重視。政圈中人直言，從唔少脈絡都可以睇得到，波叔係因為得到代表阿爺嘅夏主任許可，而決定放手一博。

夏寶龍2月27日在李家超陪同下，與經濟專家討論香港經濟發展策略。（政府新聞處圖片）

　　特首李家超去年10月公布《施政報告》時只係減辣，重點係容許外來人才買樓可以先免後徵，而政策一落實，聽講都有超過500單申請，證明政策係受歡迎。按照政治倫理，短短五個月時間唔到，物業市場雖然係無乜起色，但亦未至於係失速下跌，波叔理應係跟番呢個減辣步伐，但《預算案》竟然全面撤辣，等同醒咗兩個耳光畀超哥，如果唔係「上頭」批准，畀個豹子膽波叔，佢都應該唔敢。所以《預算案》出爐之前，雖然唔少政黨都係撐全面撤辣，但亦有不少組織同團體出來帶風向支持減辣，充分顯示當時政府係喺背後放風，減低市場對撤辣嘅預期。

　　政圈中人指出，香港經濟出現結構性改變係中央最關注嘅問題，而夏主任訪港，仲要揀正喺《預算案》公布之後先離開，正正係顯示中央嘅關注點。波叔臨門一腳決定全面撤辣，推倒超哥五個月前嘅睇法，最大可能就係阿爺聽到各方面嘅利害關係之後，最終拍板落實。

　　不過政圈中人亦都指出，波叔必定知道撤辣未必係靈丹妙藥，等於當日推出一連串辣招想杜絕炒賣為樓市降溫，但市場力量仍然係非常龐大；依家撤辣亦不等於可以為樓價帶來支持，最終都係要經濟好轉、資金流入，咁先會對樓市有支持。至於後市係點走，政圈中人就話，最好就係睇吓地主未來半年投地嘅信心去到咩位置。

　　有媒體日前刊登咗一篇政壇花絮，話今屆立法會同政府關係非常良好，甚至有議席出缺，對立法會運作都完全無影響，議員「多一個都唔多」；更加借住呢個議題，指明年年底立法會選舉可能會大換血，估計有三分一現任議員離任，包括「自然流失」，如資深議員因年齡、黨內交棒退下火線，亦有議員涉及表現等不同因素。文章仲點名三位議員：謝偉俊、蘇長榮同林素蔚。

　　文章一出，立即喺政壇瘋傳。被指「太有個性」、喺現屆議會之中「格格不入」嘅謝偉俊，議會經驗豐富，亦都算得上係稱職嘅議員，對於文章所講，佢四兩撥千斤咁回應一句：「係咪格格都入就好呢？」絕對睇得出佢爐火純青嘅程度。至於蘇同林就被指表現欠佳，兩人都已經親自向其他媒體解釋，Tina都不再詳述。

　　不過呢篇文章亦帶出一個問題，就係來年會有幾多人冧莊繼續做落去呢？Tina亦借機會向多位議員打聽，佢哋有一個睇法係幾一致嘅，就係文章所講嘅「三分一無得連任」應該都係太保守，估計數字遠超三分一。其中一位資深議員分析，香港面臨新形勢、新局面，係極需要新思維，一批舊議員（佢自己都話可能包括佢自己）其實都好可能功成身退，讓路畀新人，將朝氣帶入議會。

有政圈中人認為，香港面臨新形勢、新局面，議會極需要新思維。(iStock)

　　嗰個資深議員仲認為，的確有部分議員喺議會工作上嘅表現同各方期望有落差，特別係部分選委界別議員，「不過又好難怪佢哋，依家每個議題，每個黨都會有固定發言人，涉及一啲行業嘅嘢又有功能組別議員去睇住，選委會界別議員要出位唔容易，太過進取敢言又好易講錯說話，所以唯一敢言嘅江玉歡可以跑得出，市民對佢嘅認知度相信亦係最高，但其他議員要出位真係好困難，做唔到成績，某程度上亦都係『制度』問題。」

　　另一位議員就指出，有部分議員都係當日「臨危受命」上陣參選，本身佢哋工作或者業務就已經繁重，本來對政治地位都無乜特別要求，但要佢哋兼顧咁多議會工作，確實令到佢哋左右做人難，「有唔少議員都私下抱怨，如果要做到『高層』所要求嘅KPI，喺議會要花上唔少時間，呢個係佢哋事先無估計到，所以最少十個八個現任議員都會係因為呢個原因而喺下屆拜拜，如果連同新丁加入競爭，三分一離任實在係太保守！」