世事政情

　　新時代就有新效率，完善咗選舉制度嘅立法會，亦都非常罕有咁畀大家欣賞吓，咩叫「高效率」。行政會議噚日（7日）先通過23條立法刊憲，即日立法會主席就已經宣布今日（8日）臨時召開立法會會議，淨係就住23條立法提出首讀同二讀，而立法會嘅相關小組委員亦都搖身一變成為法案委員會，同日下午開始審議相關條文。效率之高，前所未見。

　　有政界中人就話，一般來講，政府法例刊憲之後，其實就已經可以安排喺立法會首讀同二讀，由於下星期三（13日）本身都已經有會議，正常來講，下星期三進行首讀同二讀亦都係非常正常，「真係睇唔到下星期三同今日進行首讀同二讀有咩大分別，其實都只係短咗五日時間，而喺整個立法過程之中，五日真係微不足道」。

　　另外有立會中人透露，本身下星期三係無立法會會議，因為預期北京正進行兩會，後來知道兩會喺星期一（11日）閉幕，立法會主席梁君彥早兩星期就話經過重新調配之後，會喺下星期三開番立法會。當時大家就估計，好大可能同遷就23條立法進行首讀同二讀有關，「既然都加番個會喺13號，點解唔索性留番13號先一次過呢？唯一解釋，就係阿爺下命令『快』，所以政府同立法會就罕見咁高效配合」。

23條立法忽然加速，立法會罕有地高效率配合。（資料圖片）

　　立法會各黨派都不約而同咁話，大家都係最後一刻先被通知，要喺今日加開立法會會議首讀同二讀，證明背後各方勢力都係熱鍋上嘅螞蟻。普遍嘅估量就係，阿爺唔希望立法期間節外生枝，特別係歐美政府先後就23條立法開聲反對，海外媒體更加刊登一啲令到特區政府尷尬嘅報道，所以就要盡快立法。有立法會議員私底下仲用周星馳電影《功夫》裏面一句經典台詞「天下武功，無堅不摧，唯快不破」去形容，認為今次立法只能夠「快」，先帶來「定」。

　　照現時嘅脈絡，立會中人估計，法案委員會審議完之後會交上內會報告，再去立法會恢復二讀辯論同三讀，正路4月10日嘅會議應該可以處理完成，再快手啲，甚至喺3月27日就已經成功立法。有立法會議員相信，恢復二讀辯論，所有議員都會起身發言，但問題就係，究竟會有幾多個議員嘅發言能夠發揮到「辯論」嘅精髓，提出「反方」嘅意見呢？

　　每年《財政預算案》，每位立法會議員都會入大約40條問題，詢問各個政策局各項政策嘅開支使費等等，周不時都會有啲精警嘅提問。近日無啦啦翻起嘅一條，就係由近來多次被人「點名」嘅資深議員謝偉俊提出，佢質疑政府管治架構中嘅政治助理職位「過剩」，問政府可唔可以縮減人數節省開支。喺依家財政緊絀嘅環境下，謝偉俊嘅問題可以話係切中要害，事關的確無幾多市民知道，呢班閒閒哋10萬月薪嘅政助邊個打邊個，更加唔知佢哋究竟有咩工作要做。

　　政助一職喺2007年10月，即係曾蔭權年代提出，連同副局長呢個新職位，協助局長處理政治事務。政助最核心嘅工作就係收集立法會同持份者嘅立場取態，然後提出推銷政策嘅辦法。咁當年立法會泛民同建制好多問題嘅立場固之然南轅北轍，政治游說工作的確係需要，政助嘅設立的確可以幫輕吓局長沉重嘅工作。

　　但係到咗今時今日，喺完善咗嘅政治制度下，政助嘅角色就真係跌得低過幾個月前嘅恒指。有一位資深議員同Tina講，可能佢自己係比較資深嘅關係，有任何問題，佢都係直接搵副局長或者局長，所以呢屆立法會以來，真係甚少同政助溝通，最多都係覆幾個簡短嘅WhatsApp，「我唔知佢仲有無其他嘢做，如果單單係同我嘅溝通方式，唔會值10萬蚊一個月囉！」

在現今政治環境下，月薪逾10萬元的政治助理重要性存疑。(Shutterstock)

　　另一位新科議員就話， 佢自己同政助嘅聯繫都算係緊密，有咩相關議題都會交流。佢話可能自己本身就係政治素人，撞啱佢坐嘅委員會，對口嘅政助亦都係素人，大家咁上下料子，自然就啱傾啲。不過佢亦都認同，政助今時今日嘅角色真係可有可無，「雖然我無經歷過以前嘅光景，但依家真係行政主導得好緊要，有啲大政策，政府最多都係解釋畀你聽，好多時都仲要係秘書長等等公務員去做解說，而政府根本從來都無關心過我哋議員嘅睇法，事關89位議員，有幾多人夠膽反對政府嘅議案？咁嘅環境之下，基本上係無乜政治工作可言！」

　　設立政助本來有另一個目的，就係幫政府培育政治人才，但係縱觀咁多年，又有幾多個人才走咗出嚟？有無人由政助上到去做局長？政助係「過剩」定係「多餘」，相信讀者有自己嘅睇法。