世事政情

　　做記者的時候，我有幾年常跑台灣新聞，由立法院到市長到總統選舉，去過不知幾多場造勢大會，總是百看不厭。即使退了役，離開了職場，到總統選舉日子，還是會心思思，有一年，我就跟外子特別飛去台北觀戰。

　　最初外子不明白，我們又不是當地人，幾乎不知參選者是「乜水」，這些造勢大會你都去過幾十遍，為甚麼仍雀躍？我說：身處其中你就明。

　　結果，在造勢大會上捨不得走的是他，四年後另一場總統選舉，提出再赴台觀戰的也是他。

　　造勢大會，焦點是一個「造」字，熟手的，往往能在一夜之間成功造神，像邪教一樣，瞬間感染萬民。我有過很深體會，從前無論在藍營還是綠營的造勢大會，我都有一剎感覺：他/她能選上就好了！雖然，那個他或者她其實跟我半點關係都沒有。

　　所以，當大家以為那夜在愛丁堡廣場向曾俊華搖著手機電筒的三千五百人就是民意，那就太天真了。

　　哪一個熱戀中的男人不是「托塔」都應承你？哪一個求愛中的對象不是對你溫言婉語，用最好的一面來示你？更何況，三千五又怎能代表七百萬人？

　　出席晚會的人都說感動，站在高處的曾俊華亦說自己被打動，他們的口號是大家一起發一場夢。一切都是情緒，就像兩年多前的佔中，同一個地方、同一班人，沒有想過別人，沒有想過後果，感覺來了，就躺在路上、築個帳篷，幕天蓆地，一起發夢。

　　那夜看曾俊華在佔中地重召一群黃絲帶說著「毋忘初衷」之類的台詞，我們彷彿看到一幕《天若有情》。

　　那是我成長年代一齣發夢的電影，劇情是吳倩蓮飾演的有錢女邂逅愛飛車的飛仔劉德華的故事。這兩個月，我們看到曾俊華跟反對派漸漸走在同道上，就像一個有錢女跟著爛仔去私奔，還騎上他的電單車橫衝直撞飊車去。

　　由殖民地高官搖身一變成了「民主之父」，敗選之後，曾俊華勢必成為反對派力捧的新偶像——一個棄明投暗的陳方安生2.0，不過，感覺良好的同時，請別忘了《天若有情》的結局，飛仔最終是車毀人亡的。

 　　星期日（26日）就係特首選舉投票日，新一屆特首即將誕生。睇民意調查可以話係「兩」面倒，其中一面就係支持邊個做特首，曾俊華贏晒；而有一個民調，更係無論年紀、學歷各階層，都係曾俊華民望高過林鄭月娥。另一面係覺得邊個會做到特首，林鄭月娥就贏開巷。呢個「兩面倒」嘅民調，真係充滿香港特色，亦都係特首選舉制度下嘅必然產物。

　　林鄭坐定粒六真係無咩懸念，相信佢都已經諗好晒當選感言，但係背後操盤嘅仍然大為緊張，絕唔會當正林鄭穩勝，務求滴水不漏。

　　有媒體就報道，中央政治局委員、統戰部部長孫春蘭已經移師至深圳督師，並且同一班建制派領袖見面，要求造好選委嘅「指導」工作。另外亦有傳港澳體系話事人、全國人大委員長張德江都喺深圳一齊領軍打呢場選戰。

　　有一位建制派選委就同Tina爆料，話香港中聯辦都不敢怠慢，統戰工作已經由部長級升到上去主任級，中聯辦主任張曉明更加親自致電部分親中選委，用上「半訓話」式語調要求選委喺投票時要思想正確，緊隨路線。

　　呢位選委就話：「聽聞有一位已經畀林鄭提名票嘅超級親中選委，比較少就投票表達意見，甚至喺業界選舉研討會都唔現身，結果張主任就親自致電『問候』，仲要係唔多客氣，問佢『你是否有異心？』。呢位親中選委一心都係諗住支持林鄭，即時同張主任解釋清楚自己立場如一。自己只係比較低調，點知竟然被視為意志唔得堅定，佢講起都有少少不忿。」

　　建制派選委仲話，西環喺選舉前呢兩日，按照手上面嘅名單分開不同「危險等級」去處理，屬安全等級嘅，可能唔使打招呼；危險度一級嘅，就由所屬界別嘅部長出動箍票；危險級別最高嘅，就會由高級領導層包括張曉明，甚至係港澳辦主任王光亞等等，親自致電傳達阿爺嘅意旨。

　　以西環咁高規格嘅箍票行動去睇，同有傳媒話習大大無指定人選相比，好明顯傳聞嘅可信程度唔多高。就等星期日揭盅啦！