世事政情

　　講一句大話騙人，照理不算犯罪，否則我們對著肥女人說你不胖，對著醜女說你好靚，通通都要被關進天牢。

　　甚麼情況下講大話屬犯法？應該是以謊言來騙取一些東西，譬如錢，那就是騙案了。但如果騙的不是錢，是刑罰、是自由；騙的不是普通人，是法官、是執法者，又如何呢？前幾天，就有個現例了。

　　立法會議員區諾軒去年在暴亂中以揚聲器在警察耳邊講話並敲打警方盾牌，上星期被裁定兩項襲警罪成，被判140小時社會服務令。裁判官梁嘉琪表示，區諾軒是初犯，態度合作，對當時行為有悔意並願意負責，加上兩項襲警都屬同一事件，故只判處社會服務令。

　　逃過牢獄之災的區諾軒，一步出法院門口便露出本來面目，說從沒想過罪成，「一刻都沒想過」，他更認為自己是「法治的受害者」，亦聲明上訴到底。

　　庭上，辯方律師明明說，區諾軒有悔意，重犯的機會近乎零，又遞上一大堆求情信，還說了個荒誕求情理由：區諾軒9月打算到日本讀博士課程，故不能坐牢，即使是社會服務令也希望能在9月前完成。結果，法官照單全收，把區諾軒輕判了。

　　然而，區諾軒一判完就變臉，就推翻法庭內所說的一切，他雖逃過了襲警案的牢獄，但逃得過欺騙法官的新罪嗎？

　　我們看電影常有這幕，所有法庭內的作證者，說話前都要手按聖經唸出一段誓言，表明所作證供絕對真確無誤。這次區諾軒庭內庭外兩個樣，擺明就是欺騙法官換取輕判，是一幕眾目睽睽的公然詐騙。

　　一個曾經的立法會議員竟如此玩弄法官，該當何罪？試想想，假如有個被告向法官求情說剛剛死了老豆，希望法官不要判監讓他可去送葬，然後法官信了，判他社會服務令，誰知被告一步出法庭，老豆已在庭外等候，還一起去飲茶慶祝，這就是有證有據的講大話呃輕判，原罪逃了，行騙的新罪難饒，法官可改判即時收監。

　　你放他一馬，他當你傻仔，原來今日香港的無法無天不單是法治受損，而是連法官都樂於接受公然被騙。

　　自從新一屆特區政府上場以來，先不論政績，單從政府官員嘅態度，就可以睇得出行政有幾咁主導，面對一啲對政府嘅不實批評，官員回應硬過石頭，絕對不留情面，稱得上係「戰狼式」回應。

　　剛剛就發生另一單同類事件。

沙中線紅磡站於2018年被揭發剪斷鋼筋醜聞。 （資料圖片）

　　話說港鐵沙中線紅磡站於2018年5月被揭發剪斷鋼筋醜聞，總承建商禮頓被控違反《建築物條例》，嚴重偏離獲批准圖則，搞到成鍋粥但最後今個星期二只係被法院判罰款4萬元。法庭作出裁決之後，政府粒聲未出，到第二日一直有跟進沙中線工程問題嘅中科監察主席潘焯鴻，以及一向關注事件嘅立法會議員田北辰，喺電台節目中評論事件時，分別引述傳言指政府不希望港鐵披捲入檢控，仲話政府好可能已停止跟進事件。

　　兩人回應一出，政府大內宣機器立即運作，即日發出措辭強硬聲明，駁斥有關沙中線工程質量事件調查工作言論失實，並不點名批評二人言論「完全是無中生有和不負責任」，批評說法「全無事實根據，居心叵測，政府一定直斥其非，以正視聽。任何試圖揑造事實抹黑政府的行為，不會得逞」。屋宇署亦都重申，正與律政司研究判刑，考慮會唔會作出上訴。

　　措詞用到咁強硬，令唔少市民覺得同政府駁斥港獨嘅力度差唔多，似乎係過重，仲要係對建制陣營嘅田北辰發重炮，政界當時都百思不得其解。更有趣嘅係，有傳媒就引述消息話，政府強硬回應，其實只係針對潘焯鴻，事後亦有高官親自向田北辰解釋，並且同田北辰達成諒解。

　　政府「戰狼式」回應，近呢一年半載市民其實都已經習慣晒，本身問題係不大嘅。但如果真係如傳媒所講，寫回應嘅人其實只係無為意相關言論究竟出自何人之口，反而呢個就帶來另一個問題。假如寫嘅人落筆之前確認到有關言論真係田議員所講，咁佢最後係咪會用另一種更溫和嘅說法？定係連回應田議員說話都唔回呢？如果係咁，政府係唔係對人不對事呢？同一番說話由兩把口講出來，政府回應可以大不同？呢個就真係令大家感到可怕。

　　而事實上，政府只要係法庭作出裁決之後立即發聲明話會研究判刑同會唔會作出上訴，Tina相信潘田兩人亦未必會作出同一番嘅抨論，某程度上，政府「延遲」回應令到各方有所猜測，責任其實係喺政府身上。Tina但願政府能夠將「戰狼」性格放喺社會更多不公義嘅地方，做好實事好過事後回應補鑊。