職場

　　上回提到，要寫到一手好LinkedIn，一啲合適而又「Search Friendly」嘅Keywords係十分重要，一來可以提升你LinkedIn嘅 Searchability，二來可以令僱主快捷地了解你，知道你係咪佢要搵嘅人。除此之外，LinkedIn嘅寫作格式同人脈都幾重要。

千字文可免則免

　　有啲人習慣寫LinkedIn會寫到好長篇，每一個段落都係一篇千字文，希望可以增加Keyword嘅數量，但咁樣其實未必一定啱，除非你真係文彩飛揚，寫得一手好字，如果唔係呢啲千字文會令僱主睇得有啲辛苦。

　　所以LinkedIn內文長短嚟講，建議第一段自我簡介可以採用段落形式，寫長少少少少都Ok，但都盡量唔好寫千字文。之後每份工作嘅內文，可以先用一兩句話作呢份工嘅Conclusion，然後用Point Form列出重點，每點幾句，無須太長氣，點到即止就足夠，但亦唔可以真係簡單幾隻字寫完就算，要拿捏得宜。

　　記住寫LinkedIn 嘅目的係要令僱主快快地了解你、認識你，幫僱主進行初步嘅配對，之後如果僱主真係睇中你的話，多數都要你再Submit 一份詳盡啲嘅CV同Portfolio，或者約見面詳談，到時你想講幾耐都得啦。當然，有啲較特別嘅工種如Copywriter（撰稿員）、翻譯員等，寫作方法又可以好唔一樣，咁又另作別論。

儲人脈、儲Endorsements

　　成日都講「識人好過識字」，同樣道理，LinkedIn嘅人脈都好重要，亦因為咁有啲人會四圍亂Add其他人，唔同國家、冇相關係行業都Add一餐，有「量」冇「質」。其實並唔係話LinkedIn Connection多就代表勁，但如果你出嚟做咗嘢幾年，LinkedIn都係得10個8個Connection，又未免怪咗少少。除咗可以Add 新／舊同事、新／舊老細之外，亦可以Add一啲Headhunter同埋行家／前輩，適當時候亦可以試下毛遂自薦，PM Send份CV過去碰下運氣，呢啲都係LinkedIn常用嘅方法，就算今次佢公司唔請人，但下次請人嘅時候就有機會記得你。另一方面，你嘅人脈廣的話，相對地亦會提升你Profile嘅 Searchability。

　　儲完人脈，之後就要儲佢哋俾你嘅Endorsements。正常嚟計，僱主睇完你嘅LinkedIn Summary同每份工作嘅詳細資料後，已經80%能夠確認你係咪佢嘅適合人選，而Endorsements 就係用嚟喺最後加多一把，增加你嘅公信力，Differentiate你同其他LinkedIn求職者嘅分別。另外，每次你離職或者有同事離職時，除咗記得交換Contact同Facebook之外，不妨俾埋個LinkedIn對方，一方面可以睇下將來有冇合作機會，另一方面亦有機會儲下Endorsements，一舉兩得～ 但切記，你係「儲」Endorsement，千萬唔好「乞」Endorsement，咁樣就變得冇晒意義。

Revise、測試、再Revise、再測試

　　寫完LinkedIn後並唔代表搞掂，其實你每次Update野LinkedIn都需要時間將你啲資料流通，所以記得Update之後過一輪就要測試下，不停咁Revise、測試、Revise、測試，務求將自己個Profile嘅Searchability提升至最高，當作係一個長線嘅投資。

　　當一個機會同自己擦肩而過嘅時候，大家永遠只會為自己辯護「這些機會不是屬於我的」。職場上，如果你想喺眾多人中脫穎而出、搵一份好工或者被一份好工搵倒你，就唔可以放過每一個機會。今日開始準備好你嘅LinkedIn，這些機會是屬於你的～

　　AI、Web3.0 盛行同資訊愈來愈發達，令近年多咗人利用創科為創業夢。加上不少成功企業CEO 形象鮮明突出，創業精神亦鼓勵年輕人創業。但好多人都不小心將所謂創業家精神扭曲，全心創業但就欠實際有用行動，心態同能力都不佳而令創業成功率十分低。

　　第一類較常見情況係巿場上多咗「時令」嘅創業家。由早年社交媒體、後來電商，到今天嘅 AI ，每段時間都會出現當時流行數碼專家或創業家。而AI 去年更大行其道，令情況比以前更甚。好多利用 AI 名義創立公司，呢類創業家著眼點並不在於自身生意，重點只想瘋狂建立人脈，然後再利用人脈賺錢。佢哋會喺LinkedIn 上不停add人，參加不同Business、Marketing Event 派卡片，不問對方是否同自身生意有關，亦唔會理對方技能是否專業，只希望短時間內建立強大人脈網。

　　其實目的可分兩類，首先因佢哋創業時生意上未有實際內容同方案，只有一個大方向，未知如何處理。所以希望建立人脈作「釣魚」用途，當搵到有用人才或有點子後，就會提出同他人合作一齊建立對方嘅生意，最後變成合伙人。第二因為時令潮流實在太新，好多公司尤其係中少企根本唔了解實際情況。佢哋可以從建立好嘅人脈網中，搵到合適人才作配對，情況有如中介人角色般。雖然難以評論佢哋嘅工作，但因為佢哋不停去識人，又未有識啱人，只想推谷自己個人品牌、人氣，最後令人有種不務正業嘅感覺。

　　另外近年亦多咗「假門面」網店。社交媒體同買賣平台十分方便，加上建立網站愈來愈簡單，利用網店賣產品成為大眾創業首選。見不少人到外地、國內購入大量產品，一心以為只要放上網就會有生意，但因欠缺營商策略、巿場定位、廣告宣傳等而令網店無人問津。最後好多網店會利用AI 工具或刷流量公司幫手刷單，希望提高網店信譽度同銷售量。呢類情況喺節日旺季更為嚴重，刷單更慢慢變成巿場習慣。

　　雖然近年不少電商平台已加強措施防止刷單情況，但至今刷流量、刷單公司仍然活躍，一間國際刷流量公司高峰期更有數十萬「刷手」，証明巿場需求甚大。但其實刷流量並不化算，現時網店刷單後真正營利都十分低，大約最多只有20% 至30% 單數來自真買家，當中包括不少售後退貨情況，令成本加重。與此同時，刷單商戶亦有機會被電商平台發現，最後得不償失。

　　隨著潮流去創業係好事，潛力同爆發力一定高。但總不能只係靠潮流或AI 旗號而忽略實業，要有策略同獨有優勢先係創業王道。