職場

　　成功嘅生意好多時都係嚟自一個古靈精怪嘅念頭，而創業團隊係創業嘅初期，經常會隨口噏咁一齊「拋橋」，不過好多人都會習慣快快地將一啲自己認為古怪、唔可行嘅idea剔走，但可能因為咁，就錯過咗一個創業嘅良機。

　　喺外國就有創業家鍾意利用呢啲古怪idea有策略地創業（當然都有好多創業家係亂嚟～），呢班人唔係傻、亦唔係太得閒，佢哋多數早已經有自己主線嘅創業生意，而呢啲「古怪生意」只係佢哋嘅二線創業生意，亦係佢哋成盤企業中嘅「藍海」。好多時二線生意唔會只得一個，有時會「漁翁撒網」，有時亦會「一個接一個」。而創業家開始嘅時候，其實都會抱住少少預咗唔成功嘅心態，同時間佢哋亦會早早定下「離場時間」，確保唔會蝕入肉。當中以下六間古怪公司，唔知大家以前又有冇諗過呢啲怪念頭呢～

　　rent the chicken

母雞出租

　　呢盤生意雖然係怪怪地，但呢間公司係真真正正地做到「一雞兩味」，而且仲係一盤賺錢嘅生意。

　　為咗滿足顧客對有機食品嘅需求，外國有公司早年推出咗「母雞出租」服務，只需US$400-900，就會有專人送雞到你屋企，當中包括2至4隻就嚟生蛋嘅母雞、大約5至6個月嘅飼料、說明書、一間小屋等工具，而母雞生出嚟蛋全部歸你所有。出租母雞除咗可以讓你享用有機雞蛋同幾個月養雞嘅樂趣之外，佢哋仲有出租「孵蛋」服務，出租一啲能夠孵出小雞嘅蛋比顧客，等你可以見證小雞出生嘅一刻。可能大家會覺得用US$400蚊去租兩隻雞仲貴過自己比錢買，但如果你只係三分鐘熱度的話、只想體驗下的話，「租」一定比「買」更好。而另一樣我較為欣賞嘅地方係，佢哋亦會提供老人服務，小動物嘅陪伴或者見證生命嘅誕生，往往對獨居老人或者病患老人嚟講，有時候可能更勝一切藥物。

執手尾服務　

　　外國人好鍾意搞House Party，由其係學生哥同後生仔，Party後懶得執手尾，亦唔想父母知道昨晚Party轟烈嘅情景，所以呢類嘅服務絕對有佢哋嘅存在價值。

　　只要輸入昨晚參加Party嘅人數，屋企有幾多房間／廁所等資料，就會計算出多少服務費。佢仲有一個value added 嘅服務，就係佢哋會有早餐外賣服務，當你醉醒食完早餐後，佢哋已經幫你間屋還原，真係超細心。另一方面，外國仲有一種另類執手尾服務叫「Crime Scene Cleaners（犯罪現場清潔服務）」，佢哋專幫人清理奇怪場景／案發現場，例如清理凶案現場嘅「廢物」，清潔一地鮮血嘅客廳，清除指模或者生化物等等。當不幸地發生意外，一來你唔會想再次見倒案發現場，二來你亦唔識如何處理／清潔現場，而呢類服務某情度上真係幫倒人解決某啲心理障礙等嘅問題，古怪得嚟又有其價值。

天堂訂座

　　細個時同朋友講笑話「打電話去天堂／地獄留返個位比你」，但原來真係有人會咁做～ 

 heaven-ticket-first

　　喺2011年有公司推出天堂訂座服務，只需服務費約US$15，你就可以擁有一張「official」嘅訂座證書、 「official」嘅ID card、使用說明書及導航（佢話唔係講緊GPS導航，但真係好想知係乜野導航系統可以帶你上天堂咁架勢）。重點係，該公司100% guarantee訂座成功，否則原銀奉還。一個價錢，可以幫你或者朋友買一個安心，其實當生日禮物送比朋友真係一流。（待續）

　　「衣食住行」以外，「性」應該係第五大必需品，亦係一個好大潛力嘅行業。當然，講緊所有同性相關嘅行業必定要合法，當中性玩具、性用品、交友平台等，係近年一個好大、開發中嘅商機。而喺性呢個範域裏，另一個潛力無比，但又經常被忽視嘅segment，就係LGBT（Lesbian、Gay、Bisexual、Transgender）。

　　傳統文化觀念嘅枷鎖，以前大多數亞洲人都對LGBT較為反感，而呢個話題只係近幾年先開始較為多人留意同接受。十年前你好難會見到有同性戀者喺街上拖手，不過近年已經漸漸愈來愈多。雖然亞洲喺呢件事上比較「落後」，但其實呢一個市場早喺7至8年前已經被商人注重，除咗因為呢個市場嘅人口極速增加之外，佢哋嘅消費能力仲愈來愈厲害。

　　以亞洲區為例，有數據指，LGBT佔中國人口大約有5%，日本約7.6%，而全世界就估計約有5%至10%。相信當社會接受程度愈來愈高時，人口就會急劇增長，同時會有年輕化嘅趨勢。

　　另一方面，LGBT人口平均收入亦比較高。早年有數據指，中國六、七千萬LGBT人口中，佢哋嘅平均月薪約$10,300，對比當年中國一、二線城市人均月薪只得$4,000-6,000，LGBT人口喺呢方面已經係超晒班。而大部分LGBT人口多數係「Dual Income, No Kids」（DINK）， 佢哋未必會領養小朋友，但同時有兩份高收入，所以經濟壓力相對地細，消費模式亦唔同，會花較多嘅金錢喺旅遊、美容、時裝等，屬於一班高消費、享樂型客群。而且愈來愈多LGTB交友平台出現，令佢哋好集中，營銷命中率較高，同時佢哋嘅凝聚力較強，令導向式銷售策略對該客群更能發揮最大效果。

　　其實好多舊有行業已經開始步入衰退 / 樽頸位，可能繼續賺錢但未必有太大突破，所以佢哋都開始慢慢改變緊目標客群同方針。肯花錢買化妝品未必再係女士嘅專利，而女士對名車嘅需求亦慢慢增加。喺一個經濟不穏嘅時代裏，老闆們更加需要開闢一個新藍海。