【超共鳴】祈禱返工日子快點完！浮沉在期望與失望之間
#職場 #上班族人在職場，每朝返工，大家總有唔少期待。
朝早起身返工，期待老細今日sick leave；到朝早11點幾，就期待放lunch，諗定今日食壽司定茶記；食完晏，買杯珍珠奶茶返公司坐低，就開始期待6點鐘放工。但一日完結之後，打工仔仲有咩係值得期待？
有！
星期一期待星期五，6月就期待暑假去旅行，踏入7月就期待打八號風球唔駛返工。11月就望聖誕節快啲嚟，5月就估下可以攞幾多bonus。但一年完結之後，打工仔仲有咩係值得期待？
仲有！
我哋時不時都會期待有一日，有一個舊老細打畀自己，出多30%人工請自己過檔；有時更期待（或幻想）下期金多寶，最少可以中五個字，印印腳去個旅行充電。有時仲會期待自己買入嘅股票爆升50%，然後買樓收租。
期待、期待，再期待，每年、每月、每日、每分、每秒，打工仔都喺度期待，但我哋時時刻刻期待緊嘅，又係咪我哋真正想要嘅嘢？
如果嘗試將以上嘅期望歸類，原來好多打工仔期待緊嘅嘢，都係希望返工嘅日子快啲完，放假（或者唔駛做）嘅日子快啲嚟。換個角度睇，原來大家覺得返工「天天也在捱」，所以「小事」如打風放早兩個鐘都可以令打工仔討論個半天。
而好多時呢啲期待帶畀我哋嘅開心都唔會維持得耐。試想想，當你老細今朝真係sick leave，你開心嘅情緒可能只會維持office hour嗰八小時。放工後，你又會開始問「唔知老細病好未呢？聽日佢仲會唔會抖呢？」
期待、開心、失落、再期待，喺好多打工仔生活中每日不斷循環。
好多人就係被呢啲循環牽引著自己嘅情緒，返工嘅大小軼事好容易令自己開心或者失落。
究竟係因為工作性質唔適合自己、同事對自己好差，抑或上司係咁捽數，而令大家要將自己返工嘅重點放喺一啲相對「小事」上？
「愈是期待愈是美麗」。期待其實係一種推動力，為自己所嚮往嘅將來而努力，鞭策自己，嘗試將自己推向極限。
你的期望如何，你將來的日子也可能如何：你可以以無憂生活而努力、你可以以獲取工作上嘅成功感而奮鬥，你亦可以以成為manager嘅優越感而往上爬。當然，你亦可以選擇繼續以上文所描述，期盼老細sick leave、打風唔駛返工而禱告。