職場

　　用戶體驗 / UX （User Experience）喺現今產品/ 服務設計中扮演著十分重要嘅角色，好嘅設計能夠改善使用體驗之外，亦可以改變大眾消費模式，從而令公司增加利潤。其實UX多年前已融入生活當中，簡單如「左上右落」、「男左女右」設計概念，早已經喺道路、扶手電梯、洗手間等設計中反映出來。

　　大眾對UX嘅解讀方法有好多，而要造就一個好嘅用戶體驗，從宏觀上看可分三大方向分析同處理，「Business Design」、「Journey Design」、「Usability Design」。「Business Design」重點放於整個生意如何創建，意思係要先搵出巿場上嘅盲點同需求，再配合用戶體驗思維、科技同創意，去設計出全新產品/ 服務推出巿場。近年盛行「電召私家車」App 同「外賣」App 就係一個好好例子。創辦人了解公共交通工具/ 餐廳嘅痛點，知道用家真正需要，再配合手機App去連繫用家、商家同服務提供者，解決問題時亦造出雙/ 三贏局面，所以推出後大受歡迎。

（網上圖片）

　　而「Journey Design」重點係整個流程中不同事件嘅安排。用家喺使用產品/ 服務前/ 中/ 後整個流程，如何設計每個步驟先後次序、如何配合唔同場景嘅出現次數同內容、如何於時間上作最好安排等等，都係Jounery Design。其實呢類設計經常喺日常生活出現，當中「三次點擊法則」就係其中一個常用於手機同手機App設計概念，而Apple於設計iPhone時亦有使用「三次點擊法則」，其意思係希望用家能夠於三次點擊內達成目標。有研究指如果三次點擊後未能夠達成目標，用家開始缺乏耐性，會感到挫敗繼而放棄。所以設計師喺流程上嘅安排、每次畫面上表達多少訊息等都花盡工夫。不過順帶一提，雖然「三次」法則被廣泛使用，但近年漸漸開始受到質疑，因設計師為減少點擊次數而令事情變得更麻煩，近年更有研究指「四次」效果比「三次」好。所以設計重點並不在於兩、三、四次，而係每次點擊嘅原因同出現內容，都要有其意義，先能夠帶領用家經舒服地完成整個流程。

　　最後「Usability Design」，重點係如何將好嘅用戶體驗同視覺界面（UI/ User Interface）取得平衡。用家使用產品/ 服務當刻，每一個細節位如按鈕位置、產品大小、文字內容及出處等等，美觀之餘亦要簡單易用。最常見例子係，當大家使用手機App時，常用按鈕會放置於手指公附近，方便用家單手操作。而喺內容資訊為主嘅網頁中，較重要嘅內容都放於左上方，配合大部分人左到右嘅書寫同閱讀習慣。

　　隨著科技同時代嘅改變，以上三個設計概念亦會出現不同變化。但不變嘅事情係，當設計一個好嘅用戶體驗時，必需層層遞進地觀察、分析同設計，先能達至最佳效果。用戶體驗除咗係一種生活嘅美學，更係一種改變思維同習慣嘅學問。

　　「阿媽係女人」點解？唔使解喇啩。

　　近期見到不少人討論官場及政治圈的現象，小弟直覺反應，全部是「阿媽係女人」般的理所當然，不單唔稀奇，反之，「唔係咁至奇」！

古今中外的官場，皆充斥馬房文化，此乃「正常」而非「反常」，香港當然不例外。

　　擺上枱面，個個領袖都強調自己公平公正不偏不倚，只針對事而不針對人，故此，必定用人唯才。

　　係真唔係真？若果你「新嚟嘅」，初初踏入職場，有如此天真想法，正常。

　　但若你打咗三五七年工，仍天真地相信，咁就真係幫你唔到嘞，sorry。

鐵的衙門流水的官，無論是特首或政務司司長，要被換時，就要主動或被動下台。

　　江湖中人全部收到風，官場快將大執位，我認為絕對唔奇。大家可記得，巴閉如前特首董建華，當要被郁時，就會自動宣布「腳痛」，無得抗拒。

　　再近啲睇上一屆政府，高級到如政務司司長張建宗，早攞晒大紫荊勳章，且身為政府歷史上最長期服務者（49年），日日高調顯示仆心仆命誓死效忠政府。結果點？時間到，未完成任期就被人叮走，無癮到暈。

　　官場運作其實好簡單，第一，邊個有權邊個話事；第二，一定實行馬房論（即用自己友），因要講個信字，而信任，須長期建立。正因如此，現在及未來的香港官場調動，當然是李家超馬房中人排隊上位，全部安插在最重要位置！

　　如此布局，無聊人當然批評「益自己友」，但舉世官場，哪處不如是？

　　又有評論員指出，近日前行政會議成員張志剛及「梁粉」陳啟宗搞的「香港發展論壇」，內容頻頻暗窒現屆政府，語帶少少酸味。尤其講到如今的政府顧問委員會成員，更直指部分無料到。

陳啟宗（左一）公開諷刺部分特首顧問團成員「難有見地」，但若他是當中一員，會否如此講呢？

　　老友，以張志剛及陳啟宗與現屆政府的關係，唔係咁諗至奇啦！

　　任何政圈，恩怨情仇糾纏不清乃「正常現象」，但大人大姐，有身份有地位，點會宣之於口咁失儀？不過，總有蛛絲馬跡令大家察覺到的，所有高手傳媒人，皆有這種敏感度。

　　例如資深新聞人林妙茵，就在專欄指出，前申訴專員趙慧賢約滿，任內盡心盡力，瞓身查出不少部門弊端，並提出大量改善建議，看台公論，做得非常出色。

　　奇在，離任時，政府高層尤其是特首，只輕輕表示感謝而已，對趙慧賢作出的貢獻，一句讚揚及嘉許都無。

表現出色的前申訴專員趙慧賢離任時，並未得到特首的適當表揚，原因為何，資深官場人當然心照。

　　點解咁？熟悉官場歷史的，無不搖頭苦笑。某退休高官一劍直指中央：「碌Sir，特首反應，無乜唔正常，大家皆來自同期警隊嘛。同理，唔安排任何公職畀曾偉雄，也是好正常，局內人，個個心領神會啦！」