職場

　　近年愈來愈多大國際企業開始將公司架構進行大改革，由沿用多年、巿場亦較為普遍嘅垂直架構，改為扁平同橫向營運模式。至今企業仍不斷評估公司架構中嘅「Span and Layer」，Span意思指一個管理人員會管理幾多位員工，Layer指公司架構內由上至下總共有幾多層。如公司實行扁平化的話，架構階層數量同管理人員數量就會減少，而每位管理人員嘅直屬員工則會增加，最後公司架構表 （Organizational Chart ）就會變得扁平，某程度上可以達致最佳較益化。

　　其實近年企業架構扁平化十分盛行，尤其對部分初創公司同發展急速嘅企業更為實用。扁平化其中一個好處係可以加快公司發展步伐。外國有研究公司訪問數百位企業高層，大多指出公司架構階層越多，創新產品同項目發展就越慢。好多時公司營運會被中層們嘅溝通拖慢，可能係訊息傳遞所需程序同時間過多、因溝通而產生嘅錯誤，或者係中層們權力鬥爭所產出其他問題，都會令事情變得複雜。所以省卻中層員工，由高層管理員工直接管理基層員工，某程度上係可以大大提升生產力。

　　扁平化另一好處相信唔需多講，必定係慳錢。但部分企業未必一定減省中層員工，反而係選擇除去較多嘅基層員工。一來因為基層員工人數比中層多，除薪金外，其他以人頭計算嘅開支都唔少，相比下減省空間較大。二來喺扁平化時如除去中層們，對比下營運上可能會造成較大衝擊。原因係大多高層多年來都較少「落手做」，如要高層們直接管理／管教基層員工工作未必可行。相反留返中層們去處理基層員工嘅工作較為實際。

　　雖然扁平化有以上好處，但其實成功與否好取決於老闆處事作風同能力值。理想情況下扁平化前設係，需要一位較為全能型老闆／高層們，先能夠有效率地發揮其好處。相反如果老闆／高層並非一個管理人（Generalist），而只係一位單一層面嘅專家（Specialist），或者老闆係一個金主，只提供大方向並唔太著眼於細節，亦唔能夠作綜合管理，呢類情況企業反而需要一班管理團隊先能夠正常運作。

　　雖然扁平化能夠省卻成本，喺經濟不景氣環境下的確係最直接慳錢方法。不過千萬唔好因小失大，其他公司經營手法未必一定最適合自己。但另一方面，如果你係企業嘅中層們，亦要思考自己有否獨特優勢同價值，先唔會被企業扁平化淘汰。

　　隨著人工智能同區塊鏈等高端科技發展迅速，初創公司不斷湧現，近年求職網上唔難見到好多初創公司職位空缺嘅招聘。不過搵一間好公司難，搵好嘅初創公司更難，求職網上每間公司都寫到自己前景無限，而且人工高福利好，但實情就「伏工處處」。雖然加入初創公司看似係高風險行為，但同時高風險就有高回報，相當吸引。如果能夠揀到好嘅初創，成功於早期加入並獨角獸公司初代員工，分分鐘年薪數百萬。

　　有別於其他公司， 大多初創公司因營運時間尚短，其背景、工作範疇、成功項目、合作夥伴等資料都並不完整，能夠上網搵到嘅資料未必多，亦未必有太大幫助，求職者難以從零碎資料判斷公司究竟「有冇伏」。所以當如果覺得公司行業同職位合適的話，最好先面試了解一下。但緊記一點，除了解公司前景外，最重要係了解其CEO背景同埋新／舊資金情況。

《Start-Up：我的新創時代》劇照

　　CEO有冇喺大公司曾擔任過高層角色、人脈夠唔夠強、有否曾經負責成功項目等都十分緊要。如CEO喺大公司工作過，代表巿場對佢能力有一定程度肯定。而且大公司高層能建立較好人脈網絡，除咗可以吸引較強班底加入初創公司外，「金主」來源會相對多。另外初創起步時其中一大難題係資金周轉，而金主多的話公司營運相對地穩定，長線發展可睇高一線。面試時要多了解CEO，面試後亦要搜尋一下CEO嘅LinkedIn，了解其工作背景同朋友圈等，從中可搵到金主嘅蛛絲馬跡，能令你對公司更有信心。

　　另一方面，初創公司所出嘅人工亦藏著不少提示。現時好多初創公司喺求職網所提及嘅人工，都並非「即時」能夠得到嘅薪金。因初創公司早期未有實際收入或仍處於收支未平衡階段，人工成為最大開支之一，所以初創慣性將公司股份、將來上巿後嘅股票、年尾或項目完成後嘅花紅等等計入人工一部分。但值得留意係，有小部分初創喺扣除股票花紅後，月薪金額仍高於巿價，代表住好有可能強勁金主早已出現，同時對公司前景十分有信心，所以先不惜工本高薪挖角，係一個好跡象。

　　當搵到潛力初創公司時，亦要懂得揀合適時機加入公司。早入職能成為老臣子，獲得最抵最多嘅股份同花紅。但同時間會面對公司於起步初期好多不確定因素，於種子輪融資前後倒閉機會較高。而較後期入職雖然能享受公司較穩定局面，平均實收月薪亦會較高，但就可能錯過最吸引嘅紅利。如果入職後不久公司就立即上巿／賣盤／合併等，到時可能錢又攞唔到，更頻頻出現「大地震」，最後公司已經變咗質。

　　職場生態近年已經進入咗第二個階段，變化在於一瞬間，不論搵工、返工、升職等已經難以用舊有一套走天涯。時刻捉緊巿場脈搏，先係致勝之道。