【10大新興職業】出租大叔、電競家教、陪睡師……原來有呢啲工？
#職場 #上班族早排衞生署公布聘請殮房服務員，起薪點由1.9萬起，職責主要係接收搬運到殮房嘅屍體。消息一出，引起不少網民熱烈討論，直指「政府出手太低」，不過亦有人睇中呢份工，「唔需要高學歷同太多專業技能，去 in下都好」！至於小編點睇？當然怕怕兼耍手擰頭啦，但就喺網上留意到有10份又潮又有趣嘅工，即刻話你知！
1. 寵物偵探
貓貓狗狗一向係人類嘅好朋友，如果唔見咗點算好？唔駛驚，有寵物偵探幫手！最近日本出現咗一種新興行業叫「寵物偵探」，專門搵走失咗嘅寵物。只要主人畀到寵物嘅名、年齡、顏色、身體特徵、嗜好、性格，同埋失蹤發生地等資料，偵探就會馬上貼海報、派傳單兼親自搜尋！
2. 出租大叔
（《孤單又燦爛的神－鬼怪》劇照）
咪以為韓國先有「大叔」潮，原來大叔在日本也很搶手，兼有公司提供「出租大叔」服務添！想好似孔劉、張東健、蘇志燮等大受女孩子歡迎（聽講連80幾歲嘅婆婆都有用呢個服務），各位大叔不妨去日本試下工！小編聽講，出租大叔嘅租金係每小時1000日圓，即係有70蚊港紙！
3. 男性陪睡師
陪傾計、陪shopping仲未夠？不妨試下做埋陪睡師！喂，千祈咪心邪！陪睡師嘅職責只係好溫柔咁抱住顧客瞓咋！
4. 電競家教
雖然世衛有計劃將電玩成癮行為列為精神疾病，不過有人一於少理，照日玩夜玩無誤，仲要做埋家教教人打機！咪以為呢份工「有供無求」，南韓就有唔少年輕人為咗唔想同朋友無共同話題而受到排擠，於是上網搵電競高手「補習」；內地更有位媽媽因為心痛兒子唔識得打機而被朋友排擠，竟然開出「時薪4萬6」嚟聘請「電競家教」！
5. 孤老入殮師
（《 入殮師》劇照）
「孤老入殮師」呢個職業，聽上來讓人有點難過，這是因為日本有愈來愈多孤獨死去嘅老人，在身死後無人理睬，所以便要孤老入殮師出馬幫手清理居所和遺物。雖然屍體待過的屋子極臭難當，可是能夠為逝者盡一點心意，也是一份很有意義嘅工作。
6. 整理收納師
近年「斷捨離」這個生活概念席捲全球，令唔少人開始學習將生活中不必要、不需要、不重要嘅事物都放低，過一個簡約減嘅生活！不過屯積容易割捨難，最好就係搵整理收納師幫手！
7. 酒店試睡師
（網上圖片）
咪以為酒店試睡師得個「瞓」字好爽！除咗檢查床墊嘅軟硬度、床單被套乾唔乾淨之外，連廁所、茶水設施、酒店設施等等，通通都關佢地事。過程中仲要拍照備案，之後仲要寫返份報告「交差」添！
8. 催乳師
為咗BB嘅健康著想，愈來愈多新手爸媽決定喂母乳，偏偏因為相關知識和經驗不足，所以搞到頭都大晒！而催乳師嘅工作就係採用中醫按摩推拿嘅技術，解決產婦生產後少乳、無乳、乳房脹痛、乳汁淤積等問題，可以稱得上「神手」二字。
9. 遛狗師
（網上圖片）
放狗都可能賺錢？無錯！打工仔日忙夜忙，有時連自己一日三餐都搞唔掂，仲點得閒理屋企隻狗！所以遛狗嘅工作，梗係交畀遛狗師啦！呢份工係咪啱晒成日自稱「狗奴」嘅你呢？
10. 電話叫醒服務
如果你身邊有個成日都要你做「人肉鬧鐘」嘅屋企人或朋友，咁從今日開始，你可以考慮下問佢收費，因為電話叫醒服務係內地已經愈來愈走紅！不過小編認為，呢份工最適合日日嗌仔女起身返學嘅媽媽們！