【其實我要的並不多!】8大打工仔心聲,總有一句hit中你!
#職場 #上班族你有壓力,我都有壓力!有時聽到啲腦細話,打工仔成日有訴求,早排先爭取完男士侍產假,而家又輪到爭取最低工資,仲時不時「要脅」話按章工作,真係好麻煩……但其實腦細你明白嗎?我哋呢班打工仔,要的真是不多……
(網上圖片)
1. 離開公司嘅時候,仲見到太陽!
有啲打工仔天未光就已經要起身返工,返到公司後冇停手咁做做做,有時做到飯都唔得閒食……好唔容易終於做晒手頭上嘅工作,收得工啦!結果出到公司門口先發現,太陽一早已經落咗山……
2. 每朝有一杯好飲又醒神嘅咖啡!
朝朝起身迫地鐵、迫巴士趕返工真係好辛苦,更慘係,如果你唔係頭幾個站上車嘅話,一定一定一定會冇位坐添!哎,唔夠瞓又冇位坐可以補眠,唯有落車之後去買杯香濃咖啡提提神,唔係嘅話點捱足一日啊!(如果公司有靚咖啡粉提供就正啦~)
(《受夠了!我要炒老細》劇照)
3. 唔駛腦細事事讚,但亦唔好樣樣彈!
打工啫,唔係做奴隸呀!腦細你可以唔讚我做得好,但唔好次次都喺度彈三彈四,好冇?打工仔都有尊嚴㗎!
(《喜劇之王》劇照)
4. 人工追得到通脹!
香港物價愈嚟愈貴,但人工年年都係加得嗰少少,有時仲要冇得加,究竟可以點生活呀?
(《激戰》劇照)
5. 銀行假!銀行假!我要銀行假!
對某部分打工仔嚟講,銀行假同勞工假先係呢個世界最遙遠嘅距離!
6. 唔駛狼吞虎嚥,可以慢慢食返餐lunch!
返工最怕食無定時,最慘嘅係,當你啱啱想離開公司去食飯,或者想行去pantry叮飯時,腦細/客人嘅奪命追魂call就到!唉,畀我抖抖好嗎?
(《同事三分親》劇照)
7. 一班有冤一齊呻嘅同事!
有時返工受咗氣,如果冇人可以一齊分擔下嘅話,真係會好易鬱到病!
(《功夫普通話》劇照)
8. 一部唔會hang機嘅電腦!
電腦hang機簡直係打工仔嘅噩耗!小編就試過打打下稿(仲要打咗一大半),然後部電腦hang咗,結果……所以奉勸各位(也提醒自己),記得耐唔耐就要save下自己嘅嘢呀!