【勞工法例】公司迫清假，打工仔只能被休息？（附2018、2019請假攻略）
#職場 #上班族 #勞工法例 #有薪年假 #清假 #請假攻略話咁快2018年就過咗一大半，小編最近就聽到唔少朋友話要計下點「清假」好，皆因朋友間公司唔畀員工帶假去下年，所以焗住攞假放（如果有錢嘅話都可以去下旅行，冇錢嘅話就唯有喺屋企hea）。如果唔係「大限」一到，剩餘嘅有薪年假就會蝕晒畀公司。
（《愛·回家之開心速遞》截圖）
問題嚟喇，啲有薪年假明明係打工仔辛勞工作得到嘅「報酬」，理應想點放就點放。究竟僱主係咪真係可以喺合約訂明，員工每年必須清晒該年嘅大假呢？
小編睇返《僱傭條例》，原來僱主真係可以「話晒事」，叫員工放假就放假，不過前提係要提早14日以書面通知員工放取年假嘅日期！但要留意返，如果僱主同員工之間曾議定較短嘅通知期，則不在此限。（即係有短冇長！）
所以各位打工仔，趁住自己仲有得say，拿拿臨揀定自己嘅心水日子放假啦！即睇2018年仲有咩請假攻略！
重陽節（請4日放9日）
今年重陽節放10月17日（星期三），只要請埋10月15、16、18、19，加埋前後2個周末，就可以放一個9日長假期！
2018年聖誕節連元旦（請4日放11日）
唔想係香港跨年？咁就要mark實年尾嘅聖誕節連元旦假，只要請12月24、27、28、31日，再加2個周末，同埋2019年1月1日，就可以由12月22日跨年放到2019年1月1日，去轉長旅行絕對冇問題！
揭下頁睇埋2019請假攻略
雖然一年之計在於春，但放假呢件事，點都係早好過遲！如果唔係畀同事快自己一步mark咗假，咁就喊都冇補於事！
即睇2019請假攻略！
1. 農曆新年（請2日放9日）
2019年嘅農曆新年公眾假期喺2月5日至7日（星期二至四），所以大家只要請2月4日（星期一）同2月8日（星期五），加埋周末，就可以放足9日。
2. 復活節（請4日放10日）
星期五嘅耶穌受難節（4月19日），加埋星期一嘅復活節補假（4月19日），只要再請埋4月23至26日（星期二至五），連放10日冇難度！
3. 佛誕（請1日放4日）
下年佛誕喺星期日，所以星期一可以補假。只要請多一個星期五（5月10日）或星期二（5月14日），就可自製4日連假！
4. 端午（請1日放4日）
2019年嘅端午節喺星期五（6月7日），所以只要請埋星期四（6月6日）或者星期一（6月10日），就有4日連假。
5. 回歸（請1日放4日）
下年七一回歸日係星期一，只要請星期五（6月28日）或星期二（7月2日），同樣可自製4日假期。
6. 國慶、重陽節（請4日放10日）
2019年嘅十一國慶日係星期二，而重陽節就係下星期一（10月7日），只要請9月30日（星期一）同埋10月2、3、4（星期三至五），加上前後2個周末，就可放一個10日長假！
7. 2019年聖誕節連元旦（請5日放12日）
2019年嘅聖誕節連元旦假係另一個心水選擇！只要請12月23、24、27、30、31日，加上2個周末及2020年1月1日，就可以一次過放12日！
（《衝上雲霄II》截圖）