【打工仔哀歌】2019壓力最大的十大職業排行，你份工上榜了嗎？
#職場 #打工仔你有壓力，我有壓力。喺香港生活，日日OT到有返工無收工，邊個無壓力先得㗎！早前美國職場調查網站CareerCast.com公布「2019十大最大壓力職業」名單，該調查是根據「交通」、「體能要求」、「競爭」、「在公眾視線下工作」、「對他人生命的直接風險」等11項指標來衡量壓力指數，結果發現……
即看自己份工有沒有入圍啦！
第十位：的士司機
以為做「的士佬」無乜壓力？咁你就錯啦！身負「以最快速度將乘客安全地送到目的地」嘅職責，的士司機真係要打醒十二分精神，一刻都唔可以鬆懈大意，以免發生交通意外。
（截圖自《降魔的》）
第九位：高級企業行政人員
身為高級企業嘅行政人員，重責一蘿蘿，除咗要協助高級管理人員處理人事、預算制定、文檔管理等工作，仲要制定公司規章制度、協助部門經理對員工進行公司規章制度嘅培訓、研究管理手段以優化工作流程等等，所以做每一個決定都要小心翼翼，否則有可能會為公司帶嚟巨額損失。
Read More：【有「錢」途】一畢業就月入>20K？盤點8個令Fresh Grad心心眼的高薪筍工
第八位：公關行政人員
做PR，就一定穿金戴銀好風光？其實成日都要對住「永遠都是對的」嘅客人，滿足佢哋有理／無理嘅要求，都真係幾難搞。最重要嘅係，PR成日都要曝光於公眾視野，有時甚至要上台拎咪演說，一覺唔覺意開口夾著脷講錯嘢就大鑊！
（截圖自《幕後玩家》）
第七位：廣播員
雖然唔駛「面對面」咁直接面向公眾，不過廣播員要喺大氣電波中參與公共事務討論，或者發表個人意見，其實都會緊張和恐懼；加上而家受眾嘅要求愈來愈高，搞到廣播員成日都要諗新計嚟提高收聽率，都真係幾大心理壓力。
Read More：【在職貧窮】知識難改命運？盤點4個高學歷但低收入的職業
第六位：報紙記者
做記者時時都要搶做獨家新聞，搞到自己好似每分每秒都要同全世界人打仗咁，真係身心俱疲！當中最慘嘅就係報紙記者，日日要趕喺死線前寫好文、配好圖、埋好版、交畀印刷商，仲要確保報道內容快、精、準，如果中間有乜差錯嘅話，結果唔係「開天窗」，就係就被人鬧「報道失實」。
（截圖自《導火新聞線》）
第五位：活動統籌
平時約班Friend出嚟飯聚都咁難搞，何況要搞一個（大班）活動！除咗要諗活動主題之外，仲要選擇及佈置場地、安排適當人手、租借專業音響、燈光及投影設備等，真係好易「揦手唔成勢」。
第四位：警察
好多人覺得警察嘅入職要求低，而且薪高糧準福利好，係一份筍工；但就忘記咗做警察有時都需要搵命搏。尤其係「臥底警員」，佢哋成日都要跟住班黑社會出出入入，一覺唔覺意曝露咗自己嘅真正身分，就係殺身之禍。
（截圖自《鐵探》）
第三位：飛機師
做機師都壓力大，唔係啩？但諗深一層，試下易地而處，當全機人嘅性命都掌握喺自己手中，就算係經驗再豐富嘅機師都好，一樣都會好有壓力！
第二位：消防員
消防員每次出動，幾乎都係要面對大大小小嘅火警、特別嘅拯救行動，絕對係一份極高風險嘅工作。想救到人之餘，自己亦都可以全身而退，同一班伙計齊齊整整咁返消防局？其實有時都唔到佢哋自己話事……
（截圖自《烈火雄心3》）
第一位：入伍軍人
（截圖自《太陽的後裔》）
入伍做軍人，可能真係全世界最危險、最高壓嘅工作。事關喺戰場上，生死各安天命，就算呢一秒可以同身邊戰友開開玩笑，邊個知下一秒唔會隨時身首異處。好彩香港人無需服兵役！