中國故事

　　與香港相隔一小時車程的澳門，以賭博娛樂為主要產業，產業單一化成弊病。近年澳門掀起一股文創風，不少年輕人投身文創業，原創產品、文創短片抬頭，當中的表表者，定是以九十後為主力的文創短片平台－微辣。

　

　　5年前，年僅20歲的陸志豪（人稱六毫子），與拍檔李偉麟（Jacky）靠表演魔術等兼職儲了2萬元，大學輟學後，創辦微辣文化有限公司，在澳門拍起文創短片來。2014年，一條《買雪糕不能夠分心》的9秒短片紅遍全球，讓大家見識到澳門人的創意，自此微辣漸為人熟悉。

　　

　

微辣 Manner

　

•2013年8月成立

•製作搞笑的生活短片為主

•曾與多位知名藝人合作，如陳奕迅、容祖兒、彭于晏、尹光、薛家燕等

•2017年，年收入逾千萬元，當中廣告收入佔七至八成

•開設辣記實體店，售玩味重的澳門手信

•各社交平台粉絲總數逾420萬（Facebook︰81萬；YouTube︰17.8萬；Instagram︰28.4萬；微博︰21萬）

• 2017年，微辣獲頒中國金蜜蜂獎「最佳短視頻營銷類．金獎」和「2017年度最佳自由媒體」；以及中國金秒獎最具創意精神短視頻

　　

　　現時公司員工近百人，設藝人制度，至今已有16位素人藝人，各有定位，更設經理人負責「接Job」，並開設手信店「辣記」賣澳門手信。今年8月，公司獲投資者注資逾7位數進軍香港開公司。

　

　　微辣粉絲遍布東南亞，粉絲總數逾420萬，其短片生活化得來，又帶點無厘頭，不直接談政治的演繹手法，更令微辣成功攻佔內地市場。現時短片在內地搜狐、愛奇藝等視頻網站可觀看，最多的粉絲正是來自中國廣東省。

　

　　去年，公司廣告年收逾千萬元，當中七至八成都是來自香港，甚至連香港警察、陳奕迅、容祖兒、彭于晏、尹光、家燕姐等明星，都越洋找微辣拍宣傳片，微辣更預期今年收入會翻多幾倍。到底這間微型的文創平台，如何發展成年收過千萬元的公司，年僅25歲的老細六毫子又有甚麼過人之處？

　

公司篇：搞笑後 為小人物發聲

　

　　初見澳門文創平台－微辣創辦人陸志豪（人稱六毫子），是在香港上環員工宿舍內。這位九十後的CEO沒半點架子，身穿在公司隨手拿來，寫著「精神」二字黑T裇，以及灰色休閒短褲與記者見面，大熱天時，頭上還帶著頂冷帽。細問之下，才知道原來員工偷偷在Instagram上發布六毫子昔日的肌肉照，稱若多過300個粉絲Like，要CEO六毫子減肥，失敗就罰他剃光頭。沒有減肥成功的他，只能頂著光頭與記者做訪問。

　

微辣創辦人兼CEO六毫子，上月在香港上環宿舍內與記者做訪問，大談進軍香港的發展計劃。

　

買雪糕片爆紅彈起

　

　　微辣由六毫子和拍檔李偉麟（Jacky）在2013年8月成立，那時他們才20歲，以製作原創生活短片為主，希望短片能為眾人生活調味。出身草根、未完成大學已輟學的六毫子，自13歲起已鍾情魔術，靠表演魔術辛辛苦苦賺了2萬元，與好友Jacky一起創業，「坦白講，我唔係富二代，創業並唔係由屋企人俾錢我，而係靠表演魔術，將賺到嘅錢儲起。而拍檔就靠拍花絮、短片等，賺一萬幾千，大家一齊搵朋友拍片，亦無糧出俾大家。」

　

　　公司成立之初，短片構思、拍攝、當演員、後製都由兩人一手包辦，六毫子坦言，微辣創辦首兩年，不確定公司能夠走到幾遠，「當時微辣並無一個商業模式，我自己大二就輟學，靠睇書學習，以及去旅行觀摩下人哋點做。」

　

　

　　2014年，微辣上載了一條僅9秒長的短片《買雪糕時不要分心》（見圖），隨即在網絡爆紅。片中講述女主角到麥記買雪糕時只顧看手機而分心，直接用手拿雪糕而非雪糕筒，麥當勞職員的驚訝反應成神來之筆，自此多了不少人認識微辣，廣告不斷。原來，這條短片是參考外國的短片構思而成，由六毫子、Jacky和兩位朋友一起跑訪多間麥當勞拍攝，至今在YouTube點擊率逾283萬次。

　

　　短片以生活入題，由編劇或旗下藝人兼演員自行創作劇本，劇情天馬行空，但內容不會直接談及政治，「我哋作品會講及年輕人買唔到樓、塞車、抄牌等，其實都有關政治，不過我認為『政治』（呢兩個字）太高層次，唔係我哋呢啲「口靚」仔講。我將呢啲定位為民生，講一啲每日都會面對嘅嘢，例如唔夠車位泊，好易被抄牌。」

　

　　去年，微辣共創作326條短片，粉絲遍布香港、台灣、馬來西亞、內地等，以18至35歲年齡群佔大多數。公司以廣告收入為主，年收過千萬，更有七至八成廣告客戶來自香港，不少知名藝人，如陳奕迅、容祖兒、家燕姐、張繼聰、農夫等曾與他們合作。據了解，公司今年收入更是幾級跳，微辣預期收入翻多幾倍逾數千萬元。

　

微辣曾與多位明星合作，如陳奕迅、容祖兒、家燕姐等。

六毫子剃髮後，酷似藝人林盛斌（Bob）。

　

OKR管理 隨便請假

　

　　公司成立至今5年，影片點擊率高，廣告源源不絕，但原來公司只有40至50名全職員工，並聘請學生當兼職演員，連同子公司（如辣記），加起來員工人數過百人。與大企業不同，這間初創公司員工，不需要打卡上班，員工可隨便請假，「微辣行責任制，由主管訂立目標，大家一齊監測住。即使員工因為經痛、失戀、去旅行等原因請假，甚至唔Send訊息（畀我）都可以。」六毫子認為做創意產業，講求自律性，更笑言自己「無批過假」，「當你以為自己蝕咗，其實係賺咗，因為（員工）去旅行，有好多嘢可以分享俾大家，活化思維。」

　　

六毫子獲頒澳門商務大獎的青年企業家，亦是歷來最年輕的得獎者，難得一身正經打扮領獎。

　

　　六毫子所說的責任制，其實是OKR管治方式（Objectives and Key Results，目標與關鍵結果），由員工或主管訂立數個目標，朝著這些目標進發，大公司如Google、LinkedIn等亦有使用，「我哋唔睇過程，（員工）朝住目標和努力達成目標就得，其實可以話係無皇管。」不少打工仔聞言，或許羨慕不已，但作為老闆的六毫子認為，其實自己未稱得上是良心老闆，「有好多嘢都唔係你想點就點，要面對拍檔、同事、客戶等壓力，代表各人利益和立場，部分決定都唔容易講出口，所以開始諗緊點用數據說話。」

　

微辣澳門辦公室設多間小型會議室，設計與坊間的共享工作間相似。

老細六毫子望與員工分享利潤，員工也願意拼博。

　

　　平日與員工對話，90後的六毫子總是九唔搭八和無厘頭，但一提起公司發展，變得異常正經，更頭頭是道打起比喻來，「我覺得自己唔係船長，所謂的老闆只係設計師，諗緊點樣設計一隻船，就算遇到冰山、火山也好，都識轉彎。當呢隻船設計得好，邊個做船長都無問題。」

　

攻港仍力保澳門味

　

　　今年8月，微辣正式攻港，暫在觀塘租用朋友的辦公室，最多可容納20人，並設上環宿舍供澳門員工使用。微辣在港請人，CEO六毫子拉大隊，帶同主管一同到港，至今已會見逾50名應徵者，「由實際操作的主管一齊見，先知邊啲人最適合，我可以喺度俾意見和最終拍板。」

　

微辣曾舉辦馬來西亞粉絲見面會。

　

　　為何會進軍香港市場？很簡單，就是微辣近七至八成廣告客戶來自香港，「加上如果你要去內地（發展），先要去香港；同樣，內地公司想打入國際市場，也要先經香港。」六毫子認為香港節奏快，有財經及法律界專才，不少地方都是澳門望塵莫及，他期望能在香港聘請財務總監帶領團隊，「香港有好多專才，娛樂製作、搞活動亦會以香港為主，因為香港人做Event經驗多過澳門人好多。」

　

　　即使來港發展，微辣堅持和盡力保留「澳門味」，業務仍以短片製作為主，加入香港場景和特色，改善影片和故事質素，以吸納更多大品牌商合作，「微辣唔會因為去咗香港，整個方向都唔同晒，不會來香港就改成賣微辣魚蛋和開小食檔。」除了製作短片，在綫上為觀眾帶來快樂外，亦希望透過在港舉辦更多活動、表演、見面會等，令品牌更落地，以做到真正的「生活的調味」。

　

定位為小人物發聲

　

　　六毫子一直思考如何帶領公司走得更遠、更前，打開他的隨身筆記本，就是畫著一環扣一環的點子結構圖，「我其實喜歡用紙和筆記下所想的」。近日不斷在腦海想的，是公司的定位，「搞笑好玩」不就是微辣的定位？「搞笑唔係定位，只係手法，我思考好耐終於諗到，就係作詞人黃霑一句說話︰『為真小人爭取社會地位，不讓偽君子們霸佔全世界』，我哋嘅定位就係為小人物發聲！」

　　

　　他又正研究如何提高透明度，將利潤與員工共享，「你問我鍾唔鍾意錢，坦白講，我錶都無隻，衫都係公司攞，褲已經著了幾年，襪都係偷我老豆，交電話費、抄牌、保險之類，一個月幾千蚊都夠用。如果我淨係諗我自己，唔洗（工作）咁辛苦。但今時今日已經唔同，微辣規模過百人，我要諗每個人的生活和家庭。大家都係一班年輕人，我們都希望可以同大家做利潤分享，讓大家知道啲錢點樣賺，用係邊，到底係請一個人？租舖？抑或租屋。」

　

　　由以往玩魔術，搖身一變成為創作和製片人，到現時的CEO，貪玩的六毫子坦言，其實自己最喜歡的都是做創作和玩魔術，至於做CEO，「仲學習緊，因為都幾難做」。

　

創辦人篇：轉過7次校大學輟學；有心學，自學可成材

 

　　現年25歲、在澳門土生土長的微辣創辦人兼CEO陸志豪（六毫子），出生於澳門普通家庭，在學時期曾讀過7間學校，多次因「多嘢講、頑皮」被趕出校，「我又唔係殺人放火，只係多嘢講，好嘈。阿Sir、 Miss好唔鍾意我，因為個個聽我講，無人聽佢哋講書。」在高一（即中四）時，更曾轉過3次校才完成課程。

　

　

陸志豪（六毫子）

　

　•九十後，年僅25歲，微辣創辦人兼CEO

　•曾讀過7間學校，最終未完成大學畢業

　•從事魔術表演逾10年，14歲獲得「第二屆澳門國際魔術節近距離魔術大賽冠軍」

　•鍾情創作短片內容、填詞等，不時在微辣影片中客串

　•獲頒發澳門商務大獎的青年企業家大獎、《亞洲華人領袖獎》

　　

靠表演魔術 儲錢創業

　

　　大學時曾修讀傳播學和國際旅遊與款待，惟兩科都只讀了一年，那時他和朋友醉心埋首拍片，更在大二起輟學。「以前真係覺得人生前路茫茫，唔知道大個之後可以做咩。我本身鍾意玩魔術，成日出夜街，係長輩心目中真係好曳嘅小朋友，屋企人就話你唔讀書無前途。」或許在老一輩的心目中，完成大學是投身社會的基本入場券。

　

　　雖然讀不成書，但六毫子自小喜歡閱讀，亦鍾情魔術表演，14歲時已獲得「第二屆澳門國際魔術節近距離魔術大賽冠軍」，喜歡魔術的原因很簡單，就是因為魔術表演能夠帶給人快樂。靠表演魔術有少少積蓄，20歲時六毫子和好友一起夾了2萬元創辦微辣，本著同樣態度，望短片能傳遞快樂信息，成大眾生活中的調味。

　

辣記開張時，六毫子媽媽亦有現身撐場。

　

好學不倦 愛讀營商之道

　

　　時至今日，微辣做到有聲有色，與多個知名藝人合作，但六毫子笑指，起初經營微辣，就算影片在網絡爆紅，家人亦不太明白，「有啲片好爆，但佢哋未必會明幾多Like、幾多Share，佢哋只會話，電視見唔到你嘅。」後期有媒體訪問微辣，家人同樣會問，「點解電視見唔到你嘅？ 佢哋認為只要上電視，就係好成功。」縱然如此，但六毫子不斷努力，期望終有一日獲家人認同，「直至有佢識嘅藝人同我哋合作，或者讚我哋嘅短片，佢先明白我做緊咩。」微辣成名後，六毫子也再遇昔日趕他離校的校長，校長笑著說：「你就係當年好多嘢講那位學生！」昔日曳學生今天成為CEO，六毫子在校長眼中大脫變。

　

　　沒有完成大學課程，被標籤無前途，曾為六毫子心中的陰影，訪問中他語重心長地說，「讀萬卷書不如行萬里路，但讀萬卷書都好重要。」事實上，六毫子非常好學，袋裏不時放有一、兩本書，他說以往喜歡看名人傳記，但看看下發現成功方程式不外乎奮發向上，現在愛看營商之道，訪問那天背包便放了一本《用行銷改動世界》。

　

　　他認為只要有心學，自學也可成材，「因為自學得，都係有熱情，你鍾意嘅（題材）、有需要學的。就算人哋教，你唔鍾意始終係唔鍾意。」

　

 

藝人篇：吸30萬粉絲 天生演員豪Dee︰演員係高尚職業

　

　　畢業於澳門大學市場營銷學系、現年24歲的豪Dee（歐陽仲豪），一直醉心話劇演出，偶然從學長「雞Wing」（同為微辣藝人）口中得知，微辣正聘請臨時演員。

　

　　當時仍是大學生的豪Dee，被時薪100元吸引，不惜在期中考前夕放低書本做臨演，「我仲記得當時做了16個鐘，出糧係用現金出，六毫子仲唱散咗100蚊，一張張數畀我，好有滿足感。」

　

Yelo和豪Dee不時在劇中飾演情侶，默契十足。

　

扮火車頭 有成功感

　

　　拿著一小疊百元鈔票的豪Dee，接受六毫子邀請加入微辣任兼職演員，更天真地以為每次拍片都有酬，「當時男扮女裝，扮白雪公主，喺生果檔拎蘋果食，扮暈低去嚇身邊嘅路人。」整蠱片講求觀眾的反應，往往要NG好幾次，最後豪Dee足足吃了10個蘋果才完成拍攝。

　

豪Dee鬼主意多多，曾扮過人形月餅

　

　　「當時等（出糧），等咗一星期都未有，就諗住係細公司（遲出糧）好正常，後來先知道，原來拍原創小短片係純粹玩同埋開心，係無（酬）嘅。」熱愛演戲的豪Dee認為，在澳門，只有微辣有足夠的空間發揮，人工亦只是次要，「澳門嚟講，能夠咁認真去玩，係得微辣，所以我想同佢哋一齊拍片。」

　

　　成為全職藝人後，豪Dee埋首在劇本創作和演出，最喜歡構思劇情片。鬼主意多多的他並不滿足於此，其後更拍過多條天馬行空的短片，如在中秋節扮人形月餅、帶住富士山頭套去日本旅行，甚至連Thomas火車頭都扮過，「我就係想做一啲大家都未睇過嘅野，有成功感。」這些人形道具大多由他親手造，當中Thomas火車頭由他和拍檔，合共花了逾30小時才製成，「微辣有空間去創作，當時我係公司搵地方整（道具）火車，又要用噴漆，成日整污糟咗啲枱。」

　

Thomas火車頭的道具都是自家製，豪Dee和拍檔花了逾30小時才完成。

　

fb粉絲19萬 人氣爆登

　

　　豪Dee現時是澳門最紅的網紅，在Facebook上有逾19萬粉絲，Instargam上有逾10萬粉絲追蹤，人氣爆燈，「當初六毫子叫我開Page，我仲覺得『下，點解要開Page，我都無乜人識，點解要咁樣裝大頭鬼』。」後來回想起來，才知道原來老細是對的。

　

由微辣藝人加蔥、Yelo、Rachel和老細六毫子演出舞台劇《可能好笑》，集魔術、音樂、戲劇、棟篤笑於一身。

　

　　「我讀嘅中學得2,000幾人，當時我有3,000幾個粉絲，已經覺得好開心，後來突破1萬人，係意料之外，先知原來我觀眾緣都幾好。」現時Facebook粉絲人數急增近20倍至19萬，豪Dee也坦言，自己曾迷失在這場數字遊戲中，「有一段時間覺得有壓力，被數字捆綁，試過開住一條片，每分鐘睇住（觀看人次）點樣升上去。當數據唔好，我就反思條片有咩地方做得唔好；數據好，就會全日都好開心。」後來，他學會坦然面對，不被數字控制情緒，「如果你個人本身有蹺，唔會局限係表現形式上，即使應對任何平台和任何環境，都會搵到方法生存。」

　

　　有破格的創作，亦要遇到識欣賞的老細，豪Dee指出，他和六毫子都是搞笑的人，互相欣賞，「佢鍾意我嘅創作，但有時都會覺得莫名奇妙，點解我會整呢啲嘢出嚟呢？」屬早期加入微辣的豪Dee，望住老細六毫子由創作人變成決策人，他不禁慨嘆六毫子愈來愈有「老細感覺」，「當初我地一齊諗蹺，一齊做幕前和拍片，依家為咗間公司有更好發展，佢（六毫子）就要做呢個位，面對股東、客戶等，好偉大。」

　

大學生Yelo 兼職拍片 多才多藝

　

　　打扮新潮，看起來冷酷的Yelo（黃曉晴），今年22歲，是澳門大學傳播系大四學生。自高三（即中六）起認識六毫子並加入微辣，兼職拍片。Yelo本身喜歡表演，表演欲十分強，鋼琴8級的她，現時除了上學、拍片外，亦有學爵士鋼琴和跳街舞，「我想喺微辣定位為才藝和好表演的人，有時亦會跟住微辣導演一齊Rap。」

　

　

　　與豪Dee一樣，最初之所以加入微辣，是因為學長「雞Wing」的介紹，更進行過面試，面試後卻音訊全無，直至中秋節前一晚，Yelo突然接到微辣的電話，問她還有無興趣拍片，「當時都無話正唔正式請，In完覺得有適合嘅片，就會搵你。」一通電話，令Yelo和微辣合作至今。

　

　　平日要上學和工作，更要兼顧興趣，時間分配絕不容易，Yelo現時每星期平均番3日學，拍片則佔一至兩日時間，視乎不同劇本和場景而定。快則拍一、兩個鐘完成，最長亦試過拍足一日才收工。

　

　

　　經常與豪Dee一起扮演情侶，私底下兩人原來「拳來拳往」。對於老細六毫子，Yelo笑言，「我唔覺得佢係老細，只覺得佢係好曳的肥仔，成個整蠱人。」

　

攻港請人4大準則

　

　　失戀、Ｍ痛隨便請假，唔洗打咭，對於九十後打工仔而言，無大公司般束縛，想做就做。

　

　

　　微辣招聘有吸引力，老細六毫子稱會透過筆試、面試揀人，還會帶應徵者去參觀公司，舉行小型聚會，笑指「俾佢了解吓呢班人都係痴綫，個個都係傻嘅。」

　

　　老細仲話，請人無上限（亦無下限），最重要適合，「如果遇到好適合的人才都會不惜工本，我們做緊的產業係智慧創造者，亦好講緣份，睇吓去到香港會唔會遇到更多緣份啦。」

　

1.專業能力

　

　　當然要睇吓你有咩強項，Show TIme！

　

2.一般能力

　

　　除了強項以外，老細亦會視乎觀察應徵者平日學習態度如何，解難能力，最重要的是有無生活知識。

　

3. 領導能力

　

　　「如果本身帶開團隊，如做開學生會會長、童軍領袖，呢啲反而會好鍾意。」六毫子認為，有領導能力的人會比較有想法，有助帶領團隊。

　

4.微辣文化適者生存

　

　　微辣行責任制，開會例遲5分鐘、office立立亂等，簡單兩句總結，其實就是適者生存，以及最緊要啱傾，「我相信這個世界叻的人好多，最重要就是這間公司可唔可以畀到適合你存在的價值。」

　

微辣藝人 各有定位

　

　　與香港以創意廣告為主的《100毛》一樣，澳門微辣同樣推行「藝人」制度。公司旗下有16個藝人，各有定位，如行性感路線的Doris、可愛清純路線的Tina、搞笑路線的加蔥和豪Dee等，睇微辣影片的粉絲們對他們定不陌生。

　

　　這些藝人由素人組成，在微辣影片曝光兼走紅，並設經理人「接job」，在社交網站上開設專頁吸like，走在澳門街頭亦不時被粉絲認出和selfie留念！

　

產品篇：踩過界搞文創 開手信店

　

　　距離澳門大三巴僅8分鐘路程的天神巷，正是微辣旗下首間零食店－辣記（LAJI）所在地。辣記在今年8月開張，選址在澳門天神巷，人流甚旺，不過以本地人居多。記者到訪當日，正值平日下午時分，店內人流稀疏，也甚少遊客經過，只是偶有學生放學經過買零食。

　

 

　

　　店舖外牆身設大電視播放宣傳短片和微辣短片，店內只售澳門手信，如「激薄」鳳凰卷、「激凸」杏仁餅、辣記趣片、牛肉乾等。這些手信味道都是帶點微辣，但包裝相當趣怪，如鳳凰卷的包裝與女性生用品相似，杏仁餅包裝則模仿安全套，玩味十足。

　

　　六毫子笑指澳門人經常會遇到車位不足，出現「泊車難」現象，故辣記特意推出優惠，如市民被抄牌，只要出示抄牌紙，可免費獲贈牛肉乾一塊，可見辣記噱頭多多。

　

品牌落地 鍾意就買

　

　　現今科技發展迅速，不少實體店舖兼營網店，由綫下走到綫上，以擴大客群和生意額，迎合市場需求。不過六毫子卻認為，未來要經營更多綫下業務，「要令到我哋做嘅嘢獲得大家信任，開實體店、智能販賣機等，可以令品牌更加落地。」開設零食店只是其中一步，微辣團隊早前曾赴馬來西亞舉行粉絲見面會，又在澳門舉行舞台劇等，望與粉絲更有多接觸。

　

　　由製片到開店賣零食，對於團隊來說，一切都不容易，始終經營實體店，微辣仍是初哥。由找可靠廠家製餅、包裝、物流等，每一步都是新挑戰，「以前我們做創作，無計咁多成本，例如我諗到條蹺，如果無人Buy，唔拍出嚟，條蹺一直都喺度，亦唔洗俾幾多錢或者唔洗租一個地方裝住我條蹺。但係原來做貨，由一開始設計產品、包裝、打板、印刷，去到物流和貨倉，全部都係錢，仲未計有耗損。」

　

　　作為澳門品牌，進軍香港後總不能夠只賣澳門手信，「未來或者會同智能販賣機公司合作，唔會賣杏仁餅，可能賣微辣趣片、醬等。」六毫子亦深明，公司所賣的產品並非必需品，「我地做緊嘅周邊產品，唔係需要，而係想要。如果鍾意我哋微辣嘅，就會去消費，所以快閃（Pop-up store）係一個好好嘅方向。」但香港地寸金尺土，就連六毫子都忍不住大喊一句，「香港舖租好貴呀。」

　

對手篇：《100毛》係朋友 無諗過競爭

　

　　談起微辣，不少人都會想起《100毛》，皆因兩者都是走搞笑路線，更有人說微辣就是澳門版的《100毛》。微辣創辦人兼CEO六毫子認為，兩者本質並不相同，「我哋做內容，佢哋係做媒體，微辣嘅片快則一晚出一條，其餘時間主要係Instagram刷存在感，分享得意和搞笑圖片，但《100毛》有好多嘢都會報道，例如藝人攞獎、大是大非嘅嘢，但呢部分微辣都唔講。」

　

六毫子在Facebook上載過一張與林日曦的合照，「想當年，我地一齊食飯盒。今日，你已經係上市公司老闆。而我，只好靜靜地看着你，繼續食飯盒。」

　

　　微辣的影片都是自家創作生活小品，巧妙將政治內容重新包裝，深入淺出講述民生議題，如澳門輕軌規劃已久，卻遲遲未落成，工程超支激起民怨。微辣遂以盂蘭節為題，指出澳門人最怕的鬼就是輕「軌」。這種不直接談政治的演繹手法，不少觀眾都受落。即使微辣的內容全是廣東話，微博上粉絲數目亦逾21萬，短片在內地多個視頻網站可觀看，如搜狐、愛奇藝（QIY）、秒拍等，或許就是這種不談政治內容的手法，令微辣成功進入內地市場。六毫子表示，微辣的粉絲遍布東南亞，但中國廣東省的粉絲佔最多。

　

廣告為主要收入

　

　　今次微辣獲投資者注資逾7位數，進軍香港，外界均視《100毛》為微辣競爭對手。六毫子坦言，他與《100毛》創辦人林日曦是朋友，自己本身也有睇《100毛》，「大家都係朋友，我哋無諗競爭，雖然大家都係搞笑為主，但方向和做嘅內容唔一樣，不過我本人係鍾意佢哋創作。」

　

　　微辣專注做原創搞笑生活短片，旗下有16位藝人，各有定位，公司以廣告為主要收入，當中七至八成是香港客，就連香港警察都越洋找微辣拍宣傳片，難怪六毫子對公司信心十足，「廣告商搵我哋賣廣告，好大的原因係鍾意我哋（創作）或者藝人。有人話，其實做我哋呢行無Sales，因為我哋做嘅都係面對大眾，個客唔鍾意，無論點Sell都係唔鍾意。」

　

毛記葵涌股價曾跌穿1元

　

　　由林日曦（徐家豪）、阿Bu（姚家豪）、陳強（陸家俊）創辦的《100毛》和毛記電視，去年7月以「毛記葵涌有限公司」名義申上市，2017年財年收入為9,522.8萬元；兩度申請才上市成功，今年初毛記葵涌（01716）招股價為1.2元，更超額認購6,288倍，股價一度炒至11.76元。截止今年3月底，毛記葵涌公布全年業績，收益僅錄得8,670萬元，按年減8.9%，純利為691.7萬元，較去年大減八成。上股價更跌至低過黑紙的1元，最低位為0.96元，周四（15日）截稿收報1.43元。

　

女裝緊身褲 照殺入場

　

　　本月初，六毫子再度來港，邀約本港媒體和學者在會所食飯，大談微辣進軍香港生意經。當日六毫子一如以往著短褲過大海現身，沒料會所有Dress Code不准著短褲，六毫子被拒門外。同行其他微辣同事見狀，即在會所附近找Boutique買褲。買不到男裝長褲，只有女裝緊身褲，六毫子一樣「照殺」。其後他更在Instagram上發布有關照片，笑指「不是褲的Cutting好，是我人的Cutting好」，成功Carry女裝入會所。

　

轉載自《iMONEY智富雜誌》