《小傳日記》隔晚（３１日）聯儲局主席鮑叔（鮑威爾）一如「孖屐」預期減息四分一厘，仲提早縮表！不過，缸友又唔好咁開心住喎，事關鮑叔就話今次減息只係「調節」，唔好預期寬鬆周期已經重啟，即係話今次之後唔好預期未來會好快再減息，所以聽到呢個消息之後，之前升到㷫恰恰嘅美股當堂即刻借勢回調，全線低收逾１巴仙啊。　　打完風返嚟，魚缸今日正常開市，但表現就同今日天氣一樣陰沉。一開局就跌穿咗守咗個半月嘅牛熊線（約２７６０３點），低開１９５點報２７５８２點。其後神州財新７月製造業ＰＭＩ回升，勝「孖屐」預期，令魚缸跌幅曾經收窄至只有２３點。　　不過，無幾耐又開始腳軟過喇，之前升咗好多嘅本地磚頭佬就因為未來減息預期降溫而受壓；下晝馬交嗰邊博彩收入又唔合「孖屐」預期，缸友仲唔排住隊沽貨咩，魚缸跌勢即刻加劇，最多跌過２８１點，其後跌幅都維持兩百幾點，最終埋單恆指收報２７５６５，跌２１２點或跌１巴仙。全日主板成交７９９﹒８１億銀，比上日多咗３３巴仙。　　國貨佬指數報１０６２１，跌半巴仙或跌５３點。　　Ａ場嗰邊都唔好過啊，上證綜指報２９０８，跌２３點或跌１巴仙，全日成交１７１１億人仔。深成指埋單報９２６８，跌５８點或跌超過半巴仙，全日成交２０２８億人仔。　　大隻藍戰士方面，雖然再有消息傳話神州又想出手，防止後生仔沉迷打機，不過消息無阻今日ＱＱ逆市上游，升半巴仙，上到３７０銀關；大象（００００５）繼續跌半巴仙，報６３﹒０５銀；ＡＩＡ（０１２９９）就慘囉，呢幾個月強勢破頂之後就連日跌，今日再蒸發逾１巴仙，報７９﹒７銀，暫時已經係七連跌，累積唔見近９巴仙，慘啊！生發發（００３８８）都唔好過，今日跌近半巴仙，報２６４﹒６銀；神州移動（００９４１）畀富瑞削價一成，今日再跌近１巴仙，報６６﹒３５銀。　　旺旺（００１５１）今日就搞笑囉，傳聞有人將佢同涉嫌向花旗國走私而畀人告嘅忠旺（０１３３３）搞錯咗，今日肥手指再現，開市即瀉８巴仙，後來可能發現擺咗烏龍，股價慢慢升返，最後仲做埋表現最佳藍戰士，全日升逾１巴仙，報６﹒２銀；忠旺就繼續大瀉一成四，報３﹒４４銀。　　渣打（０２８８８）今日派咗成績表，表現好過「孖屐」預期，中期息仲升一成七，全日急彈３巴仙，報６６﹒７５銀。其他街坊就插水，東亞（０００２３）蒸發近２巴仙，報２２﹒３銀。小象（０００１１）唔見咗１巴仙，報１８４﹒８銀。

＊減息恐落空磚頭遇寒冬，缸友急住閃內房未脫險＊

　　缸友終於得償所願盼望到聯儲局減息四分一厘，但議息會議後主席鮑叔就大撥冷水，暗示今次減息只有一次。事實上，「孖屐」早就消化晒減息呢項利好因素，最受惠減息嘅香江磚頭佬全線失威，新地（０００１６）嘅沽壓最重，全日蒸發咗４巴仙，報１２１﹒７銀，仲要係表現最差嘅藍戰士！長實（０１１１３）將會喺今日收市後放榜，績前同樣跣低近４巴仙，報５７﹒２銀。信置（０００８３）唔見咗近３巴仙，報１２﹒４４銀。恆地（０００１２）同新世界（０００１７）只係插咗１巴仙，報４０﹒３銀同１１蚊。　　中央前幾日先再次強調「樓喺用嚟住唔係用嚟炒」，仲話唔會刺激房地產去穩定經濟，缸友收到風驚咗幾日，搞到內房冇運行，碧桂園（０２００７）插水近３巴仙，報１０﹒３８銀。有消息話潤地（０１１０９）以７億人仔攞咗神州三塊地皮，股價全日跌咗超過３巴仙，報３２﹒７銀。萬科（０２２０２）就唔見咗約兩巴仙，報２９﹒１５銀。中海外（００６８８）跣低超過１巴仙，報２６﹒５５銀。佳兆業（０１６３８）領跌一眾神州磚頭，全日蒸發超過半成，報３﹒１１銀。

＊博彩收入降濠賭佬動盪，隔晚油價漲鐵鳥即遭殃＊

　　馬交下晝公布咗上個月博彩收入，結果唔合「孖屐」口味，按年下降逾３巴仙至２４５億澳門元。而且，離岸人仔曾經跌穿咗６﹒９嘅水平，所以部份濠賭佬命運就坎坷囉，新濠（００２００），仆低２巴仙，報１８﹒９８銀。一哥銀娛（０００２７）同澳博（００８８０）齊齊唔見１巴仙，分別報５３﹒２５銀同８﹒５４銀。美高梅（０２２８２）反而升１巴仙，報１３﹒１銀。　　隔晚花旗國公布上周原油庫存，降幅大於預期，令油價上漲。加上美金強勢搞到人仔走弱，神州鐵鳥全線低飛。東航（００６７０）碌低３巴仙，報４﹒２４銀。國航（００７５３）跟住仆落２巴仙，報７﹒５２銀。南航（０１０５５）就墜機近２巴仙，報４﹒９９銀。　　雖然唔少板塊都跌，都有Ｄ係逆市升嘅，好似啲中資公用股今日表現都唔差嫁。講燃氣佬，新奧能源（０２６８８）今日仲做埋表現最佳國貨佬，全日升１巴仙，報８２﹒３５銀；潤燃（０１１９３）都走高１巴仙，報４０﹒３銀；昆侖能源（００１３５）就跳高逾２巴仙，報７﹒０３銀。　　講起火電佬，華能國電（００９０２）同華電國際（０１０７１）兩兄弟拍住上，前者升３巴仙，報４﹒７３銀，後者亦漲４巴仙，報３﹒４３銀。大唐發電（００９９１）就升３巴仙，報１﹒８２銀；過氣藍戰士潤電（００８３６）亦走高２巴仙，報１１﹒５２銀。

＊金價又潛水金股難進取，銷情惹擔憂車佬求打救＊　　　花旗國繼續減息嘅願望好大機會落空，支持美金急升仲去埋兩年高，金價自然受壓，現貨金一度跌１巴仙至１４１５﹒８７美金嘅盤中低位，最終埋單都要跌近１巴仙。黃金佬股價即刻大縮水，招金（０１８１８）瀉逾６巴仙，報８﹒５８銀；街坊紫金（０２８９９）都要跌逾３巴仙，報３﹒０６銀；山東黃金（０１７８７）挫近半成，報１４﹒７４銀；ＳＰＤＲ黃金ＥＴＦ（０２８４０）滑２巴仙，報１０３８銀。　　砵砵車第三季度嘅銷情令人擔憂，拖累成個板塊繼續出現回吐。有券商分析話，新嘅四個轆排放標準提早喺７月１６個省市實施，令砵砵車經銷商劈價出貨，提早消耗第三季度嘅需求。吹冷風下，東風（００４８９）今日再瀉逾３巴仙，報６﹒８銀，失２０天線（６﹒８７１銀），係全日表現最差嘅國貨佬；吉利（００１７５）都軟近２巴仙，報１１﹒９２銀；長汽（０２３３３）挫近４巴仙，報５﹒１８銀；北汽（０１９５８）跌近３巴仙，報４﹒８６銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

WoW WoW星期三：健康網購產品低至半價 (只限今天)► 火速行動