《小傳日記》香江魚缸近日受到內外夾擊，正當缸友以為今日（３日）又會跟隨外圍下跌之際，午後有傳港府即將以《緊急法》就禁蒙面法立法，「孖屐」憧憬持續咗三個月嘅示威活動或會減少，社會可以回復秩序，帶動魚缸連續三日都兩萬六失而復得呀！　　魚缸一開市已經失守兩萬六，報２５８３１跌２１１點，隨後跌幅一度擴大至２３３點，至２５８０９。午後初段都維持悶局架，去到接近三點左右，魚缸先至受惠政局消息拗腰倒升，曾經反彈１５０點高見２６１９２，破埋十天線（約２６１５９）添！之後升勢回順，最終收市就揚６７點，報２６１１０，主板成交６２６億增加１巴仙咁多。國貨則升３８點報１０２２０。Ａ場就繼續慶祝國慶放假呀！　　重磅藍戰士普遍無咩起色，貢獻最大嘅係神州移動（００９４１），自己升到近１巴仙，報６５﹒７５銀，帶挈魚缸１１點咁多！平保（０２３１８）同ＡＩＡ（０１２９９）都分別幫到魚缸８點，但各自升幅大約半個巴仙，分別報９０﹒７銀同埋７４﹒６銀。　　歐盟打ＴＲＡＤＥ　ＷＡＲ，連同英國「硬脫歐」嘅憂慮升溫，大象（００００５）捱沽滑逾１巴仙，報５８﹒８５銀，係表現最差兼最拖後腿嘅藍戰士，拖住魚缸３６點！生發發（００３８８）就反覆有得升，一度掂到２３０銀，收市報２２９﹒４銀，走高唔夠半巴仙。　　值得一提嘅係，因為呢次社會事件而成為網民箭靶兼「示威戰場」之一嘅港鐵（０００６６），倒升逾２巴仙，報４４﹒５銀。而石藥（０１０９３）就係最叻仔嘅藍戰士，彈高逾３巴仙，報１６﹒１６銀。　＊推禁蒙面法新世界釋壓，零售雖大劈珠寶鐘表踢＊　　　本地地產佬今日早段都做晒軟腳蟹回吐，不過正正因為港府可能會就禁蒙面法立法，擁有沙田新城市、元朗ＹＯＨＯ　ＭＡＬＬ等「示威場地」嘅新世界發展（０００１７）轉勢踢高，全日繼續起哄逾半巴仙，報１０﹒５２銀。新地（０００１６）亦高３毫子，報１１４﹒２銀。不過，會德豐（０００２０）撻低近２巴仙，報４４﹒３５銀。九置（０１９９７）跣低近１巴仙，報４３﹒３５銀。長實（０１１１３）及恆地（０００１２）齊剎車逾半巴仙，分別報５３﹒６銀及３６﹒８５銀。　　噚日政府統計處公布咗，８月零售業總銷貨價值臨時估計得２９４億銀，按年大劈２３巴仙，創歷史以嚟最大單月按年跌幅，本地零售佬當然唔開心，但隨著立禁蒙面法嘅消息，周大福（０１９２９）都轉踢逾１巴仙，報６﹒４８銀。周生生（００１１６）彈起近２巴仙，報８﹒６５銀。六福（００５９０）亦高近１巴仙，報１９﹒７２銀。化妝類零售佬莎莎（００１７８）揚逾４巴仙，報１﹒７７銀。　＊國慶訪客多濠賭笑呵呵，大行皆睇好體品缸友掃＊　　　香江零售唔好姐，馬交就唔見受影響喇！馬交旅遊局話，「十一國慶」頭兩日到訪嘅神州旅客人次已經有逾２５﹒７６萬，按年多近一成，總訪澳旅客人次亦增近９巴仙至逾２９﹒７萬。雖然唔知係咪旺埋財，濠賭佬都開心踢高。澳博（００８８０）鏟高逾３巴仙，報７﹒８２銀。永利馬交（０１１２８）及銀娛（０００２７）齊飆升近３巴仙，分別報１５﹒６８銀及５０銀。美高梅（０２２８２）亦走高逾２巴仙，報１２﹒８６銀。金沙（０１９２８）及新濠國際（００２００）齊起哄約２巴仙，分別報３６﹒３銀及１９﹒４銀。　　神州體育用品佬獲各大行睇好，當中「體操王子」李寧（０２３３１）畀瑞信維持「跑贏魚缸」評級同「他屐」２６﹒３銀，全日走高逾４巴仙，報２３﹒１５銀。安踏（０２０２０）之前畀星展首予「他屐」７４﹒５銀同「掃貨」評級，今日見６５﹒９５銀創歷史新高，收漲逾３巴仙，報６７銀，仲係今日表現最好國貨佬。特步（０１３６８）亦鏟高近４巴仙，報４﹒４７銀。３６１度（０１３６１）及申洲（０２３１３）分別升多逾２巴仙及１巴仙，收報１﹒７６銀及１０３﹒３銀。　＊歐美貿易戰新秀麗慘跣，金價又回升金礦股價醒＊　　　世貿組織點頭允許美國可以向歐盟徵收關稅，貿易戰火由中美延伸至歐美，歐洲股市已經跌到慘慘豬，連帶本港一堆歐洲概念股都一齊低走，除咗上面提到嘅大象之外，新秀麗（０１９１０）跌低近２巴仙，報１６﹒６８銀；普拉達（０１９１３）跣近１巴仙，報２２﹒１５銀；歐舒丹（００９７３）潛逾１巴仙，報１６﹒１銀。不過，思捷環球（００３３０）就隨市升近１巴仙，報１﹒５５銀。　　一講到「打仗」，當然要買定黃金避險啦！金價隨即重上每盎司１５００美金水平，黃金相關股亦都踢高。山東黃金（０１７８７）飆近３巴仙，報１９﹒９８銀。招金（０１８１８）亦揚近３巴仙，報９﹒３７銀。ＳＰＤＲ金ＥＴＦ（０２８４０）就走高逾１巴仙，報１１０８銀。請請！　　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇