話說內地Ａ股最近減收一半股票印花稅，本以為係萬世歡騰咁款，點知係虛火，升得個少少。不過，香港似乎都有些少聲音，就係跟定唔跟？意思係香港跟唔跟減股票印花稅。
　　業內人士就梗係呼籲快啲減啦！因為自從本港加左股票印花稅之後，股市表現似乎未有好過，而家阿爺都話減稅，你香港無理由唔跟啦？不過，加稅呢個動作好似做左無耐，咁樣朝令夕改，似乎有失面子囉，所以市場人士普遍認為短期內減稅機會不大。
　　就算真係減，係咪又會刺激到大市呢？觀乎內地呢次減稅之後表現真係可圈可點，加上而家市場仲處於加息狀態，資金融資方面成本上揚，對於股市炒賣本身不利，減印花稅其實都只係杯水車薪。
　　說到底，減唔減稅呢個問題，最直接影響就梗係證券行，本來已經要同銀行爭生意，又已經低佣金，原本低息時代都可以靠借出孖展賺下水腳，而家大市咁弱，大家都無咩意欲落場，仲唔減稅刺激下個市，真係執下又一間執下又一間囉。
　　香港證券業協會主席兼立法會議員李惟宏曾經表示，建議政府考慮取消股票印花稅半年至一年向市場發出正面訊息，市場目前都期待《施政報告》會唔會有其他刺激市場嘅新措施，我地就即管拭目以待啦。
　
編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【你點睇】辭任終院法官撰文指本港法治受干預，政府反駁強調不受政治壓力，你是否支持政府回應？► 立即投票