古臣家住港島以南，往日深受香港仔隧道塞車之苦，上年年尾南港島線開通之後，返工返學要成個幾鐘兩個鐘嘅日子先告一段落。雖然一程港鐵唔平，過一過海閒閒地十幾廿蚊，但勝在容易預時間（如果冇故障的話），出門貪方便首選始終係港鐵。

＊車費與股價不可兼得？＊

　　港鐵公司（０００６６）近年爭議唔少，好似「可加可減」機制就變成「只加不減」，大大話話已經連加７年，新界嘅朋友個個叫苦連天。政府上年突然「開恩」提早一年同港鐵檢討票價調整機制，轉過頭又吹風叫大家唔好太大期望，運房局局長張炳良話如果機制大改影響港鐵利潤，小股東唔會同意喎。魚與熊掌，各位股民又揀邊樣？
　　港鐵每年推出嘅優惠經常被批評為小恩小惠。舊年開始搞「開心搭．生日獎」，每個月抽一日生日嘅乘客可以換取全日通同商場５０蚊現金獎，本來經已冇乜人受惠，點知嚟緊２月仲抽中
２９號，中獎人數得平時四分一。學網友話齋，咁大間公司好心就豪爽啲，再抽多日啦。
　　單憑依兩件事，阿臣肯肯定港鐵年年盈利增長有多冇少，不過汲取上次電能（００００６）嘅經驗，公用股唔多識郁，得少少錢都係唔好亂坐。

＊回鄉探親隔周與君再會＊

　　講開港鐵，不得不直線抽擊一下林鄭。唔知係唔係因為坐定粒六，奶媽冇咩做功課、亦唔重視公關，連開ｆｂ取悅吓網民做吓騷都懶。「唔識用八達通入閘」、「唔知便利店原來冇得買廁紙」，未上台「堅離地」嘅形象已經威盡國際（英國《每日郵報》網站有報道）。
　　雖然廣大市民冇票可投，但大家都有眼睇嘅。就算你獲得阿爺欽點黃袍加身，冇民意支持、冇蜜月期，又點樣有效施政？
　　另外，古臣農曆新年回鄉探親，本欄大年初五（２月１日）暫停一期，８日再會各位。謹此祝大家新年進步，招財進寶！

　　表列截至１月２５日止投資組合表現：

　　股份　　　　　股數　　　　　　買入價　　　　　　現價　　　　　　　總值
　　－－－－－－－－－－－－－－－－－－－－－－－－－－－－－－－－－－－－－－－－
　　中交建　　１０００股　　　　　９﹒２５元　　　　９﹒３９元　　　　９３９０元
　　－－－－－－－－－－－－－－－－－－－－－－－－－－－－－－－－－－－－－－－－

　　股票市值　：　９３９０元
　　剩餘現金　：５６００９元
　　組合淨值　：６５３９９元

　　組合本周收益表現：＋０﹒１％
　　組合本月收益表現：＋５﹒８％（截至去年底止組合淨值：６１８４３元）
　　組合累計收益表現：＋０﹒６％（本金６５０００元）

　　＊數據截至今日１１：３０ａｍ

全新節目《說說心理話》青少年不可以戀愛！？真實個案講述驚心動魄經歷► 即睇