香江魚缸噚日（２５日）係威係勢反彈５００幾點，悶咗好耐嘅缸友當然開香檳慶祝喇！加上噚晚花旗魚缸又報捷，喺油價升至近５０美金帶動下，道指收高１４５點報
１７８５１。一心諗住香江今朝（２６日）可以承勢再衝過！點知希望愈大，失望愈大，好友一開場就無晒力，恒指只係微微高開５點報２０３７３，之後就呆呆滯滯，大部分時間都幾十點上落，悶到瞌眼瞓。
　　最終完場時，恒指收升２９點報２０３９７，國指軟１０點報８５２６。成交方面，又打回原形，今日得番約４６４億銀。悶！
　
＊大和來撐場敏華向上揚，洛鉬Ａ升停Ｈ股微微漲＊

　　敏華（０１９９９）噚日放榜後，「賓架」一片讚好聲，富瑞話低原材料價成本對毛利潤有幫助，大和就估佢喺北美同神州市佔率會繼續擴大，出年財年表現強勢，齊齊升目標。敏華應聲彈起逾５巴仙，報１０﹒４６銀，仲試過破頂高見１０﹒６４銀！
　　洛陽鉬業（０３９９３）（滬：６０３９９３）先前打算買鈮和磷酸鹽、銅和鈷業務，構成重大資產重組，回覆咗上交所提出嘅問題後，Ａ仔一復出即漲停。香江依邊都行得慢咗啲，只係升逾４巴仙，報１﹒６７銀。
　　聯想（００９９２）成績美銀美林就唔多睇好，料上財季盈利按季跌４１巴仙，仲降目標，難怪股價仲係無起色，碌低０﹒４巴仙，得返４﹒９８銀。李氏大藥廠（００９５０）同樣準備放榜，卻率先飛起近８巴仙，報６﹒４８銀。

＊油價再上闖鐵鳥要低飛，旺旺康師傅今天加點肥＊

　　花旗國原油庫存降幅多過預期，紐約期油升１﹒９巴仙，又曾上到４９﹒６２美元嘅７個月高位；布蘭特期油喺亞洲時段更觸及５０美金大關。中海油（００８８３）大受刺激，跳起２巴仙，報９﹒３７銀。中石化（００３８６）、中石油（００８５７）亦跟尾踢高逾１同０﹒４巴仙，收５﹒３２同５﹒３５銀。至於三隻紅鐵鳥，就紛紛低飛跌２％至４％。
　　魚缸悶局一場，缸友呆足一日搞到好肚餓，兩隻賣嘢食嘅就成為避風塘，旺旺
（００１５１）收穫逾３巴仙，報５﹒６４銀，仲係最叻仔藍戰士。康師傅（００３２２）今日績前都衝前近３巴仙，埋單８﹒０３銀，係第二威藍戰士！

＊大象與渣打缸邊跳隻舞，媽咪被調查家人也苦惱＊

　　魚缸今日表現平平，但兩隻國際錢莊繼續有錢湧入。渣打（０２８８８）踢高近１巴仙，收報６２﹒０５銀。大笨象（００００５）亦踢高近１巴仙，收報５０﹒８５銀。土炮錢莊東亞
（０００２３）同大新銀行（０２３５６）反而要走低唔夠１巴仙。
　　阿里巴巴遭花旗證券查數簿累股價大跌，集團話調查主要集中喺菜鳥物流網絡入帳方法，以及「光棍節」啲數據處理等。阿媽遭人調查，真係成家憂心。阿里影業（０１０６０）跌低逾
１巴仙，收報１﹒７５銀。阿里健康（００２４１）尾市踢高逾３巴仙，收報５﹒５銀。有投資阿里巴巴嘅中動向（０３８１８）更碌低逾逾５巴仙，收報１﹒２５銀。

＊２７４復牌大上復大落，炒股唔炒市建築忽落鑊＊

　　中富資源（００２７４）停牌近５年，今日終於重返魚缸作戰。可惜有頭威無尾陣，開市無耐只係爆升逾２４巴仙，但好快就打回原形，尾市更被洗倉，急瀉近四成收０﹒０４７銀，真係得人驚！
　　中國三三傳媒（０８０８７）過去三日累升逾三成，可惜今日大成交嘔咗３１巴仙，收報
０﹒１２２銀，失晒所有主要日均線，嘔凸晒出嚟！進達東方（００５１５）折讓逾七成「二供一」，缸友聽到都怕怕，急急離場走人，累股價被質低逾２６巴仙，收報０﹒２４７銀。
　　奧立仕（００８６０）向主席發５﹒８８億股換取注入廣州地塊權益，消息助奧立仕踢高三成，收報０﹒３９銀。不過都唔夠Ｆｏｃｕｓ　Ｍｅｄｉａ（０８１１２）勁，散場前爆升近
５４巴仙，以「黑馬」姿態奪得最勁個股。
　　部分建築股繼續成為熱炒對象，三和建築（０３８２２）踢高約１３巴仙，收報０﹒５２銀
。良斯（０１６８３）同劍虹（０１５５７）亦分別有約６至９巴仙收穫。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。

《說說心理話》與你分享被性騷擾解決辦法，大量真實個案，唔同場所如何提防及應對？► 即睇