花旗聯儲局噚晚（２１日）宣布按兵不動，一如預期維持息率不變，當地好友當然食住個勢出兵，道指成功搶高１６３點或０﹒９巴仙收１８２９３點。
　　呢個消息對香江短期來講，都係一個強大催化劑！今朝恒指跟外圍高開２５０點報２３９２０，唔使半個鐘，就已經夾高最多３８８點至２４０５８。好友贏得咁漂亮，梗係離場慶祝喇，搞到恒指下半場縮晒水，一度得番１６點升幅，國指仲因為中資金融股腳軟，嚇到一度調頭倒跌添。結果，恒指散場仍踢高８９點報２３７５９，國指揚４４點報９８９３。
　　話時話，息魔暫時未嚟，但耶倫姨姨都「畫公仔畫出腸」，強烈暗示可能今年底前加息，所以缸友都唔敢太過得意忘形，寧願見好即收。恒指兩萬四，國指一萬關都係得而復失；全日魚缸成交急增至近８６７億銀。

＊耶倫留尾巴年底息勢加，掂過兩萬四掉頭表現差＊

　　魚缸朝早仲彈高近四百點，點知食完飯返嚟就急回，升幅差啲唔見晒，其中一班內險最唔好受。平保（０２３１８）本來升過近２巴仙，但最終要調頭倒跌逾１巴仙，報４２﹒１５銀。有預期神州今年內會啟動職業年金孖屐，養老保險嘅老大國壽（０２６２８）曾經受刺激跳高近４巴仙，最後都係跣返低０﹒２巴仙，報２１﹒３銀。
　　神州錢莊好似中行（０３９８８）都調頭碌低１巴仙，收３﹒６３銀。建行（００９３９）雖然獲大和上調「他屐」，依然只能打個和無升跌，報５﹒９８銀。而招行（０３９６８）就比較生性，法巴讚佢業務質素有改善，首次就畀「買入」評級，結果衝前逾２巴仙，報１９﹒８銀
。

＊保保與錢莊午後齊腳軟，息魔得得嚒地主炒返轉＊

　　花旗國按兵不動唔加息，加上大摩唱好估計出年樓價會升半成，一班磚頭佬開心到飛起。長實地產（０１１１３）、恒地（０００１２）跳起１至２巴仙，報５６﹒９同４６﹒９５銀。嘉里建設（００６８３）仲勁，斬穫近３巴仙，收２５﹒４銀。噚日放完榜嘅新世界
（０００１７）獲德銀、麥格理睇好，微微行前唔夠１巴仙，報１０﹒３２銀。
　　大笨象（００００５）再豪洗１５２３萬英鎊回購２５８﹒３萬股，今朝一度走上逾１巴仙
，可惜之後後繼無力，全日依賴要瞓低逾１巴仙，報５８﹒５５銀。
　　至於早排股權爭不停嘅萬科（０２２０２），今日Ａ仔（深：０００００２）足足飆高近一成，帶動埋香江依邊踢高近１巴仙，埋單２０﹒２５銀，莫非又有咩「景轟」？

＊大象要唞唞鐵路高高收，富瑞劈目標東航鬥快走＊

　　鐵路股表現幾好。國家鐵路局組團去花旗國開展中美鐵路產能合作交流，另外中車
（０１７６６）獲大摩升評級，由「持有」升到「掃貨」，目標價亦由７﹒９銀升到８﹒８銀，全日衝前逾半成，報７﹒３９銀；中車時代（０３８９８）亦有近２巴仙進帳，收報４２銀。
　　石油庫存減少推高油價，中石油（００８５７）獲麥格理垂青，升評級至「跑贏大市」，全日踢高近１巴仙，報５﹒０３銀；中石化（００３８６）就升近２巴仙，報５﹒４８銀。
　　鐵鳥東航（００６７０）完成發行３０億人仔超短期債，但畀富瑞劈目標價四成，去到
３﹒２銀，又降評級至「差過大市」，想高飛都難喇！今日逆市飛低近２巴仙，報３﹒６８銀。

＊玖紙派得爽炒起士氣壯，高佬來撐場賭仔有點慌＊

　　玖紙（０２６８９）噚日收市之後派成績表，全年少賺逾兩成至超過１１億銀人仔，令粉絲失望。不過公司好識做，連特別息共派１１分人仔氹番，唔單止成功留住粉絲嘅心，願意掃貨支持，仲畀多間大行唱好，話公司核心盈利其實符預期，齊齊升目標價，難怪埋單有逾８巴仙進帳
，收報７﹒４４銀。
　　噚日一、二線濠賭股大發神威，高盛今日亦出報告，估計黃金周會有利賭收，不過賭仔們都要停低唞唞。大阿哥銀娛（０００２７）聽日除淨，今日曾經跟市升近３巴仙，但埋單打回原形
，最終無升跌收報２９﹒６５銀；街坊金沙（０１９２８）同永利（０１１２８）都碌低近２巴仙。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇